Sekretáriu Estadu Kooperativa, Elizário Ferreira. Imajen TATOLI/António Gonçalves

DILI, 06 janeiru 2021 (TATOLI)—Tanba Governu labele suspende provozóriu implementasaun Cesta Bázika iha munisípiu sira, maka ministériu implementadór programa nafatin realiza atividade distribuisaun produtu, maibé nafatin ho mekanizmu kumpre medida Estadu Emerjénsia (EE) da-siak

Sekretaria Estadu Kooperativa (SEKoop) sei fornese uluk máskara ba komunidade molok simu Cesta Bázika.

“Atividade ne’e la’o nafatin maibé tanba Estadu Emerjénsia ne’ebé labele halibur malu iha fatin ida liu ema na’in-10, maka ami hasai sirkulasaun katak mantein nafatin distansiamentu sosiál, kada aldeia na’in-10 mak simu uluk hafoin tuir tan na’in-10 to’o ramata, molok to’o iha sentru tenke fase uluk liman no simu lai máskara hafoin bele ba aprezenta-an,” relata Sekretáriu Estadu Kooperativa, Elizário Ferreira, hafoin ralata serbisu ba Primeiru-Ministru, Taur Matan Ruak, iha Palásiu Governu, kuarta ne’e.

Notísia Relevante: Alterasaun medida EE, bandu halibur liu na’in-10 exetu pertense família

Governante ne’e dehan, daudaun ne’e atividade distribuisaun produtu nafatin la’o iha munisípiu maibé nafatin kumpre medida prevensaun.

Tuir Sekretária Estadu ne’e, Governu kontinua distribuisaun Cesta Bázika maski iha períodu EE tanba atu rekupera ekonomia.

“Kuandu la distribui maka afeta ba ekonomia sosiedade, nune’e mós kuandu labarik sira laiha ai-han bele má-nutrisaun, tanba ne’e maka Governu deside kontinua atividade,” nia akresenta.

Iha implementasaun programa Cesta Bázika, hanesan ministériu implementadór, SEKoop responsável distribuisaun iha munisípiu Covalima ne’ebé daudaun konklui ona no hela de’it mak munisípiu Ainaro, Manufahi, Aileu, Liquiçá, Manatuto no Lautém.

Jornalista: Antónia Gusmão

Editora: Julia Chatarina   

HAKEREK NO HATÁN

Please enter your comment!
Please enter your name here