Mikrolete iha Kapitál Dili. Imajen TATOLI/António Gonçalves

DILI, 05 janeiru 2021 (TATOLI)—Diresaun Nasionál Transporte Terrestre (DNTT) hamutuk ho Polísia Nasionál Timor-Leste (PNTL) sei halo regra ba transporte públiku ne’ebé halo sirkulasaun iha Dili laran, atu labele tula ema liu na’in-10.

Tuir Diretór Nasionál Transporte Terrestre, Natalino do Rosário, inisiativa ne’e mosu tanba haree ba daudaun iha hela períodu Estadu Emerjénsia (EE), ne’ebé Governu fó sai ona medida rigór, labele halibur ema liu na’in-10, tanba ne’e transporte públiku mós labele viola regra.

Notísia Relevante: Alterasaun medida EE, bandu halibur liu na’in-10 exetu pertense família

Nune’e, atu realiza, parte rua sei halo reuniaun hodi diskute hamutuk oinsá mak bele prodús regulamentu ne’e.

“Aban mak ami ho PNTL halo enkontru hodi haree ba kestaun ne’e atubele hasai desizaun ruma kona-ba regula transporte públiku,” Diretór DNTT informa, tersa ne’e iha edifísiu Ministériu Transporte no Komunikasaun (MTK), Caicoli

Iha fatin hanesan, Ministru Transporte no Komunikasaun, José Agostinho da Silva, fó ona orientasaun ba DNTT atu haree oinsá transporte públiku hanesan bus, mikrolete, no taxi bele nafatin tula pasajeiru maibé tenke kumpre regra EE.

“Bainhira Prezidente Repúblika dektreta estensaun Estadu Emerjénsia da-siak, ha’u orienta kedan Dirijente sira atu koordena ho ita-nia entidade relevante hanesan instituisaun PNTL,” nia dehan.

Biban hanesan, governante ne’e apela ba motorista sira atu kumpre nafatin protokolu saúde hanesan uza máskara, fase liman no tenke fase karreta antes halo sirkulasaun.

“Parte DNTT ho PNTL sei halo pasa revista atu evita transmisaun COVID-19 iha rai laran,” Ministru subliña.

EE faze da-siak abranje iha territóriu nasionál tomak, hahú vigora hosi tuku 00:00 loron 03 janeiru 2021 to’o tuku 23:59 loron 01 fevereiru 2021.

 Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here