Konstrusaun estrada. Imajen TATOLI/António Gonçalves

DILI, 04 janeiru 2021 (TATOLI)–Governu liuhosi Ministériu Obra Públika (MOP) no Ministériu Finansa (MF) hahú diskute hodi halo preparasaun ba konstrusaun estrada nasionál hosi rotunda Comoro to’o Tasi-Tolu.

Tuir nota ne’ebé Agência TATOLI asesu iha segunda ne’e, fó sai katak, Ministru Obra Públika, Salvador Eugênio Soares dos Reis Pires, akompaña hosi Vise Ministru Obras Públika, Nicolau Lino Freitas Belo, hala’o enkontru ho Diretór Jerál no Unidade Manajementu Projetu (PMU, sigla Inglés) hodi ko’alia kona-ba konstrusaun estrada.

Iha enkontru ne’e, Ministru Salvador aprezenta kona-ba preparasaun MOP, ne’ebé atu serbisu hamutuk ho MF hodi aselera konstrusaun estrada protokolu trosu rotunda Prezidente Nicolau Lobato ba to’o iha inter-sesaun Tibar ho distánsia kilometru 1,9.

“Prosesu agora iha faze preparasaun dokumentu tuir rekizitu Banku Dezenvolvimentu Aziátiku (ADB), ne’ebé iha faze revizaun no halo technical due diligence,” refere nota impresa ne’e.

Iha loron 22 maiu 2020, liuhosi telekonferénsia, MOP husu apoiu ADB atu utiliza balansu  hosi fundu impréstimu hodi finansia ba estrada ne’ebé konsidera estratéjiku tebes ba Timor-Leste, tanba bele fasilita movimentasaun ema no sasán, liuliu relasiona ho operasionalizasaun Portu Baia Tibar iha tinan 2021.

Relasiona ho dokumentu sira ne’ebé Governu submete ba ADB, daudaun ne’e banku ne’e haruka ona ninia péritu hodi halo análiza no avalia prosesu preparasaun sira, tanba konsiente katak projetu refere importante tebes, maibé tanba de’it pandemia COVID-19 maka dada tempu oitoan ba avaliasaun dokumentu.

Antes ne’e, Governu Timor-Leste halo ona akordu ho Xina Harbaour inklui parseiru sira ne’ebé daudaun ne’e halo konstrusaun ba Portu Baia Tibar, katak estrada ne’e tenke finaliza iha agostu 2021, maibé ho situasaun atuál mak sei estende to’o maiu 2022 hodi finaliza projetu refere.

Enkontru ne’e partisipa hosi Diretór Jerál Obras Públika (DGOP), Rui Hernani Freitas, reprezentante hosi MF inklui Jerente PMU, estrada,  Sidónio da Costa Freitas, inklui tékniku sira.

Governu mós halo ona pagamentu faze daruak ba abitante afetadu projetu alargamentu estrada iha rotunda Comoro to’o Tasi-Tolu atu husik área ne’e hodi hafasil konstrusaun estrada.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here