Sekretariu Jeral Klube Primeira Divizaun Liga Futeból Timor-Leste (LFTL) Karketu Dili FC, Elizeu Isaac. Imajen/Espesiál.

DILI, 07 janeiru 2021 (TATOLI) – Klube futeból Karketu Dili FC, halo esforsu hela hodi negosia ho jogadór estranjeiru na’in-tolu hodi bele mai reforsa iha Liga Futeból Timor-Leste 2021.

Diretór tékniku Karketu Dili FC, Elizeu Isaac hateten,  jogadór na’in-tolu ne’e; ida hosi Indonézia, ida fali hosi Tailándia no ida tan hosi Afrika.

Elizeu Isaac dehan, Karketu deside sosa jogadór hirak ne’e tanba liña oin no klaran Karketu nian iha jogu Tasa 12 Novembru no Kopa Federasaun Futeból Timor-Leste (FFTL) monu maka’as hodi rezulta ekipa ne’e falla total iha nia jornada.

“Jogadór na’in-tolu ne’ebé ami sei rekruta hosi estranjeiru daudauk ne’e ami seidauk bele sita sira-nia identidade tanba sei iha faze negosiasaun,” hateten Elizeiu Isaac bá Agência Tatoli, ohin, liuhosi konfirmasaun WhatsApp

Nia dehan,  intensaun lori jogadór estranjeiru  na’in-tolu ne’e; na’in-rua sei joga iha parte avansadu no ida iha parte médiu.

Entretantu, ba jogadór lokál Karketu mós iha ona kontaktu ho jogadór balu, maibé seidauk bele fó sai jogadór hirak ne’e nia naran.

“Agora daudauk Karketu iha ona planu, tan de’it ita-nia Governu hasai ona distansiamentu sosiál labele halibur malu liu ema na’in-10 entaun ami kansela reuniaun. Talves, inísiu fevreiru, ami foin hahú fali ami nia reuniaun hodi haree bá preparasaun liga nian,” Elizeu Isaac tenik.

Jornalista   : Hortencio Sanchez

Editór         : Francisco Simões

 

HAKEREK NO HATÁN

Please enter your comment!
Please enter your name here