Primeiru-Ministru, Taur Matan Ruak, sorumutuk ho Líder PD, iha Palásiu Governu, kuarta (06/01). Imajen TATOLI/Egas Cristovão

DILI, 06 janeiru 2021 (TATOLI)—Líder Partidu Demokrátiku (PD) lideradu hosi Prezidente partidu, Mariano Assanami Sabino, akompaña mós hosi kuadru partidu hanesan Adriano do Nascimento, António da Conceição ‘Kalohan’, hasoru malu ho Primeiru-Ministru (PM), Taur Matan Ruak.

Prezidente PD haktuir, enkontru ne’e hodi felisita PM no ninia membru Governu tomak ba Natál no tinan foun 2021 inklui saida mak importante liu ba Estadu.

Prezidente PD, Mariano Assanami Sabino, akompaña ho kuadru partidu, dada-lia ho mídia nasionál sira, hafoin hasoru malu ho Primeiru-Ministru, Taur Matan Ruak, iha Palásiu Governu, kuarta (06/01). Imajen TATOLI/Egas Cristovão

“Iha reuniaun ne’e ko’alia kona-ba saida mak importante ba Estadu iha tinan 2021. Buat balun ne’ebé liu ne’e liu ona, agora tenke tau enerjia no forsa hamutuk atubele nafatin asegura ita-nia rain no fó garantia ba estabilidade povu no nasaun,” atuál Deputadu Bankada PD ne’e relata hafoin ramata reuniaun ho Xefe ezekutivu iha Palásiu Governu, kuarta ne’e.

Tuir líder partidu ne’e, PD kaer nafatin prinsípiu ida katak ‘ba Timor-Leste PD no maubere-oan prontu serví’, tanba ne’e mak hatudu ona iha Parlamentu Nasionál ho kompromísiu hodi fó apoiu votu iha Orsamentu Jerál Estadu, pedidu autorizasaun deklarasaun Estadu Emerjénsia, inklui proposta lei importante seluk, maski daudaun hanesan bankada opozisaun.

“Ami haree katak iha situasaun difísil ne’ebé povu mós iha situasaun difísil no krize globál COVID-19, PD mantein ninia prinsípiu hakarak hamutuk atu hasoru krize ida-ne’e no mós hamutuk hakotu impase polítika no normaliza funsionamentu instituisaun demokrátiku,” Assanami subliña.

Nune’e mós, normaliza ekonomia maski hasoru situasaun difísil ho ekonomia seidauk la’o normál maibé PD kontribui no prontu apoia ba situasaun sira-ne’e.

Jornalista: Antónia Gusmão

Editora: Julia Chatarina   

HAKEREK NO HATÁN

Please enter your comment!
Please enter your name here