Saudozu Nicolau dos Reis Lobato. Imajen/espesiál

DILI, 31 dezembru 2020 (TATOLI)-Primeiru-Ministru (PM), Taur Matan Ruak, hato’o ksolok ba komemorasaun loron nasionál eroi ba dala-42, ne’ebé kada tinan monu iha loron 31 dezembru, nu’udar onra  ba eroi sira hotu ne’ebé fakar ran hodi Timor-Leste bele sai país ida livre no independente.

“Iha ne’ebé de’it  mak  ita-boot sira iha, mai ita ida-idak hakruk hodi fó minutu ida iha hakmatek ba ita-nia eroi sira, hahú husi Eroi boot Saudozu Prezidente Nicolau Lobato, Saudozu Xavier do Amaral no eroi hotu-hotu ne’ebé ita la temi naran  hotu,” Xefe Governu hato’o mensajen ba loron nasionál Eroi liuhosi nota ne’ebé Agência TATOLI asesu, kinta ne’e.

PM konvida sidadaun hotu atu halo reflasaun ba sakrifísiu eroi sira ne’ebé luta durante okupasaun.

“Mai ita hanoin hikas sira-nia sakrifísiu ne’ebé halo ona ba Timór, sira husik hela nasaun ne’e ba ita no ohin ita hotu goza. Ita hotu harohan atu sira kontinua tau matan mai ita no halo ita iha unidade no hamutuk  hodi hasai povu husi kiak no mukit maski  independentemente  ita-nia polítika no hanoin  la hanesan,  maibe objetivu boot  ida-de’it ba bem estar povu nian,” nia subliña.

Kada tinan iha loron Eroi, Estadu sempre komemora loron ne’e hodi no realiza seremónia hasa’e bandeira no tau ai-funan iha rotunda Saudozu Prezidente Nicolau Lobato, Comoro, maibé tinan ne’e Governu deside la komemora tanba situasaun pandemia COVID-19 ne’ebé afeta mundu tomak inklui Timor-Leste no implementasaun Estadu Emerjénsia ho medida ne’ebé rigór.

Ohin loron hanesan loron atu hanoin hikas Saudozu Prezidente Repúblika Demokrátika Timor-Leste (RDTL) no Komandante em Chefe das FALINTIL, Nicolau dos Reis Lobato nia mate iha 31 dezembru 1978, ne’ebé sakrifika-an hodi lori Timor-Leste hetan independénsia ho filozofia moris ‘A Última Bala é a Minha Vitória’.

Nicolau Lobato moris iha 24 maiu 1946 iha Sasatan-oan, Aitara Hun, Soibada, postu administrativu Laclubar, munisípiu Manatuto, hanesan oan dahuluk husi aman Narcísio Manuel Lobato husi Leorema, postu administrativu Bazartete, munisípiu Liquiçá no Felismina Alves Lobato, hanesan Soibada-oan ne’ebé moris iha Malurucumo/Macadique, postu administrativu Uatulari, munisípiu Viqueque.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here