Krisdayanti kaer lafatik hasai fotografia tau tais nia kaben Raul Lemos ho sira nia oan doben Amora Lemos, Kellen Alexander Lemos. Imajen/kolesaun família Raul Lemos

DILI, 01 janeiru 2021 (TATOLI) —Tebes no la espera tais Timor iha nia aura ka magnitude rasik ba ida ne’ebé hatais. Ba Timor-oan bainhira nia hatais tais  iha serimónia boot importante no espesiál  iha rai-laran no rai-li’ur nia sente nia Timor-oan loloos.

Família KD-Raul Lemos. Imajen/kolesaun família Raul Lemos

Diva Pop Indonézia nian, Krisdayanati ka koñesidu ho naran KD ho nia família hatudu sira-nia interese no domin-boot ba tais Timor. Artista no atuál membru Parlamentu Nasionál Indonézia nian (DPR/MPR-RI/ Dewan Perwakilan Rakyat Republik Indonesia) ne’e haree furak tebes ho imajen sira ne’ebé virál iha rede sosiál Facebook bainhira ho família hasai fotografia  hamutuk ho hatais tais Timor hanesan ema Timor loloos.

Raul Lemos, emprezáriu Timor-oan nia espoza ne’e  haree bonita kompletu hafalun isin lolon ho tais Timor.

Imajen ka fotografia kolesaun família  KD ho Raul Lemos nian ne’ebé virál iha Facebook halo ema ua’in like no apresia. KD ho Raul Lemos no sira-nia oan na’in-rua; Amora Lemos ho Kellen Alexander Lemos, mosu ho exelente tau ropa tradisionál Timor nian.

Manu-fulun hafutar kmanek iha ulun no kaebauk  hafutar iha reen-toos hanesan koroa ida no “hahenu” belak ne’ebé kombina ho mortel iha kakorok halo KD, Raul, Amora no Kellen nia espresaun iha fotografia kmanek ua’in liután.

Kellen Alexander Lemos. Imajen/kolesaun família Raul Lemos

“Ami iha kompromisu boot atu promove tais Timor. Bá oin, ha’u nia kaben promete sei uza iha eventu-eventu importante iha Indonézia. Hanesan  plenária DPR-RI  no ba eventu-eventu importante iha Indonézia, hanesan loron proklamasaun Indonézia nian, 17 agostu no seluk-seluk tan inklui vizita parlamentu entre nasaun karik pandemia COVID-19 normal ona. Ha’u dehan bá ha’u nia kaben, ha’u moris mai haree kedas ha’u nia avó no bizavón uza tais orijinál ho modelu hatais nune’e. Ne’e mak ami nia estilu orijinál tau tais hosi bei-ala to’o ohin loron,” haktuir Raul Lemos, bainhira responde Agência Tatoli via WhatsApp, sesta ne’e.

Surik iha Raul ho Kellen nia liman no KD ho Amora haklili bote no kaer lafatik, hatudu momoos no loloos tradisaun Timor nian ho orijen Timor-oan nia hun no abut.

“Hadomi kultura Timor hanesan ami aan rasik,” tenik Raul Lemos, hodi hatutan nia espoza KD no sira-nia oan doben Amora ho Kellen, oras ne’e, iha Dili hodi pasa sira-nia tempu feriadu Natál no Tinan Foun hamutuk ho Raul Lemos no família sira iha Timor.

Iha ámbitu tinan foun ne’e, Raul Lemos-KD hamutuk ho komisaun organizadora Raya Event atu hala’o festivál gala dinner for spirit 2021, iha kalan 31 dezembru 2020, iha Salaun OCA, Osindo, Dili, maibé tenke adia ba tempu seluk  tanba Estadu Timor-Leste deklara ona estensaun Estadu Emerjénsia bá-dasiak.

Iha regra prinsipál balun iha EE bá-dasiak, maka ema la bele halibur malu liu na’in-10  (distánsia sosiál), la bele halo festa no la bele halo lia. Ho nune’e, komisaun organizadora Raya Event ba festivál gala dinner for spirit 2021 deside hodi adia festivál ne’ebé au-mézmu tempu atu  halo lansamentu bá Raya Event.

Notísia Relevante : Kumpre regra EE, Raya Event adia festivál gala dinner for spirit 2021

Jornalista       : Francisco Simões

Editór             : Agapito dos Santos  

1 KOMENTÁRIU

  1. Ne’e la’os tais Timor maibe tais printing. Saida maka KD ho RL halo ne’e hanesan forma ida atu promove sira-nia produtu tais printing, la’os tais Timor tanba tais Timor loloos maka ida be ita-nia inan feton sira soru no fa’an iha Kolmera ne’e.

HAKEREK NO HATÁN

Please enter your comment!
Please enter your name here