Osan Dolar Amerikanu. Imajen/Espesiál

DILI, 06 janeiru 2021 (TATOLI) -Tribunál Distritál Dili (TDD), ohin, hala’o julgamentu ba arguida na’in-tolu nu’udar funsionáriu kontratadu iha orgaun Liga Nasionál Basketball (LNB) tanba deskonfia  halakon osan Estadu ho montante $6,370.15.

Deskonfia, arguida sira ne’ebé hala’o knar iha LNB ne’ebé tutela ba Sekretáriu Estadu Juventude no Desportu (SEJD) dezvia tiha osan Estadu  $6,370.15 hodi afavór ba interese privada.

Arguida na’in-tolu ho inisiál MLJCCG, AMI, MJCPC, hanesan asistente administrasaun tezoureira, Sekretária Ezekutiva ba Liga Nasionál Basketball Timor-Leste.

Tuir faktu akuzasaun Ministériu Públiku  nian katak, iha loron 12 maiu 2017, Prezidente Liga Nasionál Basketball, Rui Manuel Castro de Perreira, manda proposta orsamentu ho montante $200,000.00 ba apoiu atividade liga nasionál basketball ba iha SEJD Leovigildo da Costa Hornai.

Iha loron 10 jullu 2017, Sekretáriu Estadu Leovigildo da Costa Hornai, aprova proposta referidu ho montante $174,416.00 hosi montante $200,000.00, ne’ebé aprezenta hosi Prezidente Liga Nasionál Basketball (LNB).

Iha loron 20 jullu 2017, Leovigildo da Costa Hornai, aprova commitment and payment voucher (CPV# 000000000201863) ho montante $174,416.00 no iha 27 jullu 2017, Diretór Nasionál prosesa dokumentu payment request ho montante $69,766.40.

Hosi montante orsamentu ne’ebé temi iha leten transfere ba konta bankária Federasaun Nasionál Basketball Timor-Leste, iha etapa daruak; primeira etapa ho montante $69,766.00 ka 40% no  iha 10 agostu 2017, arguida AMI halo levantamentu osan iha banku Mandiri ho montante $69,766.40.
Osan ne’ebé sita apena ezekuta ho montante $61.362,11 no saldu iha montante $8,404.29.

Referidu bá saldu imediatu devolve fila-fali bá kofre Estadu atravéz hosi Banku Sentrál Timor-Leste (BCTL) iha termu artigu 4,4 númeru akordu depois atividade liga depois hala’o kopia ho númeru TPO iha Diresaun Nasionál Administrasaun no Finansas SEJD.

Iha loron 20 jullu 2017 iha segunda etapa Sekretáriu Estadu SEJD aprova mós dokumentu commitment and payment voucher (CPV# 000000000201863) ho montante $174,416.00, bá transferénsia osan ba konta bankária Federasaun Basketball Nasionál Timor-Leste, númeru TL38.0050-6010.0001-3477.861,banku Mandiri, Dili ho montante $104,649.60 ka 60%.

Iha 20 novembru 2017, Diretór Nasionál prosesa dokumentu CPV ho montante $104,649.60 no iha 4 dezembru 2017, Tezouru Nasionál transfere osan ho montante $104,649.60 através ba TOP#17220354 konta bankária federasaun.

Transferénsia osan ho montante globál $174,416.00 ba Federasaun Nasionál Basketball Timor-Leste deskontram 10% ba kustu operasionál ba federasaun.

Ho baze relatóriu liga nasionál basketball Timor-Leste kona-ba utilizasaun orsamentu Estadu liuhosi SEJD iha 2017 gasta ho montante $143.970,49.

Arguida MLJCCG ho AMI falsifika asinatura hanesan ho Prezidente ba Liga Nasionál Basketball Timor-Leste, Rui Perreira de Castro, hodi dezvia osan ho montante $1,757.00 ba benefísiu pesoál.

Arguida MLJCCG ho AMI halo mós pagamentu osan laiha resibu no sein aprovasaun hosi Prezidente Liga Nasionál Basketball Timor-Leste ho montante $4,613.15.

Arguida MLJCCG hanesan kualidade Sekretária Ezekutiva laiha kontrolu no jestaun di’ak ba orsamentu hodi apoiu ba atividade liga nian. Arguida sira loloos la labele halo pagamentu sira kuandu bainhira laiha aprovasaun previa hosi Prezidente liga.

Arguida MLJCCG, AMI ho konjugasaun esforsu ho intensaun atu hetan ho irekesimentu ilejítimu, orsamentu Estadu ba apoiu atividade liga nian ho meiu falsifikasaun ba asinatura hanesan ho Prezidente Liga nian no resibu realiza ho meiu atu hetan osan proveitu própriu.

Arguidu MLJCCG, AMI ho MJCPC ho intensionalmente durante haknaar aan asume funsaun la kontrola orsamentu ne’ebé apoiu ba atividade liga nasionál ne’e adekuadamente no kauza fó prezuiju ba Estadu ho montante globál $6,370.15 ne’ebé laiha justifikasaun ba utilizasaun.

Konsekuénsia direita ne’e arguida MLJCCG, AMI, MLCPC hanesan autór materiál ho forma konsumada ba krime falsifikasaun dokumentu notasaun téknika previstu iha artigu 303 númeru 1 alínea a) iha kódigu penál no krime administrasaun danosa previstu iha artigu 30 ho 274 númeru 2 mezmu diploma.

Hatán ba akuzasaun sira Liu hosi audiénsia julgamentu ne’e, arguida MLJCCG ho AMI konsidera balun loos no balun la loos no loos mak montante orsamentu ne’ebé iha transferénsia hosi SEJD ba liga nian durante etapa daruak.

Arguida sira dehan, normalmente tuir regra prosesuál hafoin orsamentu ne’ebé halo transferénsia ona hosi SEJD ba liga, kuandu halo levantamentu primeiru tenke hatama rekizisaun asinatura aprovasaun CPV, resibu liga nian ne’ebé asina direita hosi tezoreira, Sekretária Ezekutiva no Prezidente LBN.

Hafoin halo levantamentu osan bele gasta ba despeza sira ba atividade liga basketball nian hanesan utiliza kompras sasán hanesan mobiliáriu iha edifísiu, bola, pulsa no sira seluk.

Hafoin ne’e aprezenta relatóriu sira ho nota ne’ebé sosa sasán sira iha loza aprezenta bá SEJD. Tanba ne’e sira konsidera, akuzasaun MP nian katak, sira falsifika asinatura prezidente nian no resibu sira ne’e la loos.

Hafoin rona tiha parte sira Tribunál deside adia fila-fali julgamentu ne’e bai ha loron seluk hodi rona parte sira seluk.

Julgamentu ne’e Ministériu Públiku nu’udar na’in ba asaun penál reprezenta hosi prokuradór Adérito Tilman no arguida sira hetan asisténsia legál hosi advogadu privadu Sergio Lobo, Pedro José Camões, Januário Martins no Câncio Freitas.

Jornalista   : Nelson de Sousa

Editór        : Francisco Simões

 

1 KOMENTÁRIU

HAKEREK NO HATÁN

Please enter your comment!
Please enter your name here