Komunidade sira iha Comoro, kapitál Dili, entuziasmu troka voucher Cesta Bázika iha loja Leader, kinta (10/12). Imajen TATOLI/António Gonçalves

DILI, 04 janeiru 2021(TATOLI)–Jestór Loja Leader, Pascoal Suri, hateten hanesan operadór ekonómiku ne’ebé hetan fiar husi Governu liuhosi Ministériu Turizmu, komérsiu no Indústria (MTKI) hodi fornese Cesta Bázika ho modalidade voucher, sei la hapara atividade enkuantu seidauk simu orientasaun husi ministériu responsável.

Maski nia rasik rekoñese iha Estadu Emerjénsia (EE) da-siak ne’e, Governu hahú implementa medida ne’ebé rigór, hahú husi uza máskara bainhira tama iha kualkér fatin instalasaun públiku, distansiamentu fíziku no labele halibur ema liu na’in-sanulu exeptu família.

”Regra Estadu Emerjénsia ami nafatin kumpre hanesan sidadaun, maibé ami labele hapara atividade bainhira seidauk simu orientasaun. Tanba ne’e ami hein deszaun husi Governu, bainhira haruka ami para ami halo tuir. Maibé tuir MTKI katak programa Cesta Bázika la’o nafatin, enkuantu haree ba protokolu husi Ministériu Saúde, komunidade sira laiha konsiénsia atu hatene,” Jestór Leader dehan iha Loja Fortuna Star, Aimutin, segunda ne’e.

Notísia Relevante: EE da-siak: viola medida ezekusaun sei asume responsabilidade kriminál

Nia observa, durante ne’e komunidade ladún kumpre medida ezekusaun EE ne’ebé Governu fó sai ona.

“Estadu Emerjénsia implementa ona, hahú ba oin ema labele liu sanulu, maibé Timór toman ona,  sira rona no hatene ona maibé lakohi atu hatene. Tanba ne’e Governu tenke serbisu maka’as atubele fó hanoin ba komunidade,” nia akresenta.

EE iha faze da-siak ne’e sei abranje iha territóriu nasionál tomak no hahú vigora husi tuku 00:00 loron 03 janeiru 2021 to’o tuku 23:59 loron 01 fevereiru 2021.

MTKI hahú lansa voucher Cesta Bázika iha munisípiu Dili iha inísiu dezembru 2020, ba benefisiáriu hamutuk  287.770 iha postu administrativu haat mak hanesan Dom Aleixo, Cristo Rei, Nain Feto no Metinaro.

Leader tama iha lista loja 15 ne’ebé fasilita voucher ba benefisiáriu sira iha Dili.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here