Prezidente Parlamentu Nasional, Aniceto Guterres. Imajen Tatoli/Antonio Goncalves.

DILI, 30 dezembru 2020 (TATOLI)—Prezidente Parlamentu Nasionál, Deputadu Aniceto Longuinhos Guterres Lopes, hateten lei Orsamentu Jerál Estadu (OJE) ne’ebé promulga ona hosi Prezidente Repúblika  sei vigora iha 01 janeiru 2021.

Notísia Relevante: PN aprova estensaun Estadu Emerjénsia ba-dasiak

Kona-ba lei orsamentu hetan ona promulgasaun no edisaun espesiál Jornál Repúblika ohin mós públika tiha ona. Lei Orsamentu Jerál Estadu 2021 nian prontu vigora iha loron 01 janeiru 2021,” Prezidente Parlamentu Nasionál anunsia liuhosi plenária estraordinária Parlamentu Nasionál, kuarta ne’e.

Proposta-lei Orsamentu Jerál Estadu (OJE) ba tinan fiskál 2021 ho montante biliaun $1.895 iha finál  globál ho rezultadu votasaun a-favór 44, kontra 0 no abstensaun 0, bankada CNRT la hola parte iha diskusaun ne’e.

Prezidente Repúblika promulga ona OJE 2021 iha loron segunda, 28 dezembru 2020. Lei ne’e ho númeru 14/2020 kona-ba OJE 2021 públika ona iha Jornál Repúblika iha loron 29 dezembru 2020.

OJE ho montante biliaun $1.895 ne’e foti hosi reseita fundu minarai  biliaun $1.377.568 no reseita naun-petrolíferu millaun $508.475.

Hosi reseita fundu minarai biliaun $1.377.568 ne’e millaun $547.873 foti bazea Rendimentu Sustentável Estimadu (RSE) no Transferénsia Superiór Rendimentu Sustentável Estimadu (foti liu RSE) millaun $829.695.

Proposta-lei OJE ba tinan fiskál 2021 hamutuk biliaun $1.895 kompostu hosi saláriu no vensimentu millaun $239,2, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.

Iha Planu Anuál Governu nian iha 2021 reflete kontinuasaun traballu reforma jestaun finansa públika, ne’ebé inisia susesivu Governu nian liuhosi Roteiru orsamentasaun kada programa.

Tinan fiskál 2021 hanesan tinan finanseiru dahuluk ba departamentu hotu-hotu, institutu no entidade públika sira iha Governu implementa orsamentu kada programa.

Bazea livru 2 (planu anuál) deskreve iha OJE 2021 integra programa hamutuk 141, sub-programa 431 no totál atividade hamutuk 1,837.

Kuadru Planeamentu kona-ba orsamentasaun kada programa bazea ba Planu Estratégiku Dezenvolvimentu (PED) 2011-2030 no Objetivu Dezenvolvimentu Sustentável (ODS 2030), nu’udar dokumentu estratéjiku no dokumentu polítiku.

Prioridade 5 ba 2021 mak hanesan bem-estar sosiál, protesaun sosiál no sidadania ho despeza $645,180,926.00 (35.9%), investe iha ekonomia no finansa públika hamutuk $374,622,063.00 (20.8%), mellora konetividade nasionál $546,181,052.00 (30.4%), konsolida no fortalese defeza, seguransa no relasain externa $158,830,873.00 (8.8%), konsolida no fortalese justisa, demokrasia no direitu umanu $72,428,398.00 (4.0%).

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here