"Hakmaan" iha rai-henek mutin "Uato Oli", Postu Administrativu Baucau Vila, Munisípiu Baucau. Imajen Tatoli/Francisco Simões

BAUCAU, 03 janeiru 2021 (TATOLI) –Rai-manas, la iha udan durante Natál, 24-25 dezembru 2020 no tinan foun, 01-03 janeiru 2021, iha Munisípiu Baucau, halo ami família  sente apertadu (sumpek).

Rai-henek mutin “Uato Oli”, Baucau. Imajen Tatoli/Francisco Simões

Iha domingu (03/01), ami ho ami husu ba malu, saida mak ita bele halo agora? Rai-manas, kolen, baruk no la iha vontade. Hosi hirak idade ki’ik ka labarik, haklalak ba tasi. Hirak ne’ebé idade juventude hanoin hanesan ho hirak  sira ki’ik. Maibé, hirak adultu saran lia hodi  dehan, “di’ak liu mak “hakmaan” iha uma de’it tanba autoridade sira bandu ona atu ema la bele halibur malu liu na’in-10 hodi kumpre Estadu Emerjénsia bá-dasiak nian.”

Tebes! Timor-Leste no nasaun sira iha mundu preokupa ho peste letál coronavirus ka COVID-19. Dezde fulan-marsu 2020, COVID-19 nu’udar moras importadu, Timor-Leste implementa kedas Estadu Emerjénsia bainhira rejista kazu pozitivu ida. Implementasaun Estadu Emerjénsia nu’udar medida preventiva no kontrolu COVID-19 atu hasees sidadaun hotu-hotu hosi kalamidade públika.

Selfie hodi espresa ksolok iha rai-henek mutin “Uato Oli”. Imajen/Espesiál

Hatene hela regra sira-ne’e, maibé koko obriga-malu iha tempu ne’e, hodi fó ksolok ba malu, liuliu  fó ksolok ba ki’ik-oan sira (oan doben sira). Hirak idade adultu pasiénsia hasees tiha sira-nia “ego” hodi haktuir ki’ik-oan sira-nia hakarak para bá netik hoban-aan iha tasi.

Rona dehan, “ita bá hariis tasi!”. Ki’ik-oan sira “haksoit”, “haklalak” atu hanesan foin simu anin-fresku iha rai-manas nia lalatak.

Ksolok ho bero haleu tasi “Uato Oli”, Baucau. Imajen/Espesiál

La iha preparasaun. Etu ho modo uitoan atu han bá meiudia nian “falun” lori ho de’it, ki’ik-oan sira komesa “Gur-gar” tama-sai kuartu hodi foti sira-nia hena ka roupa atu bá hariis tasi nian.

Inan-sira “farigadu” no atrapalla boot kona-ba “bukae” saida mak atu lori. Hanoin badak no oras bá daudaun.

“Saida mak tasak iha dapur laran, ohin loron nian, lori de’it.” Lia balun hosi inan-feton balun hosi uma-laran.  La hanoin atu bá han saida no hemu saida. Iha sentimentu kontente ne’e hanoin de’it mak hariis-tasi.

Tanba moris ho vida ekonomia ne’ebé difisil uitoan. Sira-hirak ne’e la preokupa bá transporte la’o ain mós mak ne’e ona. Maibé, tanba ki’ik-oan sira maioria tebes purvolta liu na’in-neen (6) no balun sei bebé hela, inan sira soe hamutuk dollar ida ($1,00) hodi aluga mikrolete hosi Bairru Bau-Oli, Suku Bahu, Postu Administrativu Baucau Vila, Munisípiu Baucau, atu bá tasi ho rai-henek mutin Fatuk-Boot ka baibain komunidade sira parte Uaima’a nian bolu “Uato Oli”.

Tanbasá tasi ne’e naran “Uato Oli” ka Fatuk-Boot? Tuir istória kontadu hosi ibun ba ibun iha komunidade sira area Suku Bahu ho Suku Caibada (parte Uaima’a), Postu Administrativu Baucau Vila, katak bolu tasi “Uato Oli” ka Fatuk-Boot, tanba iha tasi ne’e “hamriik” metin hori otas ba otas fatuk-boot ida no ki’ik-oan sira balun tan.

La’o halimar ho bero hodi esplora tasi “Uato Oli” nia furak. Imajen/Espesiál

Distánsia hosi Bau-Oli ba “Uato Oli” purvolta kilómetru haat (4). Nune’e, difisil atu ki’ik-oan sira la’o ain. Nune’e, aluga mikrolete ida ho nia folin bá mai suffer sira kobra $20,00.

To’o iha tasi-ibun “Uato Oli”, ami família sira  haksumik iha ai-look  hun ida nia mahon ne’ebé simu anin tasi fresku tebetebes.

“Ha’u ksolok tebes hariis iha tasi ne’e. Moos, fresku no rai-henek mutin. “hakmaan” tiha de’it pay.” Janessa Freitas Boavida, labarik ida ne’ebé lia-tun bá nia aman Hipolito Freitas.

Rai-henek mutin “Uato Oli” iha kedas parte sorin ba loro-monu nian hosi tasi Uatabo, Baucau. Rai-henek mutin, tasi-been ne’ebé limpa ka jernih, ai-hun hamriik tuir tasi ibun halo mahan rai. Hosi tasi mai foho, hetan nu’u hamriik halo fresku tebes matan nia hateke.

Sa’e bero hodi esplora tasi “Uato Oli” Baucau. Imajen Tatoli/Francisco Simões

Hanesan tasi ho rai-henek mutin, fó tebes esperansa no inspirasaun bá hirak ne’ebé goza nia rekreasaun iha “Uato Oli”. Ita hotu livre atu halo esplorasaun iha area turístiku ne’ebé sei haksimuk ho natureza ” iha tasi Uatabo nia sorin.

Laloran hakmatek, ain fresku tebes. Tasi-been moos, laiha kontaminasaun fo’er uitoan. Halo loro-matan nia nabilan kona iha tasi-leten, modifika laloran ki’ik, bosok ita-nia matan atu haree hanesan haree diamanté rahun no ki’ik iha tasi leten.

Haklalak, hakilar, kontente, alegria, halai halimar uitoan iha rai-henek mutin nia leten, kari tasi-been no hikis tasi-been ba malu, sai tiha hanesan ámbitu ne’ebé espresa sira-nia ksolok  no domin bá malu.

Ksolok iha bero laran hodi la’o haleu tasi “Uato Oli”, Baucau. Imajen Tatoli/Francisco Simões

La’o halimar, hariis liu tiha, sai fali mai toba halimar iha rai-henek mutin nia leten. La kompletu bainhira la hasai imajen (foto) ka selfie ho handphone  hanesan rekordasaun bá sira.

Balun hasai daudaun imajen ka selfie, update daudaun kedas sira ida-idak nia kronolojia Facebook, WhatsApp, Instagram no Twitter. Ida-ne’e mak espresaun kontente labarik no juventude sira millennial ohin loron.

Hosi sira-nia oin ida-idak haree kontente no ksolok tebes. Sira sente duni rai-henek mutin “Uato Oli” ka Fatuk-Boot nia  charme exótico (pesona eksotis). Anin fresku no rai-henek mutin “hakmaan” tebes sira-nia fuan.

Bero ne’e hanesan fasilidade id ne’ebé komunidade sira prepara hodi fó aluger hodi la’o haleu tasi “Uato Oli”, Baucau. Imajen/Espesiál

La iha ida hosi sira mak hatudu sira-nia oin “naburut”. Sira hotu haksolok no hamnasa iha fatin ne’ebé furak tebes ka sente hanesan moris iha  paraízu ki’ik iha Baucau.

La sente oras ba daudaun. Ami ho sira iha ona rai-henek mutin “Uato Oli” besik oras tolu liu ona. Hoban aan iha tasi-laran no balun duir halimar iha rai-henek mutin to’o haluha rai.

Balun hamlaha. Inan sira komesa sente ona “kabun makili” nune’e, sira fó orientasaun atu hanesan “militár” uitoan, hotu-hotu tenke sai lalais hosi tasi-laran hodi bá han. Oras han nian liu ona.

Ho “bukae” natoon no simples, etu-mutin, modo tahan uitoan, kulu-sona uitoan, no seluk tan, ami hadau-malu. Balun ema na’in-rua han iha bikan ida. Kontente ida oinsá ne’e?

Han soin-sala de’it! Soe hela bikan fo’er, halai ho haklalak tama fali tasi-laran!  lakleur bero ida liu ami nia oin (dook uitoan hosi ami). Labarik balun hakilar bá hirak ne’ebé bero-laran.

“Maun sira, ami bele bá sa’e bero ne’e?”

“Hakmaan” iha bero laran hodi la’o haleu tasi “Uato Oli”, Baucau. Imajen/Espesiál

Hosi bero-laran hakilar tenik mai, “bele! Maibé aluga $10,00”.   Rona lia hirak ne’e, labarik sira husu ba sira ida-idak nia inan-aman.

Ho espontánea de’it. Maun ho bin ida hatán hodi dehan, “mai tula ami mak ami selu.”

Lakleur de’it nakoda  na’in-rua iha bero laran lori besik ona bero ne’e atraka iha tasi-ninin. Ho nune’e, hotu-hotu rame-rame halai ba sa’e bero hodi la’o ho bero hale’u tasi “Uato Oli” .

Balun lori ho kedas sira-nia gadget (handphone)  hodi halo video, hasai imajen no balun selfie daudaun. Balun fali, koko espresa sira-nia ksolok ho hakilar no lori liman baku tasi-been.  Balun foti liman bá hirak ne’ebé hamriik iha tasi-ibun.

Iha bero-laran hateke tuun ba tasi kidun malahuk tebes. Balun komesa fuan-ki’i. Maibé taka falta de’it, halo kontente aan. Bainhira liu daudaun balun hakilar haree ikan oan sira haksoit sa’e bá tasi-leten.

Foto hamutuk iha rai-henek mutin “Uato Oli”, Baucau. Imajen/Espesiál

Tasi no rai-henek mutin “Uato Oli”  nia paizajen fó ksolok no “hakmaan” tebes bainhira hakarak ba halo ezersísiu ki’ik, rekreasaun ho família ka  paseiu. Esplora loron tomak hale’u tasi “Uato Oli” talvés bele sente moris iha paraízu ki’ik ida.

Karik oras ne’e, ita sira no família balun hanoin hela atu pasa ferias no “goja” tasi nia furak ho rai-henek mutin iha Baucau? se nune’e, fiar-bá katak, fatin turístiku tasi-ibun no rai-henek mutin “Uato Oli” ka Fatuk-Boot bele sai hanesan fatin distinsaun.

Fatin ida hakmatek, anin-fresku, ai-mahon sufisiente, rai-luan no natureza ne’ebé sei orijen fó espasu kmanek ba ita atu esplora no libré espresa ita-nia espresaun iha rai-henek mutin “Uato Oli”.

Jornalista : Francisco Simões

Editór       : Agapito dos Santos

PUBLISIDADEiklan

HAKEREK NO HATÁN

Please enter your comment!
Please enter your name here