Ministru Prezidénsia Konsellu Ministru, Fidelis Manuel Leite Magalhães. Imajen TATOLI/Egas Cristovão

DILI, 06 janeiru 2021 (TATOLI)–Durante períodu implementasaun Estadu Emerjénsia (EE) dahuluk to’o da-siak, Governu observa katak populasaun Timor-Leste kumpre medida prevensaun COVID-19 di’ak liu kompara ho nasaun sira seluk iha mundu.

Ministru Prezidénsia Konsellu Ministru, Fidelis Manuel Leite Magalhães, louva no apresia vontade populasaun ne’ebé aas tebes hodi kumpre orden hosi entidade ezekutivu.

“Ha’u pesoalmente diskorda katak sidadaun sira la kumpre regra Estadu Emerjénsia. Tanba ita haree iha fatin-fatin sidadaun sira kumpre, ezemplu iha loja no eventu importante sira, ema hotu kumpre liuliu hanesan fase liman, uza máskara. Ida-ne’e hatudu katak ita hotu kumpre,” Ministru Fidelis hateten iha Palásiu Governu, kuarta ne’e.

Governante ne’e rekoñese katak populasaun kolabora di’ak ho Governu iha luta kombate vírus ne’e.

“Lalika taridu no sente katak buat hotu ne’ebé ita halo ne’e a’at de’it no nasaun seluk ne’e sempre di’ak liu ita. Ne’e la loos, tanba dadus mós hatudu katak país dezenvolvidu sira-nia sidadaun barak mate ne’e tanba preokupasaun menus,” nia rekoñese.

Ministru nota katak Timor-Leste nu’udár nasaun demokrátiku ne’ebé ninia atuasaun dahuluk mak konsiensializasaun.

“Timór ne’e sempre iha hanoin ida katak, ema seluk sempre di’ak liu ita to’o diskusaun nível polítika mós barak dehan, nusa Timór labele aprende ho Indonézia. Iha kazu ida-ne’e importante ba sidadaun sira atu hatene katak, nasaun sira seluk mak devia aprende hosi ita, la’ós ita mak aprende hosi sira. Tanba realidade to’o agora númeru ema mate seidauk iha no transmisaun lokál mós seidauk iha,” nia subliña.

Ezekutivu ne’e fó ezemplu, kazu konkretu ne’ebé to’o loron boot Natál no tinan foun, Timor-Leste iha previléjiu bele selebra ho família, maibé haree fali ba nasaun barak iha mundu, tinan tomak ne’e sira labele sai no akompaña eventu importante sira kilometru lima hosi uma, to’o balun lockdown no labele sai hosi uma-laran.

“Ha’u hatene ita-nia sidadaun sira dala barak tau iha kauza, tanba demokrasia ne’ebé hotu husu pergunta. Notísia falsa mós espalla barak, maibé importante atu apela ba sidadaun hotu mak ita-nia situasaun. Pelu kontráriu ita devia sai ezemplu ba nasaun seluk,” nia apela.

Iha kontestu ne’e, portavós  Governu ne’e konsidera papél mídia nian importante hodi sosializa ba sidadaun sira kona-ba prevensaun surtu ne’e.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here