Segundu Komandante Polísia munisípiu Dili, Superintendente Euclides Belo. Imajen TATOLI/ António Gonçalves

DILI, 30 dezembru 2020 (TATOLI)- Komandu Polísia Munisípiu Dili koopera ho ekipa Ministériu Saúde, ohin, halo operasaun no sosializasaun informasaun prevensaun COVID-19 hodi haruka fila família atus-resin  ne’ebé asiste serimónia graduasaun ba estudante finalista na’in 302 hosi Institutu Superiór Kristál (ISC, sigla portugés) ne’ebé hala’o iha Sentru Konvensaun Dili.

Notísia Relevante : PNTL asegura EE ba-dasiak

Segundu Komandante PNTL Dili, Superintendente, Euclides Belo, informa parte PNTL koopera ho Prezidente Fundasaun ISC, Agostinho Gonçalves, hodi haruka família barak ne’ebé asiste serimónia graduasaun ne’e hodi kumpre ba regra Estadu Emerjénsia (EE) ba-dasiak nian kona-ba distánsia sosiál.

Serimónia graduasaun ba finalista na’in-302 hosi fakuldade oin-oin ne’ebé hahú hosi tuku 9:00 to’o tuku 11:00 Otl, hetan kooperasaun di’ak hosi parte ISC no parte família sira.

PNTL husu mós ba família sira tenke fila ba uma, labele halo festa hodi kumpre regra kona-ba alterasaun dahuluk ba Dekretu Governu n. 18/2020, hosi loron 3 fulan-dezembru, kona-ba medida sira ba ezekusaun Deklarasaun Estadu Emerjénsia ne’ebé efetua hosi Dekretu Prezidente Repúblika n. 70/2020, hosi loron 3 fulan-dezembru.

“Polísia Munisipiu Dili mai observa prosesu graduasaun ba finalista sira hosi ISC ne’ebé simu graduasaun maka bele tama salaun hodi simu graduasaun to’o remata, no família atus-resin ne’ebé mai partisipa ami limita sira tama salaun no haruka sira fila para ita kumpre medida prevensaun COVID-19 ne’ebé fó sai ona,” Superintendente Euclides Belo, informa ba  Agência Tatoli iha CCD.

Nia dehan, tanba ema atus-resin maka partisipa serimónia graduasaun, tanba ne’e PNTL halo intervensaun hodi limita ema barak labele halibur malu hodi kontrola sira-nia distansiamentu sosiál.

“Ami haree família barak la kumpre regra no la tau máskara ami haruka sira fila, tanba ita haree ita-nia nasaun viziñu Indonézia númeru moras COVID-19 sa’e maka’as tebes,” nia hateten.

Parte PNTL Dili hamutuk ho Ministériu Saúde fahe mós máskara ba família sira hodi kontinua kumpre regra Estadu Emerjénsia.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here