Komunidade iha kapitál Dili, área Comoro, aldeia 30 Agostu, troka voucher ho produtu Cesta Bázika iha supermerkadu Leader, kinta (15/12). Imajen TATOLI/António Gonçalves

DILI, 06 janeiru 2021 (TATOLI)–Kompañia ne’ebé durante ne’e halo kontratu ho Sekretária Estadu Kooperativa (SEKoop) atu fornese produtu Cesta Bázika ba komunidade, husu atu halo pagamentu tuir akordu ho Governu.

“Ami hatama ona invoice maibé tanba saida mak prosesu pagamentu ne’e kle’ur loos, Se prosesu ne’e kle’ur, afeta ba ami-nia prosesu distribuisaun no mós prosesu atu rekolla filafali produtu lokál. Tanba ne’e, ami husu ba SEKoop tenke fasilita ami ho pagamentu ida lalais,” Diretór kompañia Green Mota-ain, Domigos Soares Pereira, hateten, hafoin enkotru avaliasaun ho SEKoop hodi avalia serbisu kompañia fornesedór Cesta bázika iha edifísiu Federasaun Hanai Malu, Bairro Pité, kuarta ne’e.

Notísia Relevante: Aprovizionamentu akizisaun produtu Cesta Bázika uza modalidade adjudikasaun direta

Diretór ne’e mós ladún satisfáz tanba Governu liuliu Ministériu Koordenadór Asuntu Ekonómiku (MKAE) halo ona pagamentu ba kompañia sira ne’ebé haki’ak manu no seluk tan, enkuantu kompañia ne’e rasik seidauk hetan pagamentu.

Hatan ba preokupasaun ne’e, Diretór Jerál SEKoop, Domigos Xavier, hateten pagamentu la’o hela.

“Kona-ba pagamentu ne’e responsabilidade Estadu ninian no sei halo pagamentu ba kompañia sira ne’ebé maka halo ona distribuisaun. Prosesu ne’e agora la’o hela no iha tempu badak sei halo pagamentu,” nia promete.

Bazeia ba artigu 9 dekretu-lei númeru 48/2020, 07 outubru, kona-ba medida apoiu família, atribuisaun Cesta Bázika, kona-ba akizisaun produtu no embalajen produtu bazeia ba distribuisaun Cesta Bázika obdese ba rejime jurídiku aprovizionamentu no kontratu públiku, independente, ho valór ne’ebé korrespondente.

Enkuantu aprovizionamentu sei realiza hosi ministériu implementadór programa hanesan Gabinete MKAE, Ministériu Turizmu, Komérsiu no Indústria (MTKI), Ministériu Agrikultura no Peska, SEKoop, Sekretaria Estadu Ambiente (SEA) inklui Autoridade Rejiaun Administrativa Espesiál Oé-cusse Ambeno (RAEOA).

Enkuantu, Governu ajudika direta ba kompañia fornesidór ho regra, ne’ebé tenke iha justifikasaun klaru, iha kapasidade finaseiru no prontu implementa iha korridór legál liuliu transparénsia.

Aleinde ne’e, kompañia fornesedór ne’e kontrata direta hosi kada minstériu implementadór, la’ós de’it MAKE ne’ebé hanesan koordenadór Governu ba programa Cesta Bázika.

Governu fó konfiansa ba setór privadu atu asume resposabilidade no garante katak sasán ba benefisiáriu korrespondente ho montante ka osan ne’ebé temi.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here