Koordenadora Jerál Komisaun Nasionál Prevensaun COVID-19, Odete da Silva Viegas. Imajen Tatoli/Egas Cristovão.

DILI, 04 janeiru 2021 (TATOLI)—Koordenadora Jerál COVID-19 husi Ministériu Saúde, Odete Viegas da Silva, hateten nia parte rekomenda ba Governu atu fó sansaun ba okupante kuarentena obrigatóriu no izolamentu sira bainhira la kumpre regra ba prevensaun moras coronavirus.

“Agora situasaun ne’ebé  mak mosu daudaun ne’e ba oin  ekipa Ministériu Súde rekomenda sei fó sansaun ba  sidadaun sira ne’ebé mak iha izolamentu no tantu iha kuarentena  no mós profisionál saúde sira ne’ebé mak la kumpre  regras entaun ita fó sansaun ba sira  para  oinsá ba oin hadia mekanismu servisu nian,’’ nia dehan ba jornalista sira iha konferénsia imprensa iha Caicoli Dili, ohin.

Notísia Relevante :Prevene COVID-19, TL sei implementa vasina AstraZeneca ba ema hotu

Kona-ba, video balun ne’ebé viral loos iha media sosiál katak pasiente konfirmadu COVID-19 ne’ebé izola ona iha Sentru Saúde Vera Cruz Dili la hetan atensaun di’ak husi ekipa médiku sira.

Nia dehan pasiente COVID-19 ne’ebé maka la kumpre regra  depois rekupera sei hetan sansaun husi Ministériu Saúde.

“Ohin ekipa enkontru ona no sei bolu mós liña minsiteriál sira  ne’ebé mak envolve iha COVID-19 nian para tau hanoin hamutuk  nune’e rekomendasaun ne’ebé  mak iha sei hato’o ba Ministra Saúde hodi hatutan ba iha Konsellu Ministru para bele tetu no públika ba sidadaun sira   atu nue’e ita bele kumpre ita-nia dever no ita-nia obrigasaun ,’’ nia hateten.

Tanba ne’e, Odete apela ba entidade no sidadaun hotu-hotu atu koopera ho Ministériu Saúde hodi prevene propagasaun COVID-19 iha Timor-Leste.

“Agora situasaun ne’ebé mak akontese husi kolega sira halo  ne’e  Ministériu  saúde hamutuk ho pilar sira rekonese buat balun ne’ebé mak ami presiza hadi’a  maibé ami  fó hanoin ba sidadaun sira ne’ebé mak  iha tantu isolamentu no tantu mós iha kuarentena  katak daudaun ne’e iha situasaun emerjénsia  limita mós sidadaun sira-nia direitu,”informa tan.

Notísia Relevante :Evakua sala pasiente COVID-19, MS rekoñese lapsu maibé hein hela investigasaun

Jornalista : Felicidade Ximenes

Editór :Agapito dos Santos

HAKEREK NO HATÁN

Please enter your comment!
Please enter your name here