Transportasaun mákina pezadu hosi Dili-Suai ho karga hamutuk 38, ba preparasaun perfurasaun mina-matan iha Kosta Sul. Imajen/Timor Resources

DILI, 05 janeiru 2021 (TATOLI)–Kompañia Timor Resources Pty.Ltd hatama tan pedidu ba Governu atu fó autorizasaun daruak ba tékniku sira hosi Indonézia bele mai Timor-Leste (TL) mobiliza mákina fura mina-matan iha rai maran Kosta Súl.

“Ita prepara hela hodi sumbete tan pedidu ba Ministériu Negósiu Estranjeiru no Kooperasaun (MNEK) atu fó autorizasaun ba ekipa tékniku balun hosi Indonézia, halo mobilizasaun no instalasaun ba mákina perfurasaun,” Jestór Operasaun Timor Resources, Luís Pereira, hateten ba Agência TATOLI via telefónika, tersa ne’e.

Tuir Jestór ne’e, pedidu dahuluk MNEK autoriza ona ekipa tékniku no jestór na’in-10 hosi Indonézia tama mai Timor-Leste iha novembru 2020.

“Ami-nia ekipa na’in-10 mai kumpre regra Estadu Emerjénsia, liuliu regra prevensaun hodi hela iha kuarentena durante loron-14 iha Suai liuhosi kooperasaun entre empreza ho ekipa saúde vijilánsia,” nia akresenta.

Kona-ba pedidu daruak, Luís Pereira husu nafatin ba MNEK atu fó autorizasaun fasilita ekipa tékniku sira bele mai tan hosi Indonézia, tanba tékniku sira hosi  Estadu Unidu Amérika laiha autorizasaun.

Nia dehan, presiza tebes ema kumpre regra EE, liuliu protokolu Organizasaun Mundiál Saúde hodi prevene COVID-19.

“Ami mós lakohi atu sira lori vírus mai Timor-Leste, tanba ne’e ekipa tékniku na’in-10 ne’e kumpre duni regra prevensaun COVID-19 no bainhira mai tan tenke kontinua kumpre,” Diretór Luis afirma.

Jornalista: Florêncio Ximenes

Editora: Julia Chatarina

HAKEREK NO HATÁN

Please enter your comment!
Please enter your name here