Primeiru-Ministru interinu no atuál Vise Primeiru-Ministru no Ministru Planu no Ordenamentu, José Maria dos Reis, hamutuk ho membru Governu diskute pedidu renovasaun deklarasaun EE husi Prezidente Repúblika, iha sala plenária PN, kuarta (30/12). Imajen TATOLI/Egas Cristóvão

DILI, 30 dezembru 2020 (TATOLI)–Primeiru-Ministru (PM) interinu, José Maria dos Reis, konsidera suspende direitu sidadaun ida tenke liuhosi Estadu Emerjénsia (EE), tanba ne’e Governu solisita Prezidente Repúblika atu hato’o pedidu ba Parlamentu Nasionál (PN) ba deklarasaun EE iha territóriu tomak.

“Ita kontinua mai ho Estadu Emerjénsia tanba implika suspensaun direitu sidadaun ninian, ita laiha diploma seluk atu uza, tanba ne’e Governu kontinua husu Estadu emerjénsia tanba implika suspensaun direitu ema nian, la’ós de’it restrinje direitu maibé suspensaun direitu,” PM Interinu José Maria dos Reis hateten iha ámbitu diskusaun ba pedidu estensaun EE iha sala planária PN, kuarta ne’e.

Notísia Relevante: Alterasaun medida EE, bandu halibur liu na’in-10 exetu pertense família

Atuál Vise PM trata asuntu infraestrutura ne’e haktuir, iha loron 01 dezembru 2019, komunidade internasionál hahú hasoru COVID-19 ne’ebé ikus hanaran SarsCov2, hanesan ameasa boot tanba nível virulénsia ne’ebé a’as tebes, bele daet ba ema seluk no susar tebes atu trava maski halo esforsu barak ba prevensaun no kontrolu hosi entidade hotu.

Nia dehan, maski vírus ne’e ninia persentajen ba ema mate kiik maibé iha nível a’as ba virulénsia infeta ona ema millaun 80-resin iha mundu tomak no halo ema besik millaun $2 maka moris, liuliu sidadaun husi nasaun dezenvolvidu no iha sistema saúde avansadu.

“Moras COVID-19 hatudu katak sistema ezistente la sufisiente atu hasoru ameasa ida ne’e. Timor-Leste maski ho dezafiu barak maibé konsege sai ezemplu mundiál kombate vírus ne’e no hatudu kapasidade boot atu organiza no defende hosi fenómenu ne’ebé umilde, konsiente no efikaz,” nia akresenta.

Estratéjia sira ne’ebé define konsege kokretiza liuhosi kolaborasaun másima ho órgaun soberania hotu, ne’ebé tuir deklarasaun EE permite foti medida nesesáriu hanesan distasiamentu sosiál, kontrolu sanitária no epidemolójiku.

“Governu labele ignora mós susesu alkansadu desde fulan-marsu 2020 to’o mai agora iha prevensaun no kombate SarsCov-2, liuliu tanba sakrifísiu instituisaun no sidadaun hotu liuhosi demostrasaun ho esperítu luta fraternidade no sakrifísiu ba interese no bem estar comum.

Pedidu deklarasaun EE da-sia hatudu esperasaun ba produsaun vasina

Iha pedidu EE da-sia ne’e,  hatudu esperansa ho produsaun vasina oin-oin ho efikásia a’as iha mundu, ne’ebé hahú alerta fali tanba surjimentu mutasaun vírus ne’ebé tuir indikasaun sira ho virulénsia a’as liután katak iha fulan-ida nia laran de’it multiplika númeru infesaun lais tebes ho nível preokupante tebes.

Daudaun númeru kazu ativu iha nível mundiál liu ona millaun 20-resin no $100 iha Estadu krítiku.

“Ita-nia viziñu Repúblika Indonézia iha fronteira internasionál terrestre ho ita to’o ohin loron hamutuk 100  infetadu COVID-10 no ema na’in 20.000 maka lakon vida.

Liuhusi esforsu barak ba prevensaun no kombate liu husi kontrolu maka’as hosi fronteira Timor-Leste iha filafali kazu COVID-19 foun na’in-13 ne’ebé baixa hela iha fatin izolamentu Vera-cruz”, José Maria dos Reis subliña.

Kazu 13 foun ne’e konsidera hanesan kazu importadu hotu tanba afeta sidadaun ne’ebé foin tama iha territóriu nasionál husi rai liur no to’o ohin loron seida’uk iha indikasaun katak iha transmitasaun lokál no komunitáriu.

“Maski nune’e ho konsiente katak ita-nia sistema saúde iha limitasaun no frajilidade barak, tanba ne’e Governu konsidera importante iha preokausaun liuhosi medida sira ba Estadu Emerjénsia ne’ebé fó dalan atu garante kontrolu maka’as liután prevene transmisaun lokál no komunitária.

Governu husu autoriza deklara EE halo restrisaun ba direitu balun

Governu husu autorizasaun atu halo restrisaun direitu sira hanesan sirkulasaun internasionál, liberdade sirkulasaun, no fiksasaun iha rezidénsia iha kualker pontu territóriu nasionál, direitu ba reuniaun no ba manifestasaun, liberdade ba kultu, direitu ba rezisténsia, direitu ba propriedade, inisiativa ekonómika, no direitu traballadór sira nian.

Ezekutivu sira konsidera katak autorizasaun ne’e sei permite ho baze prinsípiu proporsionalidade, adekuasaun no nesesidade atu halo diluisaun ba medida estritamente nesesáriu ba prevensaun no kombate hasoru SarsCov-2 no ba protesaun família sira iha Timor-Leste.

Daudaun ne’e Governu iha planu atu hahú filafali medida sira ne’ebé mak implementa iha EE dahuluk iha marsu 2020, atu permite kontrolu COVID-19 liuhosi obrigasaun medida distánsiamentu sosiál ho mínimu metru 1 ho balun entre sidadaun sira la hola parte uma-kain ida bainhira la’o no halo sirkulasaun iha vida públika.

Obrigatóriu uza máskara ne’ebé taka inus no ibun, bainhira sirkula via públika, tama ba iha fatin públiku ka privadu ho asesu públiku no utilizasaun koletiva transporte públiku ba pasajeiru, fase liman molok tama ba resintu públiku ka privadu ho asesu públiku no utilizasaun koletiva.

Proibisaun hakibur malu ho ema liu na’in-10 ne’ebé la hala parte uma-kain ida, proibisaun ba organizasaun no partisipasaun iha eventu ka selebrasaun ne’ebé invole ema liu na’in-10 ne’ebé la halo parte uma-kain ida.

Ministériu Saúde iha ona apoiu husi ajénsia internasionál barak hodi hamutuk prepara programa vasinasaun ne’ebé atu implementa bainhira iha ona asesu ba vasina hodi bele proteje populasaun tomak no garante kondisaun atu reestabelese normalidade iha rai laran.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here