Komunidade iha suku Comoro, kapitál Dili, troka voucher iha supermerkadu Leader ho produtu Cesta Bázika, kinta (10/12). Imajen TATOLI/António Gonçalves

DILI, 06 janeiru 2021 (TATOLI)-Sekretaria Estadu Kooperativa (SEKoop) hasai despaisu hodi husu kompañia fornesidór ba programa Cesta Bázika atu kumpre regra Estadu Emerjénsia (EE) da-siak bainhira fahe produtu ba komunidade sira iha terrenu.

Despaisu ne’e ho númeru 01/SEKOOP/I/2021 05 janeiru kona-ba distribuisaun Cesta Bázika, ne’ebé Sekretaria Estadu ne’e hanesan responsável ba distribuisaun iha munisípiu to’o postu administrativu.

“Husu kompañia fornesidór atu halo restrisaun tuir medida Estadu Emerjénsia no medida COVID-19 nian,” refere nota ne’ebé Agência TATOLI asesu, kuarta ne’e.

Notísia Relevante: EE da-siak: viola medida ezekusaun sei asume responsabilidade kriminál

SEKoop mós husu ba kompañia fornesidór produtu, autoridade lokál, sivíl, autoridade sanitária, inklui Polísia Nasionál Timor-Leste (PNTL) hodi kumpre regra EE.

“Kompañia fornesidór produtu  bainhira halo distribuisaun tenke tau máskara no sasán disinfetadu sira seluk, kumpre distansiamentu sosiál entre ema ida ho ema seluk, nu’udár kondisaun ida atu prevene kontaminasaun COVID-19 tuir Organizasaun Mundiál Saúde (OMS)  haruka,” nota ne’e subliña.

Nune’e mós, bainhira iha distribuisaun Cesta Bázika, família ida labele ba hotu, ida de’it maka reprezenta hodi simu produtu hodi labele halibur ema tuir saida maka determina ona hosi autoridade sira.

Iha loja fornesimentu, obrigatoriamentue tenke kumpre ijiene antes no hafoin simu tenke fase liman.

Despaisu ne’e rasik hahú vigor hahú hosi loron 05  janeiru 2021.

EE iha faze da-siak abranje iha territóriu nasionál tomak no hahú vigora hosi tuku 00:00 loron 03 janeiru 2021 to’o tuku 23:59 loron 01 fevereiru 2021.

Jornalista: Natalino Costa

Editora: Julia Chatarina

1 KOMENTÁRIU

  1. Ami hanesan povu kiik la iha kbiit atu hasoru kuaker instituisaun estado no ami prontu atu kumpri regras no kriterius ne’ebé fo sai. Maibe ami mos iha direito oituan atu hato’o ba Seekoop katak tamba saida mak la fahe direitamente osan maibe fila ba sasan fali mak fahe…! Ita hakarak ajuda povu k hakarak ajuda kompanha i sara. Tamba sa mak governu la uza maneira ne’ebe fasil no ajuda povu . Maibe uza fali maneira ne’ebe difisil no ajuda kompania ou ema privadu ne’ebé iha ona osan. Dala barak ita dehan mal gestaun mais ita la hapara maibe ita halo buras ba bebeik. Obrigado

HAKEREK NO HATÁN

Please enter your comment!
Please enter your name here