Nilda Romana. Imajen Tatoli/Hortencio Sanchez

DILI, 05 janeiru 2021 (TATOLI) – Nilda Romana, sai hanesan jogadora xave iha klube Buibere FC ne’ebé hetan prestasaun “brillante” hanesan best player iha Liga Feto Timor (LFT) 2020 ne’ebé organiza hosi Federasaun Futeból Timor-Leste (FFTL).

Notísia Relevante : Buibere kampiaun tasa Rosa “Muki” Bonaparte

Tasa best player 2020. Imajen Tatoli/Hortencio Sanchez

Nilda “Buibere” la espera hosi inísiu jogu LFT “Tasa Rosa Muki Bonaparte” to’o finál, nia bele hetan “títulu” best player ka mellor jogadora. Bá-nia jogu ne’ebé nia hatudu iha kampu-laran hodi kedok bola-kabuar sei iha faze aprende de’it no buka manan esperiénsia.

Iha tinan ikus 2020 nian, FFTL hola inisiativa kria Liga Feto Timor (LFT) ne’ebé hetan apoiu moral no material  hosi FIFA (International Federation of
Association Football) no Asian Football Confederation (AFC).

Iha jogu LFT ne’e partisipa hosi klube futeból feminina 11 kompostu hosi klube Maranatha, S’Amuser, AD. SLB Laulara, Buibere FC, Academica, VDL FC, ASS. Baucau, Nain-Feto, São José FC, Maudoko FC no UNITAL FC.

Nilda “Buibere” ho númeru kamizola 13, nu’udar jogadora iha pozisaun médiu. Nia nunka hanoin iha nia neon-laran katak nia mak sai hanesan best player 2020, maibé to’o jornada jogu  LFT termina no klube Buibere sai hanesan kampiaun, maka  Nilda nia naran anunsia kedas hosi FFTL hanesan best player.

“Ha’u agradese tanba bele sai hanesan best player iha LFT 2020 ne’ebé foin hala’o primeira vez iha ita nia nasaun,” Nilda “Buibere” hateten bainhira dada-lia ho Agência Tatoli, ohin, iha edifísiu FFTL, Dili.

Ho “títulu”  ne’e, oan-feto hosi Albertino da Costa dos Reis no Jaquelina da Silva Carvalho, merese  bá prémiu FFTL osan  $750,00 ho tasa best player 2020.

Nilda Romana hahú envolve iha jogu futeból feminina  ho idade tinan 12, ne’ebé nia hahú jornada iha mundu futeból  iha klube AD. SLB Laulara.

Hosi Laulara, Nilda “hijra” fali ba Maudoko FC no ikus metin iha Buibere FC to’o ohin loron.

“Ha’u sei esforsu treinu nafatin hodi mantein nafatin hanesan best player hodi fó kontribuisaun ba ha’u nia klube,”  hateten jogadora ho idade tinan 20 ne’ebé daudaun ne’e enfrenta hela nia estudu iha Fakuldade Direitu,  Universidade  Nasionál Timor Lorosa’e (UNTL).

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here