Komunidade sira iha Comoro, kapitál Dili, entuziasmu troka voucher Cesta Bázika iha supermerkadu Leader, kinta (10/12). Imajen Tatoli/António Gonçalves

DILI, 04 janeiru 2021 (TATOLI)—Iha ámbitu implementasaun planu rekuperasaun ekonómika kurtu prazu, Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA) ne’ebé simu responsabilidade atu tau matan halo monotorizasaun, to’o oras ne’e seidauk simu keixa husi komunidade relasiona ho sasán Cesta Bázika a’at.

Bazeia ba despaisu  númeru 14 husi Ministru Koordenadór Asuntu Ekonómiku (MKAE), Joaquim Amaral, fó kompeténsia ba autoridade ne’e atu halo intervensaun, fiskalizasaun no monotorizasaun ba implementasaun Cesta Bázika, hahú husi ministériu no instituisaun implementadór sira.

“Durante loron boot ita hotu fériadu, maibé informasaun iha rede sosiál katak sasán Cesta Bázika balun ne’ebé fó ba komunidade a’at, ne’ebé ami haree ona informasaun ne’e iha Facebook maibé to’o agora ami seidauk simu keixa husi komunidade,” Diretór operasionál AIFAESA, Gabriel da Costa, informa ba Agência TATOLI iha ninia knaar fatin, Matadoro, segunda ne’e.

Notísia Relevante: AIFAESA identifika empreza balun distribui foos la tuir kuantidade

Maski nune’e, Dirijente ne’e dehan, ekipa AIFAESA sei halo verifikasaun ba empreza ne’ebé maka fornese sasán ba komunidade.

“Ami sei halo konfirmasaun ba empreza ne’ebé fornese produtu, se ida-ne’e mak loos duni, sasán a’at maka empreza uza fali hanesan manu-tolun a’at, maka ami sei husu ba entidade ne’e atu troka,” nia akresenta.

Tuir responsável ne’e, kuandu empreza lakohi kolabora ho autoridade hodi troka sasán maka ekipa sei foti medida tuir dekretu-lei númeru 23/2019, loron 01 agostu, artigu 13 aliña a, ne’ebé hateten katak sasán estragu sira sei multa osan kiik liu $1.000 no boot liu $10.000.

Enkuantu, to’o agora AIFAESA seidauk tun bá terrenu hodi halo verifikasaun ba produtu sira ne’ebé espalla iha rede sosiál tanba funsionáriu sira realiza hela reuniaun jerál hodi halo avaliasaun serbisu.

“Ami kompromete katak iha loron tuir mai (tersa) ekipa sei ba haree hodi halo verifikasaun,” nia tenik.

Iha loron 04 dezembru 2020, Ministériu Turizmu, Komérsiu no Indústria (MTKI) lansa voucher Cesta Bázika iha munisípiu Dili, ba benefisiáriu hamutuk 287.770 iha postu administrativu haat mak hanesan Dom Aleixo, Cristo Rei, Nain Feto no Metinaro.

Ministériu responsável fahe voucher ba komunidade no sei troka iha loja identifikadu ho produtu.

Loja sira-ne’ebé mak fasilita voucher ba benefisiáriu sira iha Dili hamutuk 15 mak hanesan Loja Amigu Toos Nain, argrikultór, Leader, Jacinto Supermarket, Lita Store, Lisun Supermarket, Funan Buras, Acelda, Star king May Mart, Fitun, W Four, Maubara no seluk tan.

Ministériu implementadór ba programa Cesta Bázika maka hanesan MKAE, MTKI, Ministériu Agrikultura no Peska, Sekretaria Estadu Kooperativa (SEKoop), Sekretaria Estadu Ambiente (SEA) inklui Autoridade Rejiaun Administrativa Espesiál Oé-cusse Ambeno (RAEOA).

Tuir diploma ministeriál konjuntu númeru 38/2020, 26 outubru, produtu ne’ebé tama lista programa Cesta Bázika maka, produtu alimentár, kompostu husi foos, batar, kote/fore, amendoim, sorgum dulas, kafé, masin, fehuk ropa, susu ben, masin midar, manu, manu tolun, mina tein, mina nú, trigu, inklui modo sira hanesan ervilla, tomate, koto nurak, fore sikote, repollu, kouve, modo metan, modo mutin no modo seluk tan.

Enkuantu ba produtu ijiene maka, sabaun, álkool jel, deterjente, eskova nehan no pasta nehan.

Programa Cesta Bázika fixa membru idaidak agregadu familiár sei hetan $25, kada fulan iha fulan-rua nia laran no bele troka ho folin sasán ne’ebé korresponde ba valór osan.

Programa Governu ne’e ho totál kustu hamutuk millaun $71,5 (valór bele iha mudansa) ho objetivu atu fó apoiu ba nesesidade bázika família, kombate hamlaha ba família vulnerável liu, apoiu ba agrikultór, produtór no komersiante lokál.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here