Primeiru-Ministru, Taur Matan Ruak. Imajen TATOLI/Egas Cristovão

DILI, 07 janeiru 2021 (TATOLI)—VIII Governu Konstitusionál hato’o agradesimentu ba Amu Bispu Dioseze Dili, Maliana no Baucau, ne’ebé koopera suspende misa loron boot tinan foun iha territóriu nasionál hodi minimiza risku surtu COVID-19 iha Timor-Leste.

“Ita hakarak lori Governu nia naran, agradese ba ita-nia Amu Bispu sira-nia kooperasaun ne’ebé la realiza misa hodi minimiza risku kontájia moras iha ita-nia nasaun,” Primeiru-Ministru (PM), Taur Matan Ruak, hafoin enkontru ho Prezidente Repúblika, Francisco Guterres ‘Lú Olo’, iha Palásiu Prezidensiál, Bairro Pité, kinta ne’e.

Notísia Relevante: CET deside sarani sira akompaña misa 31 dezembru liuhosi rádiu-televizaun

Iha loron 30 dezembru, Conferência Episcopal Timorense (CET), deside no husu ba sarani Katólika iha Timór laran tomak atu akompaña de’it misa taka tinan tuan iha loron 31 dezembru 2020 no misa tinan foun nian iha loron 01 janeiru 2021, liuhosi rádiu no televizaun.

Husu mós ba Amu lulik sira atu kumpre no divulga dekretu kona-ba COVID-19 no tuir dekretu ne’e, Amu Bispu sira deside katak selebrasaun litúrjika hotu, liu-liu loron rua ne’e nia-laran, sei laiha partisipasaun povu.

Iha selebrasaun festa Mãe de Jesus, sarani sira sei tuir misa espirituál de’it iha ida-idak ninia uma liuhosi kanál televizaun ka meiu seluk iha mídia sosiál nian.

Razaun suspende misa tanba haree ba situasaun pandemia COVID-19, tempu kalamidade públiku no mundiál, Uma Kreda konvida sarani sira atu partisipa hosi kumuñaun eukarístika espirituál.

Desizaun ne’e hatuur iha karta pastorál ne’ebé asina hosi Bispu Baucau no Sekretáriu Jerál CET Don Basilio do Nascimento, Arsebispu Díli no Pro-Prezidente CET Don Virgílio do Carmo da Silva, Bispu Maliana no Prezidente CET, Dom Norberto do Amaral.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here