Atividade AIFAESA iha terrenu. Imajen/AIFAESA

DILI, 04 janeiru 2021 (TATOLI)—Durante halo fiskalizasaun no monotorizasaun ba implementasaun programa Cesta Bázika, Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA) simu keixa husi komunidade iha munisípiu Dili kona-ba loja balun la define presu kada produtu.

Diretór Operasionál AIFAESA, Gabriel da Costa, hateten durante loron boot, autoridade ne’e foku liu ba implementasaun Cesta Bázika tanba ne’e maka simu preokupasaun balun husi komunidade.

“Ezemplu bainhira ita foti masin-midar kilo lima, maibé la hatene ninia presu hira? kuandu la tau kedas presu komunidade konfunde, nune’e mós produtu seluk hanesan mina, batar, fore-mungu no seluk tan,” Dirijente ne’e informa ba Agência TATOLI, segunda ne’e, iha ninia knaar fatin, Matadoro.

Maski nune’e, ekipa autoridade inspesaun halo intervensaun lalais iha terrenu no ikus mai konsege rezolve.

“Hafoin simu keixa, AIFAESA halo kedas intervensaun, ne’ebé empreza no loja sira ne’ebé fornese produtu ne’e rekoñese fallansu ne’e katak aktu ne’e akontese no sira hadi’ak kedas,” nia haktuir.

Aleinde ne’e, autoridade mós simu keixa husi komunidade hanesan produtu iha loja balun la tuir kuantidade ne’ebé define, ezemplu terigu dehan kilo lima maibé tetu ba la to’o no presu la tau iha produtu sira ne’ebé komunidade atu ba foti.

“Definisaun ka tau kedas presu ba kada produtu ne’e importante nune’e bainhira komunidade sira ba foti produtu no lori ba kasir, sira bele hatene ona katak produtu sira ne’e to’o duni $50,” nia akresenta.

Diretór Operasionál ne’e konfirma katak, situasaun hirak ne’e akontese iha loja Agrikultura Fatuhada no supermekadu ida iha Vila-verde, Dili.

Tuir diploma ministeriál konjuntu númeru 38/2020, 26 outubru, produtu ne’ebé tama lista programa Cesta Bázika maka, produtu alimentár, kompostu husi foos, batar, kote/fore, amendoim, sorgum dulas, kafé, masin, fehuk ropa, susu ben, masin midar, manu, manu tolun, mina tein, mina nú, terigu, inklui modo sira hanesan ervilla, tomate, koto nurak, fore sikote, repollu, kouve, modo metan, modo mutin no modo seluk tan.

Enkuantu ba produtu ijiene maka, sabaun, álkool jel, deterjente, eskova nehan no pasta nehan.

Iha programa Cesta Bázika, membru idaidak agregadu familiár sei hetan $25, kada fulan iha fulan-rua nia laran (kada ema $50).

Iha munisípiu sei fahe sasán enkuantu iha kapitál sira sei distribui ho modalidade voucher ne’ebé fasilita husi Ministériu Turizmu, Komérsiu no Indústria (MTKI) hodi troka iha loja identifikadu ona.

Loja sira-ne’ebé mak fasilita voucher ba benefisiáriu sira iha Dili hamutuk 15 mak hanesan Loja Amigu Toos Nain, argrikultór, Leader, Jacinto Supermarket, Lita Store, Lisun Supermarket, Funan Buras, Acelda, Star king May Mart, Fitun, W Four, Maubara no seluk tan.

Tuir dadus husi Ministériu Administrasaun Estatál (MAE), populasaun hamutuk millaun 1,5 maka sei hetan produtu Cesta Bázika.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here