Ministra Negósiu Estranjeiru no Kooperasaun, Adaljiza Albertina Xavier Reis Magno. Imajen TATOLI/António Gonçalves

DILI, 30 dezembru 2020 (TATOLI)—Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, hateten to’o agora seidauk simu informasaun ruma husi diplomata iha Malázia relasiona ho timor-oan na’in-rua ne’ebé Governu Malázia kansela viajen mai Timor-Leste.

“Kona-ba progresu saúde rasik, ami seidauk hatene tanba presiza tempu atu haree fali rezultadu teste ne’ebé halo ne’e negativu ona ou lae? Maibé to’o agora sei pozitivu, ne’ebé na’in-ida pozitivu iha izolamentu. To’o ohin loron ha’u seidauk simu informasaun ruma husi ita-nia ema iha Malázia, ha’u hetan informasaun ikus naton sira tahan iha Malázia, maibé bainhira iha progresu ita-nia diplomata sira sei dehan mai ha’u,” Ministra Adaljiza informa ba Agência TATOLI iha Palásiu Governu, kuarta ne’e.

Iha loron 20 dezembru, timor-oan na’in-rua sai husi Inglatera, tránzitu iha Malázia iha loron 21 dezembru no iha loron tuir mai bainhira atu mai Timor-Leste, sa’e bá aviaun, ekipa responsável simu informasaun katak pasajeiru ida pozitivu COVID-19 no seluk laiha dokumentu teste Polymerase Chain Reaction (PCR), nune’e momentu ne’abá kedan ekipa kansela viajen timor-oan na’in-rua.

Governante ne’e dehan, diplomata timor-oan sira labele halo akompañamentu tanba regra iha nasaun ne’e la autoriza.

“Ida seluk kuarentena iha ne’ebá tuir regra Malázia nian, no ita-nia lei bandu kuandu ema ne’ebé laiha teste labele tama mai, entaun Malázia tenke tahan sira iha ne’ebá se lae aviaun ne’ebé tula bele viola ita-nia lei. Tanba iha kuarentena, entaun ita-nia diplomata labele bá vizita maibé akompaña de’it, tanba Governu Malázia mak toma konta tomak kuandu sira sai maka ita bele fó asisténsia ba sira,” Ministra akresenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here