Ministru Justisa, Manuel Cárceres da Costa. Imajen Tatoli/Antonio Goncalves

DILI, 06 janeiru 2021 (TATOLI)-Ministériu Justisa (MJ) ezekuta hotu ona Orsamentu Jerál Estadu (OJE)  2020 nian no iha dezembru liubá husu tan fundu kontinjénsia bá Ministériu Finansa ho montante $100,000-resin hodi sustenta atividade servisu MJ  bá bens servisu, liu-liu iha prizaun.

Notísia Relevante : OJE 2020, MJ ezekuta ona 97%

Ministériu Justisa iha OJE 2020 prevee $11,609,323 hodi aloka bá saláriu vensimentu $4,613,912, bens servisu $6,458,580, kapitál menór $342,830, kapitál dezenvolvimentu $194,000 no transferénsia públika laiha.

OJE 2020 ne’e kontempla sura hosi aplikasaun Orsamentu Dotasaun Temporáriu (DOT) ne’ebé antes ne’e iha rejime duodesimu Ministériu Finansas atribui bá MJ nia ezekusaun mensalmente lao di’ak.

“Ezekusaun OJE 2020  bá MJ haree bá saláriu funsionáriu no bá servisu balun liga bá prizaun nian no mós selu dívida retensaun ba projetu Servisu Nasionál Kadastru  (SNC) nian no restu bá servisu rutina sira seluk,” informa Ministru Justisa, Manuél Cárceres da Costa, ohin, hafoin hasoru malu ho Primeiru-Ministru (PM), Taur Matan Ruak, iha Palásiu Governu, Dili.

Tuir dokumentu livru Planu Asaun Nasionál medida prinsipál setoriál hosi MJ bá tinan fiskál 2021 mak promove  asesu bá justisa, asegura normal funsionamentu ho hadi’a servisu prizionál no reinsersaun sosiál. Nune’e mós promove direitu umanu, fó kontinuidade hosi dezenvolvimentu ba kadastru nasionál iha terras no propriedade, halo levantamentu no aumenta númeru parsela kadastrál iha territóriu nasionál, garante normal funsionamentu no hadi’a servisu rejistu notariadu ho identifikasaun sivíl.

MJ mós kontinua formasaun ba majistradu, defensór públiku no advogadu privadu iha sentru formasaun jurídika no judisiál emporamentu servisu judisiál.

Ho regulamentasaun lei, implementa polítika jéneru, konsentra atribuisaun hotu hosi Governu iha matéria ba reforma judisiária no promove boa governasaun ho jestaun institusionál no ministériu iha servisu hotu dependente.

Hosi medida prinsipál ne’e, Ministériu Justisa iha proposta Orsamentu Jerál Estadu tinan 2021 prevee $15,522,678 inklui $2,067,000 ba implementasaun atividade relasiona ho medida ba planu rekuperasaun ekonómika.

Hosi montante orsamentu $15,522,678 ne’e koloka ba iha saláriu vensimentu $5,208,123, bens servisu $6,943,155 , kapitál minor $753,900, kapitál dezenvolvimentu $550,500 no transferénsia públika $2,067,000.

Alokasaun orsamentál ne’ebé MJ prevee kada programa kona-ba implementasaun asesu ba justisa sei gasta $2,283,156, programa servisu prizionál no reinsersaun sosiál sei gasta $2,993,969, programa direitu umanu sei gasta $132,464, programa jestaun iha terras no propriedade sei gasta $877,128, programa rejistu, notariadu no identifikasaun sivíl sei gasta $2,640,954 , programa konsolidasaun lejizlativa no judisiária sei gasta $1,425,576, programa implementasaun ba polítika jéneru sei gasta $2,830, programa boa governasaun no jestaun institusionál sei gasta $5,151,601 no programa edifísiu públiku sei gasta $15,000.

Ministru Manuel Cárceres hateten, mezmu iha situasaun COVID-19 maibé presiza prepara aan hodi implementa planu asaun nasionál sira ne’ebé ministériu trasa ona.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here