Prezidente Konsellu Administrasaun BTL, E.P. Imajen/Espesiál

DILI, 06 janeiru 2021 (TATOLI)–Governu liuhosi reuniaun Konsellu Ministru (KM) delibera hodi nomea Carlos Peloi dos Reis, nu’udar Prezidente Konsellu Administrasaun (KA) Bee Timor-Leste, Empreza Públika (BTL,E.P), ba mandatu tinan haat.

Proposta ne’e aprezenta hosi Ministru Obra Públika, Salvador Eugênio Soares dos Reis Pires, no hetan aprovasaun iha KM.

Notísia Relevante: KM Aprova  Dekretu-Lei Transforma DGAS ba Empreza Públika

“Carlos Peloi dos Reis individu ida-ne’ebé iha esperiénsia serbisu tinan barak no ninia formasaun akadémika kualifikada, hasai mestradu iha bio enjeñaria no durante tinan barak serbisu iha jestaun rekursu bee ho parseiru internasionál ho instituisaun rai-laran,” Ministru Prezidénsia Konsellu Ministru, Fidelis Manuel Leite Magalhães, informa hafoin ramata reuniaun ezekutivu iha Palásiu Governu, kuarta ne’e.

Aleinde ne’e, Prezidente KA antes ne’e fó mós asesoria ba eis Prezidente Repúblika, Taur Matan Ruak, ba asuntu bee.

“Tanba ne’e Governu laiha dúvida ba esperiénsia pesoál, grau akadémiku, no área koñesementu,” nia akresenta.

Antes ne’e, Governu hola inisistiva atu transforma Diresaun Jerál Água no Saneamentu (DGAS, sigla portugés) ba Empreza Públika (BTL,E.P) ho hanoin ida atu hasa’e prestasaun servisu no atendimentu ba konsumidór bee-moos iha Timor-Leste.

Aleinde ne’e, estabelese mós identidade Reguladór  Água no Saneamentu no dekretu-lei estabelese kritériu ba kontrolu kualidade bee hodi bele uza ba konsumu umanu.

Dekretu-Lei iha ártigu 15, fó dalan ba Ministériu Obra Públika (MOP) atu estabelese komisaun instaladora, maibé komisaun refere sei funsiona hafoin Prezidente Repúblika promulga dekretu-lei.

Entretantu, komisaun instaladora sei prepara regulamentu hotu hodi iha janeiru 2021, DGAS bele opera ona hanesan empreza estatál.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here