Líder nasionál, Kay Rala Xanana Gusmão foto hamutuk ho responsável no labarik sira iha Centro Miguel Magone hafoin entrega transporte. Imajen/Mídia Fundasaun Xanana Gusmão

DILI, 05 janeiru 2021 (TATOLI)–Líder nasionál, Kay Rala Xanana Gusmão, fó apoiu transporte mikrolete ida ba uma-mahon Centro Miguel Magone iha Balide, Dili.

Tuir nota ne’ebé Agência TATOLI asesu, apoiu transporte ne’e hanesan responsabilidade morál nu’udar líder nasionál ida bainhira rona halerik sidadaun sira.

Iha ámbitu Natál, hamutuk ho seminarista sira iha semináriu menór Balide, labarik lubun ne’ebé hamahan-an iha sentru ne’e hakbesik-an ba Xanana hodi aprezenta problema ne’ebé sira enfrenta.

“Ha’u agradese tebes ba funsionáriu sira hosi uma-mahon ne’e tanba bele dada ha’u iha semináriu menór iha loron 27 dezembru 2020, atu mai haree rasik ho matan kondisaun labarik sira iha ne’e. Ha’u apresia no elojia tebes dedikasaun hotu iha ne’e hodi tau-matan ba labarik sira-ne’ebé presiza tebes tulun no atensaun,” mensajen Xanana Gusmão ne’ebé lee hosi  Presidente Ezekutivu Centro Miguel Magone, Damião da Silva, iha semináriu menór, Balide tersa ne’e.

Hafoin rona preokupasaun, eis Primeiru-Ministru ne’e foti kedas asaun hodi fó apoiu nesesidade hanesan ai-han, toba fatin no seluk tan, liuhosi nia fundasaun rasik, Xanana Gusmão apoiu mós transporte (mikrolete), ne’ebé hakerek naran ‘Centro Miguel Magone (Fundação Xanana Gusmão)’ hodi fasilita tula labarik sira.

Líder karizmátiku ne’e iha esperansa katak ho doasaun ne’e sei tulun movimentasaun labarik sira ba eskola no mós fatin seluk.

Iha biban hanesan, nia mós dezafia funsionáriu iha uma-mahon atu nafatin dedika-an hodi proteje direitu labarik ne’ebé konsagra ona tuir lei.

“Ha’u husu ba imi hotu iha fatin ne’e, atu dedika-an nafatin hodi proteje labarik sira tuir direitu fundamentál ne’ebé imi defende. Ha’u husu ba Maromak fó tinan foun 2021 ne’ebé kmanek tebes ba ita hotu,” tenik Xanana ho esperansa.

Iha biban hanesan, Diretór Presidente Ezekutivu Centro Miguel Magone, Damião da Silva, hato’o agradesementu ba apoiu  tanba bele fasilita labarik sira.

“Apoiu Maun Bo’ot Xanana Gusmão ne’e importante tebes atu tulun deslokasaun labarik sira nian. Tanba ne’e, promete sei utiliza ho responsabilidade hodi bele fasilita,” responsável ne’e dehan.

Uma-mahon ne’e eziste iha tinan 1997 no hahú funsiona iha tinan 2000 to’o agora, daudaun akumula labarik hamutuk 79, kompostu hosi mane 12 no  feto 67, ne’ebé mai husi munisípiu 12 inklui Rejiaun Administrativa Espesiál  Oé-cusse no Ambenu (RAEOA).

Nune’e mós, halo akonsiliasaun ba labarik sira-ne’ebé sai vítima ba kazu violénsia  jéneru liuhosi rekuperasaun mentalidade inklui fasilita formasaun formál no naun formál ba hirak ne’ebé hamahan-an iha sentru ne’e.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here