Saudozu Jerónimo “Naroman” Americo Xavier. Imajen/Espesiál.

DILI, 06 janeiru 2021 (TATOLI)—Hanesan naroman kiik-oan ida ne’ebé lakan iha nakukun laran, Saudozu “NAROMAN” hatudu ona nia naroman liuhosi ninia memória luta naruk ida ne’ebé nia hatudu iha nia moris tomak durante luta ba Timor-Leste nia ukun rasik aan. Saudozu “Naroman” nia naroman ne’e mihis no manan ona ”Naroman” rohan laek nian iha reinu lalehan (mate=hakotu iis) iha loron 02 fulan Janeiru tinan 2021 iha Dili.

Iha loron ne’e kedas, Saudozu “Naroman” nia isin-mate lori kedas ba iha nia knua moris fatin iha Aldeia Uaimanuboe, Suku Uailili, Postu Administrativu Baucau Vila, Munisípiu Baucau. Hatuur loron ida no kalan ida iha nia horik fatin, iha loron 06 fulan janeiru tinan 2021, Saudozu ”Naroman” nia isin-mate haloot ho dignidade iha Jardim dos Herois Metinaro, Dili.

Maske Saudózu “Naroman” mate tiha ona maibé ninia istória no memória luta ba libertasaun nasionál ne’e, lee sai hikas iha serimónia fúnebre ne’ebé lulik no santu, atu nia oan sira-parente no família sira-liuliu jerasaun foun sira bele rona, aprende, no fó aparesiasaun ba saudozu nia luta ne’e. Istória ka memória badak hosi Saudozu “Naroman” nia luta ba libertasaun patria no povu Timor-Leste:

Iha fulan novembru tinan 1975, saudozu “Naroman” inklina-aan iha militár nu’udar membru FALINTIL (Forsa Armada Libertasaun Nasionál) hodi ba ba tuir treinamentu iha Suku Gariuai [Baucau] atu ba halo auto-defeza iha liña fronteira maibé lakonsege realiza tanba iha loron 07 fulan dezembru tinan 1975 invazaun bot akontese no Indonézia tama iha Timor-Leste. Iha momentu ne’ebá, saudozu “Naroman” ho nia kamarada sira halai fahe malu ida-idak ba subar iha abrigu hodi salva moris.

Iha fulan dezembru 1975, saudozu “Naroman” ho nia família sira halai ba ai-laran no to’o iha ne’ebá, saudozu “Naroman” nomea ba delegadu Aldeia Vivake/Inglatera nian,  iha ne’ebé sira-nia prezensa haforsa liután kaixa ne’ebé halo ligasaun direta ba FALINTIL sira iha ai-laran.

Iha tinan 1990, saudozu “Naroman” lori tan juventude balu ba aprezenta iha Komadante David Alex “DAITULA” ho nia grupu iha área Uaimanuboe iha abrigu ABOKO ho naran sira mak hanesan tuir mai ne’e; Carlos Correia  “Hakarak”,  Porfirio Ricardo “Maridua Onda”, Apolinario Neto Xavier “Atawali”, no Benigna Xavier “Nabilan Onda”. Ho razaun katak sira hirak ne’e bele kobre informasaun iha vila-laran, depois entre sira-ne’e balu koloka fali ba iha parte halo provokasaun (demonstrasaun) liuhosi organizasaun Organização da Juventude e dos Estudantes de Timor-Leste (OJETIL).

Iha tinan 1991, saudozu “Naroman” lori tan kamarada João Ximenes “Auxili” hodi aprezenta ba komadante David Alex “Daitula” ho nia grupu iha área Uaimanuboe iha fatin abrigu ABOKO ho razaun katak kamarada ne’e mai atu reforsa liután kaixa Klandestina.

Iha fulan juñu 1992, Amu Mario haruka saudozu “Naroman” informa ba forsa FALINTIL atu halo karta ida hodi dirije ba Amu Mario hodi nune’e sira bele hasoru malu hodi ko’alia kona-ba situasaun nasaun nian maibé sira lakonsege hasoru malu tanba situasaun la permite (manas), forsa Indonézia halo operasaun iha área Uailili-Uaimanuboe no Samalari (Baucau).

Durante fulan haat (juñu, jullu, agostu no setembru) nia laran, saudozu “Naroman” ho nia kamarada sira fahe tiha FALINTIL ba grupu rua, grupu idaa ho komadante David Alex (Daitula) ba subar iha área Samalari iha Kaixa Vivake/Inglatera nian no grupu ida seluk ho komandante Onda mai subar iha Uaimanuboe iha Kaixa BIKA nian.

Situasaun ne’e manas nafatin entaun iha fulan outubru nia-laran, saudozu “Naroman” ho nia kamarada sira halo estafeta ba dirasaun rua ne’e hamutuk halo planu hodi sobu forsa Indonézia nia operasaun iha área refere. Entaun, iha momentu saudozu Alcino “Samodok”la konsege halai sai, ikus mai inimigu kaptura saudozu Samodok prega iha kruz to’o hakotu iis.

Iha tinan 1993, situasaun komesa la’o di’ak uituan ona no saudozu “Naroman” lori fali forsa FALINTIL ba iha vila laran to’o tinan 1998, FALINTIL sira tama sai bairru fó esklaresimntu ba povu kona-ba votasaun ba Konsulta Popular ka Referendu ne’ebé atu akontes iha 30 Agostu 1999.

Forsa FALINTIL reziaun rua ne’ebé maka halo ligasaun ho saudozu “Naroman” mak naran sira hanesan tuir mai ne’e; Komadante Sub-Xefe Estadu Maior das FALETIL David Alex “Daitula” ho kilat (Ar-15), Asistente polítika Jaids Blayckalias Adjuntu Alin Laek, Komandante Berdu’u ho kilat (Ar-15), Komandante Mau Rebo ho kilat (Ar-15), Komandante Rubi Oan Kiak (metralladór), Komandante Mau-Lindo ho kilat (Sp-1), Komandante Loke-Matan ho kilat (Sp-1), Komandante Arnico (Sp-1), Komandante Atino Sidabutar, Komandante Onda (SKS), no Komandante Haksolok ho kilat (Sp-1).

Saudozu “Naroman” servisu hamutuk ho kamadante sira ne’ebé mak naran mensiona ona iha leten ne’e to’o 1999 funu ramata.

Iha tinan 2000, saudozu hetan chamada hosi komandu FALINTIL iha Aileu atu halo kompletu transferensia FALINTIL ba F-FDTL maibé lakonsege tanba razaun moras, tan ne’e saudozu inklina aan hodi hili fila ba vida sivíl.

Jardin dos Herois Metinaro. Imajen/Espesiál.

Saudózu sofre moras tanba iha tempu luta, saudozu hetan kapturasaun no torturasaun hosi inimigu sira. Tanba afeta hosi torturasaun sira-ne’e, Saudozu “Naroman” konsege halo tratamentu saúde iha 2014 hodi halo operasaun dahuluk iha Hospital Nacional Guido Valadares (HNGV) no kontinua iha tinan 2016 halo tan oprasaun daruak nia iha ospitál Sanglah Bali-Indonesia.

Hafoin liu tiha tinan haat, iha tinan 2020, saudozu “Naroman” hetan moras fila-fali no iha fulan Agostu 2020 lori fila-fali ba Hospital Nacional Guido Valadares (HNGV) maibé tanba moras komplikadu no grave tebes, entaun doutor sira la konsege salva saudozu “Naroman” no saudozu iis iha loron 02 fulan janeiru 2021.

Biografia

Saudozu “Naroman” nia naran loloos tuir sertidaun batizmu nian mak Jerónimo Americo Xavier, moris iha Aldeia Uaimanuboe, Suku Uailili, Postu Administrativu Baucau Vila, Munisípiu Baucau, iha loron 31 Dezembru 1958. Saudozu oan hosi aman-inan, Adão Xavier (matebian) no Eva Alves Pereira (matebian). Saudozu nia maun-alin hamutuk na’in-sia (9) mak hanesan; Constantino Xavier Ricardo, Lourenco Antónia Freitas (matebian), Fulqueria Xavier, Jeronimo Americo Xavier (saudozu rasik), Luis Roldão Piter, Vital Pinheiro dos Reis  (saudozu ONDA), João Correia (matebian), Baptista Pascoal Correia (matebian), no Bemvinda Correia.

Saudozu “Naroman”” kaben ho nia espoza naran Carlota Marques ne’ebé iha oan hamutuk na’in-hitu (7) maka hanesan tuir mai  ne’e; Benigna Xavier Ricardo “Nabilan”, Porfirio Ricardo “Maridua Onda”, Osória Americo Marques, Francisco Marques Ricardo “Lemorai”, Jesuina Marques, José Pinheiro Ramos Xavier, no Maria Imaculada.

Adeus Saudozu “Naroman”! Adeus luta-na’in! Adeus lider no aman di’ak! Ita-boot istória no memória luta ida-nian sei hakerek no rai metin iha ami hotu nia fuan no laran. Ikus liu, obrigadu ba saudozu ”Naroman” nia dedikasaun vida tomak iha prosesu luta ba libertasaun patria no povu Timor-Leste sai povu livre no nasaun ida soberanu.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here