Igreja Katedrál Baucau. Imajen/foti hosi Google

BAUCAU, 01 janeiru 2021 (TATOLI)–Uma Kreda Katóliku, ohin, loron 01 fulan-janeiru 2021, selebra eukaristia misa solenidade Santa Maria Maromak Nia Inan no misa paz nian bá mundu rai-klaran.

Notísia Relevante : Impaktu COVID-19, sarani Baucau rona misa hosi rádiu de’it

Bispu Dioseze Baucau, Mgr. Basílio do Nascimento, prezide misa solene iha Igreja Katedrál Baucau. Imajen/Espesiál

Maske selebrasaun liturjia festa solenidade ne’e la hetan prezensa hosi sarani sira ka la iha partisipasaun sarani sira nian, maibé uma kreda liuhosi Bispu Dioseze Baucau, Mgr. Basílio do Nascimento, kontinua bolu atensaun liuhosi transmisaun Rádiu Fini Lorosa’e (RFL) ba sarani sira hotu, atu hametin fiar iha Kristu hodi hetan iha Kristu lia loos tomak.

Iha nia omilia Bispu Basílio lia tun dehan, “maun-alin sarani doben sira hotu, tuir ita hatene tinan-tinan loron 01 janeiru, tinan foun nian, uma kreda fó hanoin ba ita hanoin rua bainhira misa hahú;  primeiru, Santa Maria Maromak Nia Inan no segundu loron paz nian.”

Don Basílio esplika katak uma kreda tau hanoin rua; Santa Maria Maromak Nia Inan no loron paz nian, iha loron ida ne’e, atu sarani no ema hotu iha mundu komprende Santa Maria Maromak Nia Inan bá hanoin tinan tomak nian.

“Ita bá pasajen tolu iha Bíblia nian; primeiru Anju mai fó hatene ba Maria katak Nia sai Maromak Nia inan hodi ko’us Kosok Oan Jezús Kristu, segundu kuandu ita Nai Jezús hala’o ona Nia servisu iha Kana bainhira Inan ida-ne’e hanoin ema sira halo festa, sira nia susar tanba tua la iha ona, Nai Feto hakbesik ba Jezús hodi dehan de’it sira tua la iha ona,  terseira pasajen, tuir Bíblia nian kuandu ita Nai Jezús Kristu atu mate iha krús, ita Nai Jezús Kristu hateten ba Saun João katak “o nia Inan mak ida-ne’e no hateten ba Maria o nia oan mak ne’e”.

Nu’udar inan,  Don Basilio fó sasin, ema hotu hatene inan sira nia fuan, inan sira nia laran no inan sira nia sentimentu.  Oan bele sabraut rihun ida, bá inan ida nia oan nafatin. Nune’e mós oan bele fila kotuk dala barak nia inan, aman sira fuan to’os atu perdua, maibé inan sira, lae, oan  nafatin oan.

Bispu Dioseze Baucau, Mgr. Basílio do Nascimento. Imajen Tatoli/Joanico de Araújo.

Don Basílio hateten, dala barak inan ida tanis mesak-mesak iha uma laran, reza mesak-mesak  hodi hanoin oan sira nia problema no hanoin oan sira nia hahalok ne’ebé la loos.

Iha istória uma kreda nian, Amu Basílio haktuir, iha señora ida naran Santa Monika nia oan ida naran Santu Agostinho, nia oan ida ne’e buat aat boot ida, sabraut, tanba nia vida ne’e dook hosi Maromak.

Santa Monika la hateten buat ida ba nia oan, nia loron-loron reza no tanis ba Maromak atu loron ida lori nia oan Agostinho bá hasoru fali ba Maromak. Nia esforsu no nia konsagrasaun ne’e atu hetan dalan loos. Nia oan ne’e sai tiha bispu no bainhira tempu besik ferik atu mate, nia oan konta, sira na’in-rua ko’alia kona-bá hanoin vida uluk nian.

Santa Monika dehan, hanesan ne’e bá nia oan Santu Agostinho, “buat ne’ebé ha’u mehi bá o la iha ona, ha’u mehi mak o hetan ona Maromak Nia grasa. Buat ne’ebé ha’u manan iha vida mak ida ne’e. O bispu ona, o fila ba Maromak.”

Uma kreda nian hanoin, tinan ida ne’e tomak konfia uma kreda nia moris, mundu nia moris, sarani nia moris, ema hotu-hotu nia moris biar la’ós katóliku mós  mesak Maromak nia oan, ne’e duni kuandu iha loron 01 janeiru, uma kreda hato’o mai Nossa Señora hanesan modela, hanesan dalan no uma kreda hakarak tau hanoin ida ne’e.

Ida seluk tan, Don Basílio tenik, bainhira iha Kanan bainhira Nai Feto hakbesik ba Jezús dehan bá Jezús, sira tua la iha. Ne’e hatudu inan nia preokupasaun!

“Tinan ida tan iha ita nia vida, Nossa Señora Nia loron ida ne’e mai fó hanoin bá ita katak inan, inan ida ne’ebé la’ós tilun diuk, la’ós matan delek no la’ós fuan to’os. Maibé, inan ne’ebé besik hela ba oan sira hodi husu ba Maromak haraik grasa bá oan sira,” Don Basílio tenik.

Maria rai buat hirak ne’e hotu iha nia fuan.  Kuandu Anju hateten ba Nia, “O sei sai Maromak Nia Inan hodi ko’us kosok oan Jezús.”  Rona liafuan ne’e Nossa Señora konfuzu, hodi husu “oinsá mak ha’u bele, ha’u la hola mane”. Maibé, Maria rai buat hotu iha Nia fuan.

“Rai buat hotu-hotu iha ita nia fuan. Maromak Nia liman fatin iha ita nia vida, ita ida-idak mak koko. Tanba Maromak liuhosi ita nia vida ne’e liuhosi dalan oioin. Dalan ne’ebé Maromak hatudu ba ida seluk la hanesan ho ba ita. Maromak hatene bainhira mak Nia dada ita no oinsá Nia dada ita ba Nia,” Amu Basílio esplika.

Iha Bíblia, Don Basílio haktuir, dehan Maria rai buat hirak ne’e hotu iha Nia fuan, ne’e katak Nia haree bibi-atan sira ba adora Kosok Oan Jezús iha balada nia han fatin. Nia dehan bibi-atan sira ne’e mak kanta bá Jezús.

“Ita hametin ita nia fiar ho esperiénsia ne’ebé ita ida-idak koko. Dala barak esperiénsia aat, todan no ita sente hanesan hanehan ita nia moris, mak Maromak hatudu Nia dalan no hatudu Nia prezensa iha ita nia vida.”

Loron paz, loron ida ne’e, tuir Don Basilio, Santu Paulo Sestu bainhira funu Vietname nian, funu entre nasaun barak komesa mosu tempu ne’ebá atu da’et ba funu mundiál nian,  Santu Paulo Sestu konvida mundu tomak atu hanoin ida-idak nia kontribuisaun ba paz.

“Amu papa Paulo Sestu dehan hanesan ne’e, se o hakarak paz hahú hosi o nia fuan, se o hakarak mundu atu sai paz, hahú hosi o nia uma laran, se o hakarak paz evita buat ne’ebé kontribui ba funu. Ne’e duni maluk sira, paz ne’e buat ne’ebé ita hotu mehi,” Don Basílio afirma.

Ohin loron COVID-19, Amu Basílio tenik, halo ema hotu iha mundu atu bulelu. COVID ida-ne’e halo uma laran fraku, ekonomia família  fraku, to’o fulan ikus, ferik-katuas haree malu matan la mós. Iha lia-dadolin ka lia-menon ida dehan, iha fatin ne’e paun la iha, ema hotu-hotu hirus malu, maibé ida la iha fó razaun tanba la’ós sala ida ne’e ka sala ida ne’ebá nian, maibé tanba konjuntura ne’e mak halo ita minima atu moris hodi hada’et malu ba família.

Hafoin buat hirak ne’e bele lori ba buat seluk, katak Don Basílio, bele lori ema hadau ema nia sasán, na’ok ema nia sasán no buat ida sériu ne’e  iha. Ne’e duni Amu Papa Paulo Sestu dehan, hakarak paz hahú hosi uma laran.

“Husu bá Nossa Señora atu husu bá Maromak haraik mai ita kapasidade paz nian, atu ita hatene lee paz ho Nossa Señora Nia matan, rai buat hotu-hotu iha Nia fuan,” Don Basílio afirma tan.

 Jornalista: Francisco Simões

Editór: Agapito dos Santos

PUBLISIDADEiklan

HAKEREK NO HATÁN

Please enter your comment!
Please enter your name here