Hakerek nain, José Cornelio Guterres.

Hosi: José Cornelio Guterres

Uluk nanain, agradese tebes ba irmão Dadolin Murak, ne’ebé fó fiar mai ha’u atu fó komentáriu ruma kona-ba nia poezia ida ho Titulu “Lilin Referendum” husi perspetivu Sosio-antropolojiku ema Timor-nian.

Husi poezia ne’ebé kompostu husi estrofe (bait) 5 ne’e, autór hakarak re-lembra ita hotu kona-ba povu Timor ho espíritu patriotismu no nasionalismu partisipa iha referendum 1999 hodi deside ba sira nia futuru politiku, liuhusi opsaun rua (2) ukun rasik ka mantein hamutuk nafatin ho Estadu Unitáriu Repúblika Indonézia.

Uluk nanain, autór hakarak hatudu katak povu Timor ne’ebé nakoku ho espíritu antuziasmu koletivu (hader sedu de’it antes loron matan mosu (estrofe 1)…. Tuir tradisaun povu Timor, desde beiala sira, pratikamente, atu selebra eventu, simu bainaka, ka foti desizaun koletivu importante ruma, sira sempre hatudu sira nia preparasaun di’ak no prontidaun  hasoru eventu sira ne’e.

Iha kontextu ida ne’e, povu  ho sentimentu nasionalismu no patriotismu koletivu atu foti desizaun importante no krusiál ida ne’ebé determinte ba sira nia moris tomak. Desizaun ne’ebé sira hein durante sira nia luta naruk ida (450 anos + 24 anos) atu hetan. Sira nia luta ne’ebé espresa iha forma oin-oin kompostu husi luta  primeira liña, balun iha segunda liña no terseira liña no seluk-seluk tan, hotu-hotu kontribui ba luta atu liberta sira án husi atan ba liurai sira (kultura feodalismu), atan ba mane sira (kultura maskulinizadus), beik iha edukasaun, hamlaha, la’ós nain ba sira ninian rikusoin rasik no seluk-seluk tan. Desizaun ne’e mós fó sentidu ba eroi barak ninia luta, sira nia sakrifisiu, mate hodi liberta nasaun no povu doben Timor Lorosa’e.

Tan ne’e, festa demokrátiku ida ne’e, hetan ameasa fiziku-psikolojiku, lohi povu ho osan husi  militár Indonézia no milisia sira (estrofe  2), maibé povu ho aten berani ka la tauk mate ba nafatin fatin votasaun hodi depozita sira nia direitu votu ne’ebé rezulta 78 pursentu hili ukun rasik versus 28 pursentu hili integrasaun nafatin ba Estadu Unitáriu Repúblika Indonéziu.

Dadeer de’it Manu Bure kokoreek (ref. estrofe 1). Manu Bure kokoreek, tuir sentidu semiótika fauna ema Timor-nian, ne’e hatudu sentidu sira  hanesan; (1) kostume fanu ema husi toba fatin iha tempu dadeer hodi prepara án ba hala’o sira nia atividade loron-loron nian no iha kontestu ida ne’e, manu kokoreek fanu povu prepara án ba vota; (2) sentidu seluk, tuir tradisaun ema timor nian, bainhira atu sai husi uma, maka  manu kokoreek ne’e signifika hatudu sinál sorte, vitória ka susesu ba sira nia atividade loron ne’e nian. Ho liafuan seluk, sira konfia katak lia-loos sei manan ne’e maka ukun rasik án; (3) tuir kultura Timor manu  aman Bure, ne’e nu’udar símbolu eroika ba vitória iha manu futu-fatin, embora sira hetan ameasa ho kilat, presaun psikolójiku no seluk-seluk (estrofe 2) tan maibé povu nakonu nafatin ho espíritu aten barani,  ho espíritu eroiku, nakonu ho esperansa no vitória iha desizaun ida ne’e.

Autór mós subliña antes sai husi uma, sira hemu Kafe hamutuk (ref.. estrofe 1). Hemu kafe hamutuk tuir lisan ema Timor… simboliza hametin espíritu unidade ka espíritu koletivismu (sosiologu Emile Durkheim), partilla hanoin  no neon hamutuk ka tau forsa hamutuk antes sai ba hala’o atividade, asaun, funu/luta ka halo desizaun importante ruma, ne’ebé rezulta desizaun ida maioria koletiva (78 pursentu) iha votasaun ba ukun rasik án.

Sira sente hamlaha ba Liberdade (estrofe 1). Autór mós hakarak hatudu katak povu la sente hamlaha, basa sira hamlaha ba liberdade ne’ebé sira luta hasoru presaun, sakrifiu, mate desde tempu kolonialismu (450 anos ) plus invazaun militár Indonéziu durantes tinan 24. Liberdade fundamentál ne’ebé sira hetan la’ós obtein nu’udar prémiu gratuitu ida, maibé liuhusi esperiénsia sofrementu naruk ida (estrofe 3). Tan ne’e, tempu to’o ona,  sira livre husi atan, hetan fali oportunidade ba edukasaun di’ak no ba ema hotu-hotu (inkluzivu), oportunidade esplora rasik sira nia rikusoin rasik, direitu ba espresaun idea, direitu asosiasaun sira nsst.  Embora, rezultadu referendum ne’e alende liberta povu maibé mós selu ho kustu ida bo’ot tebes maka ema lubun ida mate,  uma barak hetan sunu no sasan barak hetan estragu.

Ikus liu autór hamosu LILIN ne’ebé lakan nafatin (refere ba estrofe 4&5). LILIN tuir Padre William simboliza naroman, manifesta prezensa  Maromak nian (Exedo 27:20-21) no (Livros dos Padres 24:2-4) hanesan “ha’u maka Naroman Mundu nian” (Joao 8:12; 12:24), Tuir kultura Romanu nian Lilin simboliza prezensa militár luta atu manan funu. Signifika referendum lori lia-loos naroman lilin leno povu nia neon no hanoin hodi duni nakukun, terus, presaun, atan ba malae durante 450 anos + 24 anos, ne’e maka desizaun hili lia-loos ukun rasik án duke integrasaun ba RI.

LILIN manifesta mós espíritu obediente, respeitu, lealdade husi povu Timor ba rezultadu ukun rasik án ne’ebé sira rasik hili ho sira nian matenek, neon, kosar ben, sofrementu no vida  rasik, liuhusi hala’o dezenvolvimentu ida sustentavel to’o ohin loron. Embora dezenvolvimentu ida,  hasoru problema no dezafiu oi-oin hanesan lilin lakan hasoru anin bo’ot huu, maibé dezenvolvimentu nasionál ne’e la’o no firme nafatin tanba lilin ne’ebé tahan anin bo’ot ne’e kontinua lakan no fó naroman nafatin. Nune’e mós LILIN ne’ebé kontinua firme no lakan, hatudu mós obediente, lealdade husi lideransa sira nian kompromisu lori povu sai husi nakukun, hamlaha, terus no mukit ba moris prosperu nian tuir mehi Planu Estratejiku Dezenvolvimentu Nasionál (PEDN) 2011-2030 no Objetivu Dezenvolvimentu Sustentavel Nasoens Unidas  (ODS) 2030 nian.

Lilin ne’e mõs manifesta enlightment (pencerahan) husi matenek nain Timor-oan sira ne’ebé tende hatudu sira nia naroman iha hanoin krítiku no neon mós iha estudu no peskiza hodi hamosu siénsia no teknolojia foun no liu-liu ho peskiza  bele hamosu polítika no planu ida di’ak atu lori povu ba moris di’ak.

Dili, 4 Janeiru 2021

Hakerek nain nu’udar Prezidente Exekutivu Institutu Nasionál Siéncia no Teknolojia (INCT, sigla portugés)

Lee mos:

Lilin “Resitir é Vencer!” Lakan Nafatin

HUSI FACEBOOK BA FATIN-LIXU – TO’O ANTOLOJIA

HAKEREK NO HATÁN

Please enter your comment!
Please enter your name here