Komunidade iha suku Comoro, kapitál Dili, troka voucher iha supermerkadu Leader ho produtu Cesta Bázika, kinta (10/12). Imajen TATOLI/António Gonçalves

DILI, 05 janeiru 2021 (TATOLI)-Rekizitu balun Estadu Emerjénsia bá-dasiak nian mak la bele halibur ema liu na’in-10, kumpre distánsia fízika no uza máskara. Maibé iha atividade distribuisaun Cesta Bázika  iha suku-suku sira kuaze la kumprimenta ba definisaun jerál Estadu Emerjénsia nian.

Notísia Relevante : Cesta Bázika la’o, Xefe Suku Fatuhada konsidera viola medida EE

Ho nune’e, Komandu Jerál PNTL alerta ba kompañia nasionál sira ne’ebé fahe Cesta Bázika iha Dili no munisipiu hotu- hotu tenke “obedese” ba regulamentu Estadu Emerjénsia nian hodi kontribui ba luta kontra pandemia COVID-19.

 “Husu kompañia no supermerkadu sira ne’ebé fahe Cesta Bázika ba ita-nia komunidade sira tenke regula benefisiáriu atu kumpre regra saúde públiku, hanesan uza máskara, fase-lima no evita formatura ne’ebé halibur ema barak. Se maka la kumpre ami sei halo intervensaun hodi duni fila ba uma,” informa portavós PNTL Superintendente Xefe, Arnaldo de Araújo, ba jornalista, ohin, iha Komandu Jerál PNTL, Dili.

Nia dehan, bainhira polísia halo sosializasaun ba regra ne’e maka komunidade sira la kumpre, PNTL sei la tolera no sei hapara provizóriu programa fahe Cesta Bázika.

PNTL mós halo avizu ba abitante sira iha Timor-Leste atu kumpre regra EE hodi labele halo festa no serimónia lia adat.

Nia dehan, kualkér se de’it maka viola regra, PNTL sei ezekuta lei halo detensaun no prosesa kazu tuir lei.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here