Komunidade iha kapitál Dili, área Comoro, aldeia 30 Agostu, troka voucher ho produtu Cesta Bázika iha supermerkadu Leader, kinta (15/12). Imajen TATOLI/António Gonçalves

DILI, 06 janeiru 2021 (TATOLI)—Daudaun ne’e parte Ministériu Turizmu, Komérsiu no Indústria (MTKI), ne’ebé responsável ba distribuisaun Cesta Bázika ho modalidade voucher, hahú monitoriza no halo avaliasaun atu hadi’a di’ak liután mekanizmu distribuisaun hodi kumpre medida Estadu Emerjénsia (EE) da-siak ne’ebé mensiona labele halibur liu ema barak iha fatin ida.

“Governu la suspende Cesta Bázika, maibé hadi’a de’it mak mekanizmu distribuisaun hodi bele halo prevensaun ba COVID-19,” Ministru Turizmu, Komérsiu no Indústria, José Lucas do Carmo da Silva, informa iha Palásiu Governu, kuarta ne’e.

Notísia Relevante: Alterasaun medida EE, bandu halibur liu na’in-10 exetu pertense família

Governante ne’e rekoñese katak ezekutivu sira hamosu ona dekretu-lei ne’ebé hateten labele halibur ema liu na’in-10, maibé la bandu atividade iha ámbitu rekuperasaun ekonómika ne’e.

“Ita foti ona medida apropriadu ba prevensaun COVID-19 iha distribuisaun produtu. Nune’e, ita implementa ona iha terrenu hamutuk ho ajente Ministériu Saúde inklui PNTL atu garante benefisiáriu matein distánsia sosiál no uza maskára, maibé nafatin iha benefisáriu balun maka la kumpre definisaun jerál Estadu Emerjénsia, liuliu distásiamentu fízika,” Ministru esplika.

EE iha faze da-siak abranje iha territóriu nasionál tomak no hahú vigora husi tuku 00:00 loron 03 janeiru 2021 to’o tuku 23:59 loron 01 fevereiru 2021.

Iha sorin seluk, Ministru Koordenadór Asuntu Ekonómiku, Joaquim Amaral, hateten iha medida EE da-siak ne’ebé aprovadu iha reuniaun Konsellu Ministru, Governu la suspende programa distribuisaun.

“Dekretu-lei la dehan suspende distribuisaun Cesta Bázika. Tanba ne’e, ita tenta maneja espasu ne’ebé lei fó atu atividade ne’e bele la’o nafatin no loke oportunidade hodi ema hotu bele simu ai-han,” Ministru Joaquim hateten, iha Palasiu Governu, kuarta ne’e.

Tuir governante ne’e, daudaun ministériu implementadór sira esforsu serbisu hamutuk ho Ministériu Saúde inklui Polísia Nasionál Timor-Leste (PNTL) atu jere oinsá benefisiáriu sira bele kumpre nafatin distánsia fízika no uza máskara bainhira ba forma simu produtu Cesta Bázika ho modalidade voucher iha munisípiu Dili.

Antes ne’e, Komandu Jerál PNTL alerta ba kompañia nasionál sira ne’ebé fahe produtu ai-han iha kapitál Dili no munisípiu sira, tenke obedese ba regulamentu EE hodi kontribui ba prevensaun surtu.

Ministériu implementadór programa hanesan Gabinete Ministériu Koordenadór no Asuntu Ekonómiku (MKAE), MTKI, Ministériu Agrikultura no Peska, Sekretaria Estadu Kooperativa (SEKoop), Sekretaria Estadu Ambiente (SEA) inklui Autoridade Rejiaun Administrativa Espesiál Oé-cusse Ambeno (RAEOA).

Aleinde ne’e, ministériu implementadór sira husu tulun instituisaun sira hanesan Provedoria Direitu Umanu no Justisa (PDHJ, sigla portugés), Komisaun Antí-Korrupsaun (CAC, sigla portugés) no Organizasaun Naun Governamentál (ONG) inklui populasaun tomak atu ajuda kontrola no tau matan ba programa atu la’o ho susesu.

Jornalista: Florêncio Ximenes

Editora: Julia Chatarina

HAKEREK NO HATÁN

Please enter your comment!
Please enter your name here