Logotipu TDD. Imajen Tatoli/Egas Cristóvão.

DILI, 05 janeiru 2021 (TATOLI)-Tribunál Distritál Dili (TDD) kontinua adia julgamentu bá  prosesu kazu ne’ebé deskonfia hamosu infrasaun iha adjudikasaun direita   bá projetu demolisaun uma Estadu ne’ebé envolve hosi arguidu Bendito Freitas, eis Sekretária Estadu Formasaun Profisionál no Empregu (SEFOPE) ho emprezáriu lokál lubuk ida tan.

Notísia Relevante : Bendito Freitas ho diretór kompañia 12 sai arguidu iha Tribunál

Juiza prosesuál Albertina Neves, hateten, tuir lei bá prosesu julgamentu  foun ne’ebé hahú  hala’o  presiza arguidu hotu ne’ebé notifikadu tenke marka prezensa,  maibé bá prosesu ne’e iha arguidu na’in-15 maibé ida la marka prezensa.

“Nune’e, ha’u deside adia fila-fali julgamentu ne’e bá iha loron  09 fevereiru 2021 iha tuku 14:30 Otl,” pronunsia Juiza Albertina Neves iha sala audiénsia, ohin.

Arguidu  ne’ebé la marka prezensa tanba ho razaun família (bin-rasik) mak mate, no  ohin dadeer arguidu marka prezensa iha TDD hodi hato’o ona informasaun refere ba Tribunál no Tribunál husu ba arguidu atu hein uitoan hodi hein julgamentu hahú arguidu partisipa tiha mak fila, maibé momentu ne’e audiénsia mós seidauk la’o nune’e arguidu hein kleur no konsege fila-fali ba uma.

Prokuradora, Lidia Soares, hateten adiamentu bá prosesu kazu ne’e bá-dala tolu ona, tanba ne’e,  Ministériu Públiku (MP) hato’o rekerimentu bá Tribunál koletivu atu halo alterasaun ba medida koasaun Termu Identidade Rezidénsia (TIR) ne’ebé antes ne’e aplika ona bá arguidu sira  atu aplika fila-fali medida koasaun prizaun preventiva tanba haree ba krime ne’ebé MP imputa ba arguidu sira ho moldura penál boot nune’e bele asegura prosesu tanba adia beibeik ona.

Parte defeza la aseita ho rekerimentu MP nian tanba ho situasaun inserteza no arguidu hetan dezastre nune’e labele marka prezensa tanba ne’e presiza konsidera  hodi haree kondisaun sira.

Hafoin rona tiha parte sira, Juiza Albertina Neves, dehan tuir regra prosesuál bá arguidu ne’ebé notifikadu ona la marka prezensa sei hetan sansaun hanesan kondena multa ho aplika medida detensaun.

Iha prosesu julgamentu ne’e arguidu na’in-14 hetan asisténsia legál hosi advogadu privadu, José Pedro Camões, Sergio Lobo, Januario Martins, João Ndun, Cancio Freitas ho defensór públiku na’in-rua.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here