Ministra Negósiu Estranjeiru no Kooperasaun, Adaljiza Albertina Xavier Reis Magno. Imajen Tatoli /Egas Cristovão

DILI, 06 janeiru 2021 (TATOLI) – Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, informa  to’o agora Timor-Leste seidauk simu feedback hosi Sekretariadu ASEAN kona-bá rezultadu reuniaun virtuál komunidade ekonómika ASEAN, foin lalais ne’e.

Notísia Relevante : TL toma nota ba komentáriu-sira iha enkontru virtuál EAC

“To’o agora sira nia feedback seidauk mai, bainhira mai ona ami sei informa fali. Ita hatene depois reuniaun virtuál ne’e ita iha loron ikus dezembru ne’e iha festa natal no tinan foun ne’ebé sira seidauk hato’o informasaun mai,” Ministra Adaljiza Magno hateten hodi responde Agência Tatoli, ohin, iha Palásiu Governu, Dili.

Nia informa, pilár importante tolu ne’ebé ASEAN sekretariadu husu Timor – Leste kumpre hotu ona. Tanba ne’e bainhira Covid-19 remata sira sei tun direita hodi halo observasaun no avaliasaun.

Enkuantu pilár tolu ne’e mak hanesan, sósiu kulturál, defeza no seguransa ho pilár ekonomia.

“Ita hein hela situasaun ne’e. Ein prinsípiu sira sei haree hela oinsá atu fó fali rezultadu mai ita,” Ministra Adaljiza Magno hateten.

Ministra Adaljiza Magno relata maski 2020 nasaun hotu afeta bá surtu Covid-19, maibé Timor-Leste nia servisu diplomata sira kontinua la’o di’ak.

“Covid-19 ne’e halo ita hotu book an la di’ak fó impaktu liubá ekonomia, maibé iha servisu diplomata nian laiha impaktu tanba iha reuniaun virtuál barak mak ita halo ho nasaun barak ho rezultadu pozitivu,” nia hateten.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here