DILI, 06 janeiru 2021 (TATOLI)—Ministériu Turizmu, Komérsiu no Indústria (MTKI) hanesan ministériu implementadór Cesta Bázika ho modalidade distribuisaun voucher iha munisípiu Dili no área urbana seluk, sei koordena ho autoridade lokál atu aplika regra rigór limita benefisiáriu bainhira simu produtu, nafatin kumpre regra Estadu Emerjénsia (EE) da-siak.
Vise-Ministru Turizmu, Komérsiu no Industria, Domingos Lopes Antunes, nota katak benefisiáriu sira ladún kumpre medida EE, tanba ne’e presiza kria mekanizmu ba atividade ne’e.
“Sira hahú halo tuir regra, maibé distansiamentu sosiál laiha nafatin, tanba ne’e ami koodena ho Xefi Aldeia no Xefe Suku sira, inklui loja na’in sira atu haree bainhira distribui iha aldeia ida, ema labele mai hotu maibé bele mai na’in-10, hotu maka seluk bele mai fali,” Vise-Ministru Domingos Lopes hateten bainhira halo inspesaun iha Fortuna Star, Ai-mutin, kuarta ne’e.
Nia konsidera, atividade iha ámbitu implementasaun EE hanesan dezafiu maibé tenke implementa hodi ema hotu hetan direitu hanesan asesu ba programa Governu iha ámbitu rekuerasaun ekonómika.
“Ida-ne’e hanesan dezafiu, funsionáriu inklui líder komunitáriu sira presiza halo serbisu maka’as tanba la’ós fasil,” nia akresenta.
Iha loron 04 dezembru 2020, MTKI ofisialmente halo lansamentu distribuisaun Cesta Bázika ho modalidade voucher iha munisípiu Dili, ba benefisiáriu hamutuk 287.770 iha postu administrativu haat hanesan Dom Aleixo, Cristo Rei, Nain-feto no Metinaro.
Loja sira-ne’ebé fasilita troka voucher ho produtu Cesta Bázika ba benefisiáriu iha Dili hamutuk 15 hanesan Loja Amigu Toos Nain, Loja argrikutór, Leader, Jacinto Supermarket, Lita Store, Lisun Supermarket, Funan Buras, Acelda, Starking May Mart, Fitun, W Four, Maubara no seluk tan.
Jornalista: Natalino Costa
Editora: Julia Chatarina
