Forsa Komponente Naval na’in tolu hala’o formatura iha seremónia aniversáriu Komponente Naval bá dala 17 iha Baze Naval Hera. Imajen/Mídia GPR

DILI, 07 janeiru 2021 (TATOLI)- Komandu FALINTIL-Forsa Defeza Timor-Leste (F-FDTL) Komponente Navál Lijeira (KNL) kansela ona festa selebrasaun aniversáriu bá da-XIX tanba pandemia COVID-19.

Komandante Komponente Navál Lijeira, Kapitaun de Fragata, João da Silva, husu deskulpa no komprensaun hosi bainaka militár, sivíl, veteranu, polísia no konvidadu importante sira ne’ebé simu ona konvite atu labele hirus, tanba festa ne’e adia hodi koopera ho desizaun Estadu Timor-Leste ne’ebé deklara ona Estadu Emerjénsia bá-dasiak hodi bandu atividade festa hodi evita propagasaun surtu COVID-19.

“Atu evita propagasaun  COVID-19 no kumpre bá regra Estadu Emerjénsia nian, ami husu konsiderasaun ba parte hotu bá desizaun ne’ebé Komandu F-FDTL nia desizaun hodi kansela serimónia solene bá komemorasaun aniversáriu Komponente Navál Lijeira ne’ebé sei hala’o iha loron 12 janeiru 2021,” informa Kapitaun de Fragata, João da Silva, ohin, ba jornalista iha Komponente Navál, Hera, Dili.

Iha parte seluk, Komandante João dehan, durante Komandu Komponente Navál kontinua hala’o ninia misaun servisu inklui realiza atividade formasaun bá membru sira hodi bá hasa’e rekursu iha Akademia Militár, Austrália, Japaun Estadu Unidus Amerika, Nova Zelándia, Brazil no nasaun seluk tan.

 “Ami sei hasoru dezafiu barak intermus finanseira, rekursu maibé ida ne’e la hamate ami nia espíritu hodi serbí no kapasita nafatin membru sira hodi konsolida forsa sai metin hodi serbí nasaun,” nia hateten.

Komandu Komponente Navál mós prepara ona rekursu hodi hola parte iha servisu Autoridade Marítima Nasionál (AMN) hodi proteze rikusoin Timor-oan nian iha tasi Timor.

Iha fatin hanesan, Xefe Komisaun Organizadora Aniversáriu Komponente Navál Lijeira, Primeiru Tenente, Nicolau Sousa, hato’o agradese mós ba autoridade Suku Hera ho povu no juventude, membru polisia inklui patrosinadór sira ne’ebé fó fundus no materiál hodi realiza eventu desportu sira.

Nicolau hatutan, Komandu Navál deside hapara  mós atividade sira seluk hanesan, konsertu múzika animasaun, dansa, jogu komunitáriu sa’e-bua no dada-tali, espozisaun feira no suspende temporáriu mós atividade kazamentu militár nian.

Antes ne’e, iha dezembru 2020, ekipa komisaun organizadora konsege realiza ona atividade jogu Copa Navál ne’ebé partisipa hosi Klube Futeból 42, inklui klube hitu (7) hosi modalidade volley nian.

Ekipa realiza mós formasaun ba espoza militár ne’ebé hala’o hosi Asosiasaun Família Militár (AFAMA), inklui programa doasaun raan ba Banku Sangue hodi apoiu pasiente sira ne’ebé hala’o tratamentu saúde iha Hospital Nasional Guido Valadares (HNGV) no kuda ai-kameli.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here