Membru Polísia Nasionál Timor-Leste (PNTL) halo operasaun iha kapitál Dili hodi sensibiliza regra Estadu Emerjénsia bá abitante sira hala’o viajen tenke uza máskara. Imajen Tatoli/Eugénio Pereira

DILI, 06 janeiru 2021 (TATOLI)-Komandu Jerál Polísia Nasionál Timor-Leste (PNTL) liuhosi Komandu Operasaun Nasionál, ohin, halo operasaun tama-sai loja, merkadu, supermerkadu, Timor Plaza no fatin públiku, hodi bolu atensaun bá abitante sira iha kapitál Dili atu hala’o viajen no atividade servisu ka negósiu tenke uza máskara hodi prevene aan hosi propagasaun COVID-19.

Notísia Relevante : MS detekta tan pasiente COVID-19 na’in tolu, neen rekuperadu

Operasaun ne’e PNTL ezekuta bazeia ba dekretu Governu númeru 20/2020, 29 dezembru prosede alterasaun dekretu Governu númeru 18/2020, 3 dezembru, kona-ba medida ezekusaun bá deklarasaun Estadu Emerjénsia ne’ebé efeitu bá dekretu Prezidente Repúblika númeru 70/2020 3 dezembru, hodi redús risku importasaun SARS-COV-2.

PNTL halo operasaun iha kapitál Dili hodi sensibiliza regra Estadu Emerjénsia bá abitante sira. Imajen Tatoli/Eugénio Pereira

Iha operasaun hale’u kapitál Dili, ekipa PNTL halo apreensaun bá motorizada, inklui detein abitante na’in 20-liu ne’ebé lakohi kumpre regra no la uza máskara.

Abitante hirak ne’e PNTL lori kedas bá Polísia Munisípiu Dili hodi fó konsolasaun ba sira kona-bá desizaun Estadu nian.

Komandu PNTL alerta ba abitante sira, inklui funsionáriu públiku, setór privadu sira ne’ebé hala’o atividade servisu atu kumpre nafatin regra importante ualu (8) hanesan;

  1. Mantein uza máskara ne’ebé taka inus ho ibun la’o iha dalan públiku ka tama iha resintu públiku ka privadu no bainhira uza kualkér transporte públiku bá pasajeiru sira
  2. Fase-liman beibeik ho sabaun
  3. Lori no uza handsanitazer bainhira halo movimentu hosi fatin ida bá fatin seluk
  4. Mantein distánsia sosiál, metru ida entre ema ida ho ema seluk
  5. La organiza nein partisipa iha eventu ka selebrasaun sira ne’ebé envolve aglomerasaun liuhosi ema na’in-10, ezatu sira ne’ebé pertense bá sira-nia agregadu família, durante aplikasaun Estadu Emerjénsia
  6. La autoriza atu halo desportu koletiva hanesan, tebe-bola, volley-bola, basket-bola no treinamentu hirak ne’ebé halibur ema barak
  7. Sukat temperature (tes suhu) molok tama fatin servisu
  8. Fatin asesu públiku hanesan, edifísiu, eskola, universidade, fatin negosiu hanesan plaza, merkadu, supermerkadu, loja, kioske, banku, fatin ATM nian tenke tau bee-moos no sabaun iha odamatan oin, hodi nune’e, ema bele fase-liman molok tama ba servisu ka hala’o atividade ho kondisaun saúde di’ak

Portavós Komandu Jerál Polisia Nasionál Timor-Leste (PNTL), Superintendente Xefe, Arnaldo de Araújo afirma, bainhira abitante sira la kumpre tuir lei, PNTL sei detein no prosesa bá tribunál.

Portavós ne’e hatutan, ekipa PNTL sei kontinua halo operasaun mós bá fatin sira ne’ebé fahe Cesta Bázika hodi kontrola abitante hotu- hotu tenke kumpre regra Estadu Emerjénsia no orientasaun saúde públiku.

Tuir observasaun Agência Tatoli nota durante sosializa regra hirak ne’e, loja no supermerkadu balun hahú kumpre hodi kontrola abitante sira ne’ebé tama loja tenke fase-liman, inklui uza máskara.

Jornalista       : Eugénio Pereira

Editór             : Francisco Simões

HAKEREK NO HATÁN

Please enter your comment!
Please enter your name here