Memensio Sequeira Freitas.

(Reflesaun pesoál hodi fó onra ba “EROI” sira ne’ebé luta ba TL nia Independénsia)

 Hosi: Memensio Sequeira Freitas*)

“Se ohin ita konta de’it sira-ne’ebé sei moris ne’e nia istória ou ita sira be moris hela ne’e konta loos de’it ita-nia istória, entaun sé loos mak sei konta sira hirak ne’ebé mate ona ne’e nia istória? Sé loos mós mak sei konta sira hirak be lian laek ne’e nia istória mezmu sira mós kontribui boot tebtebes ba Luta naruk ida ne’e?”

Daudaun ne’e, iha rede sosiál, ita akompaña hela diskusaun sira kona-ba prosesu luta ba Ukun Rasik Aan. Sé mak luta liu sé? Ukun aan ida-ne’e akontese tanba “pregu” no selu-seluk tan. Diskusaun sira hanesan ne’e tuir loloos mosu kle’ur ona no ema barak mak envolve aan hodi halo diskursu invensaun oioin. Ita lahatene! Maibé, sira balun ne’ebé envolvidu iha diskusaun hirak ne’e mak sira-ne’ebé uluk lahohi ukun rasik aan ka sira balun ne’ebé iha momentu ne’ebá ho otas ne’ebé sei nurak no lahatene duni kona-ba prosesu naruk ida-ne’e. Maibé, ema barak mós lakohi ona tau preokupasaun ba asuntu sira hanesan ne’e, tanba hetan ona esplikasaun dala barak hosi autór prinsipál sira rezisténsia nian iha eventu oioin. 

Infelizmente, diskusaun ida-ne’e sei kontinua mosu manas liután bainhira líder sira ne’ebé sai mós autór prinsipál ka autór xave ba prosesu rezisténsia nian tomak komesa kakisuk malu ho ideia frontal, antagonis no ho emosionál kona-ba mamosuk balun iha rezisténsia nia laran. Ita hotu lahatene! Sá rezultadu mak sei mosu hosi diskusaun indireta sira-ne’ebé hamosu hosi ita-nia líder nasionál hirak ne’e? Seráke diskusaun sira-ne’e mosu atu dezafia foinsa’e sira atu estuda didi’ak liután hosi istória pasadu ka tanba líder sira mak hakarak-duni atu haksesuk malu ho interese polítika ruma? Ka tanba tempu duni ona atu líder sira-ne’ebé mós hanesan autór prinsipál ba luta ida-ne’e hakarak hatuur loloos hela istória ita-nia rezisténsia nian? Se nune’e-duni karik, tanbasá sira la tuur hamutuk mak konta maibé ida-idak tenke hamriik iha ida-idak ninia parte rasik? Ita hotu lahatene, tanba sá mosu diskusaun ida-ne’e!

Intensaun saida de’it mak haksumik aan iha diskusaun ida-ne’e, ha’u hanoin katak la divia ita foinsa’e sira ne’ebé foin moris karik atu envolve aan iha diskusaun ida-ne’e, tanba ita-nia nivel la to’o ho katuas boot sira. Satán, ita-nia envolvimentu iha diskusaun ida-ne’e hanesan atu inventa tan de’it istória loloos ne’ebé ema barak mós hatene hela! Realmente, ema balu uza identidade falsu iha facebook, hodi komesa inventa istória loloos hodi dezvaloriza instituisaun sira balun ne’ebé sai mós hanesan parte integradu hosi luta naruk ida-ne’e. To’o balun konsidera de’it mak parte kulminante hosi luta ida-ne’e. Katak, konsidera liu mak konsulta populár hodi ignora prosesu tomak hosi luta naruk ida-ne’e. Invensaun sira hanesan ne’e tuir loloos, la’ós buat ne’ebé di’ak ba edukasaun foinsa’e sira-nian. Tanbasá? Tanba, nasaun ne’ebé boot mak nasaun ne’ebé hatene valoriza ninia istória rasik.

Papel hosi Organizasaun no Líder Rezisténsia Sira-Nian

Nu’udar timoroan sira hatene katak bainhira mosu Revolução dos Cravos iha Portugál, implika kedas mós polítika foun Portugál nian hasoru ninia rai koloniál sira inklui Timor-Leste. Portugál fó kedas liberdade ba rai koloniál sira atu deside rasik sira-nia futuru. Tuir fonte istória balu katak hafoin revolusaun refere, doutór Almeida Santos to’o kedas iha Timor-Leste iha loron 4 fulan maiu tinan 1974 atu fó liberdade ba timoroan sira atu hakotu rasik ninia distinu liuhosi opsaun tolu (3) mak kontinua ho Portugál nu’udar Estadu Federál ida hodi prepara ba ukun rasik aan, integra ba rai rohan Indonézia nian ka autodeterminasaun imediata (Sr. Terra Mau-Bulak, autór prinsipál ida ba luta ukun rasik aan, entrevista iha 25 outubru 2020).

Ho nune’e mak mosu kedas ona partidu polítiku iha Timor-Leste ne’ebé hahú hosi fundasaun ba UDT iha loron 11 fulan maiu tinan 1974 ne’ebé harii hosi Francisco Lopes da Cruz ho timoroan sira seluk inklui Carascalão sira. UDT formadu no organizadu atu apoiu teze neokolonialista ida ba federasaun ho Portugál.

Iha loron 20 fulan maiu tinan hanesan, timoroan sira hanesan Nicolau dos Reis Lobato, Marí Alkatiri, Francisco Xavier do Amaral, José Ramos Horta no sira seluk tan (balu to’o agora sei moris), harii mós partidu ida ho naran Associação Social Democrata Timorense (ASDT) ne’ebé ho metas prinsipál mak autodeterminasaun imediata hosi Portugál. ASDT depois nakfilak aan ba FRETILIN iha loron 11 fulan setembru tinan 1974 ho intensaun atu akumula nasionalista timoroan sira tomak hodi hamutuk ba ukun rasik aan. Iha loron hanesan, estudante timoroan sira hosi Portugal hanesan Vicente dos Reis (Sahe), António Carvarino (Mau-Lear), Abílio Araújo, Guilhermina (Abílio nia espoza) Muki Bonaparte no sira seluk tan ne’ebé hakarak uza teoria revolusaun ida, hodi nune’e bele alkansa lalais metas ukun rasik aan nian.  Dalaruma, akuzasaun komunista hasoru FRETILIN ne’e mosu tanba teoria revolusaun ne’ebé konstela hamutuk iha misaun nabilan FRETILIN nian.

Tuir istória balu ne’ebé ha’u hetan asesu iha shorturl.at/frtP7 hateten katak “O governo português prometeu a independência, mas surgiram de imediato dois grupos oportunistas, a União Democrática Timorense, organizada para apoiar a tese neocolonialista de uma “federação” com Portugal, e a Associação Popular Democrática Timorense (APODETI) que propunha a integração na Indonésia. Perante este desafio, a ASDT respondeu aprofundando as suas definições e transformando-se, a 11 de Setembro de 1974, na Frente Revolucionária de Timor Leste Independente (FRETILIN). Inicia-se um período de disputa entre os interesses portugueses, as intensões Indonésias de anexação e os independentistas. Em Agosto de 1975, a UDT tenta um golpe de Estado, contra o qual, a 15 do mesmo mês, a FRETILIN proclama a insurreição geral armada. As unidades do exército colonial em Timor colocam-se sob as ordens do Comité Central da Frente de Libertação, a administração portuguesa abandona o país e, já controlando todo o território, a 28 de Novembro de 1975 a FRETILIN declara a independência, criando a República Democrática de Timor Leste”.

Hafoin proklamasaun unilateralmente hosi FRETILIN iha loron 28 fulan novembru tinan 1975, Komité Sentrál FRETILIN (CCF, sigla portugés) forma kedas ninia Governu Konstitusionál ba dahuluk ne’ebé xefia hosi Primeiru Ministru, saudozu no komandante boot Nicolau dos Reis Lobato ho ninia Membru Governu sira altura ne’ebá. Enkuantu ida-ne’e, nu’udar proklamadór no nu’udar Prezidente FRETILIN, saudozu Francisco Xavier do Amaral toma pose nu’udar primeiru Prezidente Repúblika Demokrátika Timor-Leste nian.

Durante invazaun Indonézia nian ne’ebé mosu iha loron 7 fulan dezembru tinan 1975, lideransa sira Komité Sentrál FRETILIN CCF (sigla portug’es) tula iha sira-nia kabaas responsabilidade atu organiza no orienta funu hodi defende proklamasaun ba RDTL ne’ebé sira halo ona iha loron 28 fulan novembru tinan 1975. Tuir sasin moris ua’in ne’ebé evakua mós ba ai-laran durante baze apoiu nian haktuir katak embora funu no inimigu harahun tuituir FRETILIN nia baze sira maibé membru CCF destakadu sira iha fatin-fatin kontinua hala’o serbisu oioin tuir orientasaun hosi CCF nian rasik.

Biar baze apoiu rahun iha 1978 no grande homem hanesan Nicolau Lobato mate iha batalla, FRETILIN firme nafatin hodi organiza funu. Ezatamente, hafoin Nicolau Lobato mate, Xanana Gusmão hamriik hanesan membru CCF sobrevivente ida hamutuk ho sira seluk reorganiza funu hodi lori Timor-Leste konkista duni ukun rasik aan. Hahú kedas ho Konferensia Nasionál iha Maubai, Xanana Gusmão muda estratejia funu nian hodi despartidariza FALINTIL hosi FRETILIN ne’ebé uluk nu’udar braço armada FRETILIN nian. Hahú hosi despartidariza FALITNTIL hosi FRETILIN iha loron 7 Dezembru 1987, FALINTIL sai ona liman kro’at Povu Timór tomak nian.

Biar FALINTIL sai hosi FRETILIN no embora Maun Boot Xanana Gusmão muda estratejia funu nian maibé maun boot la hamate no nunka halakon FRETILIN! Faktu konkreta mak Comité Diretiva FRETILIN (CDF) moris nafatin iha ai-laran no la’o nafatin ho Comando da Luta no ho FALINTIL tomak hodi halo polítika sobre kauza ukun rasik aan nian. Aleinde estrutura militár, ita hotu lembra katak eziste mós estrutura polítika (kargu sivíl) iha luta FRENTE ARMADA nia laran. Tuir sobrevivente balu hosi frente armada hateten katak “Biar katuas Xanana dispartidariza FALINTIL hosi FRETILIN, maibé ami barak asume funsaun dupla (hanesan militár no polítika dala ida de’it) tanba ema la to’o. FRETILIN nunka mate no la’o hamutuk nafatin ho FALINTIL no hotu-hotu hetan orientasaun hosi katuas Xanana nu’udar Komandante em Xefi ba FALINTIL”.

Iha sorin seluk membru frente klandestina balu ne’ebé uluk serbisu hamutuk ho saudozu Keri Laran Sabalae no sira seluk klarifika katak FALINTIL sai hosi FRETILIN ne’e tanba atu sai forsa nasionál (liman kro’at povu nian) no la’ós ona liman kro’at direta FRETILIN nian. Hafoin re-estruturasaun funu nian, Xanana Gusmão mak sai hanesan Komandante no Xefe FALINTIL enkuantu Komité Diretiva FRETILIN ne’e xefia hosi Mau-Huno Bui-Lerek Karakatayana. Hafoin ema kaptura Mau-Huno, Nino Konis Santana mak asume fali pasta ida no sai mós Xefe ba Konsellu Frente Armada enkuantu Taur Matan Ruak hola knaar nu’udar Xefe Estadu Maior FALINTIL nian. Bainhira Nino Konis Santana mate iha Mertutu-Ermera iha 11 Marsu 1998, Taur Matan Ruak mak lidera Rezisténsia Armada no Lú Olo mak asume Sekretáriu CDF iha Ai-laran.

Bele dehan katak FALINTIL nunka la’o mesak iha rezisténsia. Iha FALINTIL nia sorin, sempre iha estrutura FRETILIN (ke tama konta ba funsaun sira sivíl katak polítika nian) hodi hamutuk ho Komandante em Xefe FALINTIL hodi lori funu ida-ne’e ba oin. Tanba ida-ne’e-duni mak ita rona estrutura rezisténsia nian balu hanesan asistente no adjuntu, kargu rua ne’e nu’udar kargu polítika no la’ós kargu militár. Iha sobrevivente balu hosi frente armada hateten katak iha tempu rezisténsia nian, polítika mak halo desizaun ba militár sira hodi implementa. Maibé nu fundu, tantu militár komu sivíl, hotu-hotu hetan orientasaun hosi Komandu Superiór Luta nian ne’ebé xefia hosi komandante boot Kayrala Xanana Gusmão.

Ho nune’e duni, mak ita la divia minimiza hela papel importante ne’ebé asume hosi FRETILIN no líder sira seluk rezisténsia nian. Timoroan barak la aseita se ita foti loos de’it líder balun enkuantu ita nega tiha líder seluk nia papel importante. Membru frente armada balu ne’ebé sei moris to’o dehan katak, “Se bainhira ema kaptura tiha komandante Xanana iha 1992, FALINTIL no soldadu tomak dezmoralizadu, dezorientadu, dezmotivadu no hotu-hotu deside atu rende iha altura ne’ebá karik, ita sei la ukun an”. Ne’e atu dehan katak komandante ida bele di’ak no matenek, maibé sé soldadu sira la koopera mak komandante nia misaun ne’e sei la atinje.

No ida-ne’e la prova iha ita-nia funu naruk ida-ne’e. Biar ema kaptura maun boot Xanana Gusmão, maibé membru tomak frente armada nian, hahú hosi komandante sira to’o soldadu baibain ida, dezde sira-ne’ebé asume kargu militár to’o sira-ne’ebé asume kargu sivíl, hotu-hotu determinadu atu kontinua luta naruk ida-ne’e to’o ita hetan oportunidade nabilan hodi halo Konsulta Populár iha loron 30 fulan Agostu tinan 1999 ne’ebé lori duni ita ba ukun rasik aan. Iha ai-laran dehan A luta Continua katak ida mate ka inimigu kaer ida seluk troka hodi komanda funu, ida-ne’e dezde prinsipiu luta libertasaun nasionál ne’ebé FRETILIN orienta iha 1975.

Aleinde FRETILIN no FALINTIL, ita mós labele minimiza papel hosi organizasaun massa iha ita-nia rai laran no iha rai-li’ur sira hanesan iha Indonézia. Juventude Loriku Assua’in sira-nia papel mós importante no influensiadu boot tebe-tebes ba luta ida-ne’e. Membru klandestina sira, estafeta sira, responsável kaixa klandestina sira no hirak ne’ebé luta iha rai li’ur hotu-hotu asume papel importante ba luta naruk ida-ne’e hodi ohin ita hetan ukun rasik aan. Nune’e mós ita labele nega ka haluha papel importante hosi Igreja Katólika no konfisaun relijiozu sira seluk. Bispu Don Martinho Lopes no Dom Carlos no Amu-lulik lubuk ida ne’ebé ho partikularmente kontribui tebes ba luta naruk ida-ne’e, inklui timoroan sira seluk ne’ebé karik naran nunka mosu iha istória rezisténsia nian.

La’ós de’it determinasaun no konsisténsia hosi frente armada de’it mak importante maibé ita-nia frente klandistina no frente esterna mós nafatin la’o tuir orientasaun hosi komandu luta nian, hodi kontinua serbisu tuir ida-idak ninia papel tuir sira-nia responsabilidade. Ita bele rekoñese no labele nega katak ho polítika Unidade Nasionál, halibur tebes timoroan sira hotu-hotu (kuaze maioria, liuliu iha períodu sira ikus antes ita hakat ba Konsulta Popular. Tanba ne’e mak ita labele rekoñese de’it mak Konsulta Populár, maibé funu ida-ne’e konta kedas hosi loron 7 fulan dezembru tinan 1975 to’o loron 30 fulan agostu tinan 1999.

Komandante Lere rasik mós deklaran iha CCD iha loron 11 fulan novembru 2013 katak “Xanana Gusmão nu’udar profesór no mestre ba revolusaun iha Ázia nia laran no Amilcar Cabral iha Áfrika ne’ebá. Xanana mestre duni, maibé nia mós nu’udar alunu. Ha’u la fiar nia define estratejia funu nian ho ninia esperiénsia rasik maibé ho esperiénsia hosi ita-nia funu na’in barak ne’ebé mate ona”. Komandante Lere akresenta tan katak  “os fins justifique os meios, os fins mak ita-nia ukun aan no os meiu mak sala no loos ne’ebé Xanana no funu na’in sira hotu komete durante rezisténsia naruk ida-ne’e”. Ne’e mós atu dehan katak Xanana hanesan komandante boot depoizde Nicolau Lobato. Iha funu-laran la halo de’it buat loos maibé halo mós buat balu sala hamutuk ho rezisténsia nia emar sira.

Ba ida-ne’e, maun boot Xanana mós deklara iha debate refere katak “se FRETILIN komete erru ruma karik durante períodu rezisténsia nian, mak ha’u prontu atu asume responsabilidade ba erru sira-ne’e hanesan membru Komité Sentral FRETILIN ida iha altura ne’ebá. Se maun boot Xanana rasik prontu nafatin atu asume responsabilidade ba erru ne’ebe komete hosi FRETILIN no korpu tomak rezisténsia nian, pois tanbasá mak ita sei kestiona nafatin FRETILIN ho akuzasaun oioin? Komandante Falur rasik mós deklara partikularmente katak “iha funu, laiha ema ida mak liman moos, hotu-hotu hariis raan tanba momentu ne’ebá ne’e situasaun mak obriga. Se ita rekere ba ema ne’e pois ida-ne’ebá fali sé mak atu rekere fali”? Ne’eduni, ha’u hanoin ideia brillante sira hosi funu na’in no pesoa importante sira rezisténsia nian ne’e mak sai ona nu’udar liafuan kmanek no di’ak ida atu ita la halo diskusaun sira aserka luta ba ukun rasik an ida-ne’e.

Ba ha’u, FRETILIN, FALINTIL, maun Xanana Gusmão, Taur Matan Ruak, Lú Olo, Lere Anan Timur no sira seluk ne’ebé sei moris to’o ohin loron hanesan mós ho sira hirak ne’ebé mate ona. Tantu sira iha frente armada komu sira hotu iha frente klandistina no frente esterna hotu-hotu asume responsabilidade boot ba luta naruk ida-ne’e, hodi ohin ita moris iha país ida livre no soberanu. “Se ohin ita konta de’it sira-ne’ebé sei moris ne’e nia istória ou ita sira be moris hela ne’e konta loos de’it ita-nia istória, entaun sé loos mak sei konta sira hirak ne’ebé mate ona ne’e nia istória? Sé loos mós mak sei konta sira hirak be lian laek ne’e nia istória mezmu sira mós kontribui boot tebtebes ba Luta naruk ida ne’e?”

*) Hakerek na’in nu’udar profesór ida no daudaun ne’e hela iha Manleuana Dili.

 

HAKEREK NO HATÁN

Please enter your comment!
Please enter your name here