Ekipa Médiku Jerál COVID-19 ne’ebé destaka iha Fronteira Batugade, Bobonaro, lori ai-moruk líkidu rega ekipamentu no estudante Timoroan ne’ebé viajen tama Timor-Leste, kinta (02/04/2020). Imajen/Eugénio Pereira

DILI, 06 janeiru 2020 (TATOLI)—Ministériu Saúde, oras ne’e konklui ona prosesu pagamentu kona-ba suplementu remuneratóriu ba profisionál saúde hamutuk 200-resin ne’ebé la konsege simu sira-nia diretu durante pagamentu faze dahuluk nian.

”Faze dahuluk halo pagamentu ba pesoál saúde balun  de’it no balun naran laiha  sira halo reklamasaun no ita konklui ona faze daruak ba sira-nia subsídiu iha primeiru semana segundu semana fulan dezembru nian 2020  no  pagamentu tama ona iha sira-nia konta bankaria,”Diretór Nasionál Orsamentu Jestaun Finanseira Ministériu Saúde, Marcelo Amaral, relata ba jornalista sira iha Ministériu Saúde Caicoli, Dili, ohin.

Notísia Relevante :Suplementu remuneratóriu ba liña frente konklui hotu ona

Pesoál saúde hirak ne’e presta ona servisu iha Munisípiu 12 inklui Rejiaun Administrativa Oe-Cuse Ambeno (RAEOA)durante implementasaun Estadu Emerjénsia ligadu ho COVID-19 iha fulan-marsu to’o maiu 2020.

“Iha na’in ida ka rua mak seidauk satisfas ho osan ne’ebé mak tama iha sira-nia konta bankaria  maibé ami haruka sira hatama segundu reklamasaun nune’e  ita bele haree  no verifika se los  ita halo filafali pagamentu ba sira,”nia hateten.

Suplementu remuneratóriu ne’e fahe ba kategoria tolu maka sira servisu iha liña frente hanesan fatin izolamentu no laboratóriu ho valór sura kada loron $25.

Sira ne’ebé servisu iha kuarentena obrigatóriu $20, no mós $15 ba sira ne’ebé serbisu iha administrasaun ka sira ne’ebé apoiu maibé laiha kontaktu direta.

Ba motorista, forsa, defeza, imigrasaun, kuarentena, alfándega, no sira ne’ebé servisu iha fronteira, aeroportu, portu no terrestre kada loron $15.

Enkuantu ba pesoál água no saneamentu, elétrisidade, limpeza, seguransa sivíl, no pesoál sira rekolla lixu kada loron $5.

Antes ne’e, Ministériu Saúde aprezenta proposta ho totál benefisiáriu hamutuk 3.070 maihusi minisípiu 12 inklui Rejiaun Administrativa Espesiál Oé-cusse Ambeno (RAEOA) ho totál orsamentu hamutuk millaun $3,9.

Entretantu, Prezidente Repúblika, Francisco Guterres Lú Olo, promulga alterasaun dahuluk ba Dekretu-Lei númeru 17/2020, 30 abril, ne’ebé kria suplementu remuneratóriu ba funsionáriu, ajente no traballadór sira iha administrasaun públika iha ámbitu prevensaun no kontrolu COVID-19 durante implementasaun estadu emerjénsia.

Primeira alterasaun ba Dekretu-Lei sei aplika ba implementasaun estadu emerjénsia tutuir malu ne’ebé deklara no renovadu liuhusi Dekretu Prezidente Repúblika númeru 29/2020, 27 marsu, 32/2020, 27 abril no 35/2020, 27 maiu.

Iha Dekretu-Lei dahuluk, 30 abril, temi kategoria traballadóre sira ne’ebé hala’o atividade profisionál ba serbisu prevensaun no kontrolu COVID-19, maibé la temi pesoál sira ne’ebé ezerse funsaun iha sala situasaun iha Centro Integrado de Gestão de Crise, ne’ebé harii ho artigu 29 husi Lei númeru 2/2010, 21 abril, Lei Seguransa Nasionál, ikus mai funsiona hanesan sala situasaun tuir Diploma Ministerial númeru 14/2020, 31 marsu.

Notísia Relevante :Atribuisaun Suplementu Remuneratóriu ba Profisionál Saúde Bazeia Oráriu Serbisu

Jornalista:Felicidade Ximenes

Editór:Agapito dos Santos

HAKEREK NO HATÁN

Please enter your comment!
Please enter your name here