DILI, 05 janeiru 2021 (TATOLI)—Xefe Gabinete Kontrolu Kualidade Ospitál Nasionál Guido Valadares (HNGV-sigla portugés), Sara Maria Xavier, hateten HNGV la fó autorizasaun ba públiku atu kura pasiente ho kualker maneira iha sala internamentu HNGV nian.
“Ami halo klarifikasaun pesoál balun ne’ebé mai halo tratamentu tradisionál ba pasiente sira mak baixa iha HNGV ne’ebé mak akontese iha loron feriadu foinlalais ne’e,” nia hateten ba jornalista sira iha HNGV, Dili, tersa ne’e.
Nia dehan bainhira família pasiente ka pasiente hakarak hetan tratamentu ho ai-moruk tradisionál depois alta iha sala internamentu.
“Tratamentu ne’ebé mak ami fó ba pasiente sira iha HNGV ne’e baseia ba evidensia klíniku se karik iha família ruma ka pasiente rasik hakarak uza ai-moruk tradisionál depois alta tiha ba uma mak halo tratamentu tradisionál maibé durante pasiente baixa iha HNGV ami sei la-autoriza atu halo tratamentu tradisionál,’’ nia informa.
Sara deklara HNGV sei la responsabiliza ba pasiente bainhira akontese kazu grave ruma hafoin halo tratamentu tradisionál.
“Fó hanoin ba família sira no pasiente sira katak durante baixa HNGV labele simu tan tratamentu tradisionál tanba ita la hatene mosu komplikasaun ruma ita labele responsabiliza,” hatutan tan.
Jornalista :Felicidade Ximenes
Editór:Agapito dos Santos
