Motorista mane-ida sofre kanek grave hafoin ho motór soke karreta ida iha área Bebora, Dili. Imajen/PNTL

DILI, 06 janeiru 2021 (TATOLI)- Joven mane-ida tenke evakua urjente ba Ospital Nasionál Guido Valadares (HNGV) tanba sofre kanek grave iha asidente ne’ebé akontese, ohin, madrugada, purvolta tuku 03:12 Otl, iha estrada  Eskola Infantíl São Carlos, Bebora, Dili.

Notísia Relevante : Durante simu tinan foun, Polísia Dili rejistu kazu 50

Joven ne’e lori motór   Honda Revo Fit  kór metan ho xapa matrikula K-6249 soke karreta ida hodi rezulta nia kabas-sorin sofre maka’as.

“Kauza hosi asidente ne’e, ami la bele fó sai, sei iha prosesu investigasaun.  Joven ne’ebé lori motór sofre kanek grave iha hela ospitál,” Segundu Komandante PNTL Munisípiu Dili, Superintendente Euclides Belo, ohin, informa  ba jornalista iha Komandu PNTL, Dili.

Polísia Tránzitu Dili nota iha fatin akontesimentu vítima ho motór halai ho velosidade derrepente soke karreta ida hodi rezulta vítima nia ulun pankada maka’as iha karreta nia isin-lolon.

Hafoin akontesimentu, komunidade Bebora kontaktu kedas polísia hodi bolu ambulánsia evakua vítima ba hala’o tratamentu intensivu iha HNGV.

PNTL mós halo kedas apreensaun ba karreta inklui foti deklarasaun hosi motorista ida ne’ebé lori karreta hodi halo investigasaun.

Komandu PNTL Dili, kontinua alerta ba abitante sira bainhira viajen ho transporte tenke neineik hodi evita asidente tráfegu.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here