DILI, 05 janeiru 2021 (TATOLI)-Ministériu Públiku (MP) hosi janeiru to’o dezembru 2020, finaliza prosesu krime hamutuk 5.547.
Prokuradór Jerál Repúblika (PJR), José Ximenes, informa MP rejista prosesu krime ne’ebé tama iha 2020 ho totál 4.958 iha nivel nasionál no finaliza 5547 ne’ebé iha redusaun 500-ital prosesu no kazu sira-ne’e ho tipu barak liu mak ofensa integridade fízika simples, violénsia doméstika, furtu, danu, abuzu konfiansa, burla ho sira seluk.
“Ida-ne’e balansu jerál durante 2020. Mas tanba sei hato’o informasaun iha Parlamentu Nasionál entaun ha’u labele adianta barak liu,” Prokuradór Jerál Repúblika (PJR), José Ximenes, ba jornalista, ohin, hafoin enkontru ho Prezidente Repúblika (PR), Francisco Guterres “Lú-Olo’’iha Palásiu Prezidensiál, Dili.
Nia hateten, iha dezembru 2020 iha Dili rejista númeru kazu ki’ik hamutuk 176 no iha munisípiu rejista de’it 400-ital prosesu ne’ebé tama kompara ho fulan novembru ho setembru nian.
“Daudaun iha prosesu kazu 2.823 mak sei pendente, ida ne’e hatudu balansu pozitivu,” PGR José Ximenes hateten.
Prezidente Repúblika, Francisco Guterres “Lú-Olo’’ kontinua apoiu servisu MP nian iha 2021 hodi hala’o servisu di’ak liután hodi serve Estadu.
Xefe Estadu hato’o parabens ba servisu MP nian ne’ebé atinje ho di’ak tebes no dezafiu barak mak MP hasoru husu atu kontinua firme hodi kumpre didi’ak nia misaun sira.
Jornalista : Nelson de Sousa
Editór : Francisco Simões
