Komunidade iha kapitál Dili, área Comoro, aldeia 30 Agostu, troka voucher ho produtu Cesta Bázika iha supermerkadu Leader, kinta (15/12). Imajen TATOLI/António Gonçalves

DILI, 06 janeiru 2021 (TATOLI)—Jestór loja Leader, Pascoal Suri, rejeita informasaun fornese produtu Cesta Bázika la saudável ba benefisiáriu sira.

Responsável ne’e ko’alia asuntu ne’e relasiona ho keixa ne’ebé hato’o hosi benefisiáriu Cesta Bázika iha aldeia Fomento II, suku Comoro, postu administrativu Dom Aleixo, munisípiu Dili, José da Costa dos Santos, ne’ebé lalin ai-han ba Parlamentu Nasionál inklui imajen ne’ebé hatudu ai-han a’at espalla iha rede sosiál.

“Ami konsidera informasaun ne’e la loos, karik loos ita bo’ot sira bele haree iha fatin no halo investigasaun hodi hatudu,” Jestór loja Leader klarifika hodi hatan ba preokupasaun públiku kona-ba fornese ai-han la saudável, iha Fortuna Star, Ai-mutin, kuarta ne’e.

Notísia Relevante: Benefisiáriu Cesta Bázika hato’o keixa ba PN tanba hahan la saudável

Nia konsidera, benefisiáriu ne’ebé lori  produtu Cesta Bázika ba Parlamentu  ne’e laiha evidénsia.

“Ita ko’alia de’it laiha bukti ida, ha’u nunka taka odamatan ba mídia sira atu labele tama no nunka taka odamatan ba institusaun ida labele tama. Ha’u mós hakfodak ho sasán ne’ebé mosu,  ami loke tuku 10:00 maibé sasán ne’e mosu iha rede sosiál tuku 09:00, ne’e mai hosi ne’ebé?,” Pascoal Suri lamenta.

Tanba ne’e, nia husu Autoridade inspesaun no Fiskalizaun Atividade Ekonómika, Sanitária no Alimentár (AIFAESA) atu halo fiskalizaun hodi bele hatene.

Tuir Responsável loja ne’e, benefisiáriu sira bainhira mai troka voucher ho produtu, sira rasik maka hili sasán iha instalasaun.

“Impossível sasán  sira reklama dehan a’at, ne’e laiha lójika tanba sasán sira ne’e, sira rasik maka hili. Se reklama a’at karik tanba sa maka la hatudu ba ha’u haree. Sasán a’at karik lalika foti, hatudu ba ami no ami prontu troka,” nia akresenta.

Nu’udár kompañia fornesedór Cesta Bázika, Jestór loja ne’e dehan, sira nia parte tuir de’it orientasaun ne’ebé Ministériu Turizmu, Komérsiu no Indústria (MTKI), inklui kumpre medida Estadu Emerjénsia da-siak.

Iha fatin hanesan, Koordenadór Jerál  AIFAESA, Abílio Oliveira Sareno, hateten kona-ba ai-han la saudável ne’e invetigasaun maka bele justifika.

“Bainhira ita seidauk hetan autór ne’e, oinsá ita bele dehan buat ne’e loos ka la loos , hafoin hetan asaun ne’e krime maka ita entrega autoridade kompetente maibé la krime bele konvoka ba gabinte kontra relasaun AIFAESA hodi halo tuir prosedimentu ne’ebé vigora,” nia dehan.

Tuir Koordenadór, bainhira informasaun ne’e loos duni maka AIFAESA sei fó sansaun ba fornesedór produtu tanba bainhira mosu fallansu autoridade nunka taka matan no sempre atua tuir lei.

“Lei determina katak tenke foti altu, tenke foti no tenke hetan sansaun tenke hetan, tanba ne’e ami halo tuir lei. AIFAESA hetan indísiu dehan sala, la’ós de’it haree publikasaun ami atua kedan maibé gabinete jurídiku AIFAESA sei haree no bolu sira atu presta deklarasaun responsablidade, ba loja ka entidade seluk ne’e hanesan prosedimentu normál,” nia esplika.

Iha fatin hanesan, Vise-Ministru Turizmu, Komérsiu no Indústria, Domingos Lopes Antunes, hateten nia parte hakfodak bainhira simu informasaun katak loja Leader hanesan fornesedór  Cesta Bázika fornese ai-han ladún di’ak ba komunidade.

“Ha’u rona informasaun hosi rede sosiál no ami kontaktu kedan AIFAESA hamutuk ho ami-nia funsionáriu halo kedan inspesaun no sasán ne’ebé lori ba Parlamentu haree ba saku maihosi Leader, loja na’in mós buka tuir no husu tuir, konkluzaun maka benefisiáriu ne’e mai foti sasán iha ne’e duni maibé loron hirak liubá,” nia esplika.

Governante ne’e nota, benefisiáriu balun foti ai-han laiha konjeladór hodi tau no rai iha li’ur de’it, la konsumu to’o a’at maka lori ba Parlamentu.

“Iha loja ho modalidade voucher, kosumidór sira hili rasik sasán ne’ebé maka hakarak ho valór $50 ba ema ida. Ha’u hanoin voucher ne’e se ita-nia família na’in-10, ita la presiza foti dala-ida, maibé foti fali aban ka bain-rua di’ak liu,” nia hatutan.

Biban ne’e, Vise-Ministru klarifika kestaun membru família balun la simu voucher bazea ba dadus ne’ebé maka parte Ministeriu Administrasaun Estatál (MAE) fó ba ministériu implementadór sira tanba seidauk rejista.

“Antes ne’e ami esplika ona ba ita-nia Xefe Suku no Xefe Aldeia sira, ema balun ne’ebé seidauk tama lista, imi kontinua rejistu ba lista, ne’e maka ohin loron sira simu produtu Cesta Bázika hotu,” nia esklarese.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here