Sekretáriu Jerál partidu CNRT, Prezidente PLP, no Konselleru partidu KHUNTO hatudu nota plataforma ne’ebé asina iha otel Novu Turizmu, kinta, (1/2) hodi hamutuk hakat ba eleisaun antesipada. Foto Egas Cristovão

DILI, 30 dezembru 2020 (TATOLI)—Programa VIII Governu Konstitusionál ne’ebé dezeña hosi Aliansa Mudansa ba Progresu (AMP) oras ne’e hatutan hosi Plataforma Entendimentu ho kompromisu hakotu inserteza polítika.

Tempu liu ona. La sente nasaun ne’e tama iha inserteza polítika ne’ebé ema hotu preokupa. Atividade polítika nu’udar momentu istóriku ne’ebé povu tomak sei la haluha maske povu maduru liu iha situasaun inserteza ne’e. Tinan 2020 hela de’it loron balun atu tama ba tinan foun 2021. Presiza antesipadamente hasoru situasaun ekonomia, polítika ne’ebé ita hotu hein saida mak atu akontese tán.

Tanba ne’e, presiza reflesaun sériu hosi perspetiva hotu-hotu ba interteza polítika ne’ebé nasaun ne’e enfrenta hodi dezenvolve povu no Estadu nia moris ne’ebé kualidade liu iha futuru. Biar iha diverjénsia polítika maibé Repúblika Demokrátika Timor-Leste tenke la’o ba-oin no respeita ba lei inan, tanba konstituisaun mak regula instrumentu polítiku hotu-hotu.

Ezisténsia VIII Governu

VIII Governu konstituisionál forma hosi partidu tolu (3) kompostu hosi Congresso Nacional da Reconstrução de Timorense (CNRT), Partidu Libertasaun Popular (PLP) no Kmanek Haburas Unidade Nacional Timor Oan (KHUNTO) liuhosi rezultadu Eleisaun Antesipada (EA) 2018. Koligasaun ne’e forma liuhosi Aliansa Mudansa ba Progresu (AMP). CNRT ho kadeira 21, PLP kadeira 8 no KHUNTO kadeira 5.

Programa VIII Governu Konstitusionál nu’uar instrumentu polítiku ba tinan lima, ne’ebé reflete aspirasaun povu timor nian no mós fó-sai medida prioritária sira ba dezenvolvimentu sustentável, hanesan define ona iha ‘Planu Estratégiku Dezenvolvimentu 2011-2030’.

Ezekutivu ida ne’e, durante nia mandatu, sei kontinua kontribui ba transforma Timor-Leste sai nasaun ne’ebé iha rendimentu ki’ik ba país ida ho rendimentu médiu-aas, país iha-ne’ebé populasaun moris iha seguransa nia laran no saudável, instruída no próspera.

Programa Governu nian inkorpora roteiru (dalan) ne’ebé Timor-Leste define tiha ona atu kumpri  “Ajenda 2030 ba Dezenvolvimentu Sustentável, hosi Nasaun Unida”, ninia meta ho prioridade ho “Objetivu Dezenvolvimentu Sustentável (ODS)”, atu bele atinje progresu sira-ne’ebé konkretu ba dezenvolvimentu sustentável.

Ajenda Globál ida ne’e iha 17 ODS, ne’ebé buka hatán ba nesesidade emar-nian, hodi realsa katak labele iha ema ida ne’ebé husik hela iha kotuk, atu garante futuru ne’ebé di’akliu ba timoroan sira hanesan ba mundu tomak.

Timor-Leste mós asume tiha ona kompromisu polítiku ba implementasaun Ajenda ida ne’e no Timor-Leste envolvidu iha inkluzaun (ka atu hatama) “Objetivu 16 – pás, justisa no Instituisaun efikáz responsável no inkluziva, iha nível hotu-hotu”, tanba Timor-Leste hatene katak, sé laiha pás, justisa no instituisaun forte no efikáz, difísil tebe-tebes atu implementa objetivu sira seluk, ne’ebé indispensável ba dezenvolvimentu sustentável.

Hafoin programa VIII Governu pasa iha Parlamentu Nasionál, aprezenta mós Orsamentu Jerál Estadu (OJE) 2019 ho montante biliaun $1.4 ho rezultadu votasaun a-favór 40 no kontra 25.

Durante 2019 situasaun polítika la’o di’ak tanba OJE 2019 aprovadu iha Parlamentu Nasionál maibé atu debate OJE 2020 hamosu problema tanba partidu sira-ne’ebé forma Aliansa Mudansa ba Progresu la entende malu.

Primeiru-Ministru, Taur Matan Ruak, hamutuk ho membru Governu sira partisipa iha diskusaun jeneralidade OJE 2020 ba loron daruak nian iha Parlamentu Nasionál (PN), tersa ne’e. Imajen Tatoli/ Egas Cristóvão.

VIII Governu lideradu Primeiru Ministru Taur Matan Ruak aprezenta proposta-lei OJE 2020 ba Parlamentu Nasionál maibé Xefe Governu deside retira proposta OJE 2020 ho montante biliaun $1.995 iha loron 3 dezembru 2019 (faze jeneralidade loron daruak), tanba la estruturadu no inskonstitusionál.

Nune’e Governu kumpri rekomendasaun Parlamentu Nasionál nian hodi redúz ba biliaun $1,668. Proposta-lei 2020 ne’e governu aprezenta hikas ba PN iha 19 dezembru 2019 maibé iha loron ikus faze espesialidade orsamentu ne’e la pasa.

Proposta OJE ho montante Biliaun $1,668 la pasa iha jeneralidade loron datoluk, iha loron-sesta (17/1/2020) ho votu a-favór 13, kontra 15 no abstesaun 25.

Ho orsamentu 2020 ne’ebé la aprova, Prezidente Repúblika Francisco Guterres “Lú Olo” bolu partidu polítiku asentu parlamentár ho opsaun tolu (3); mantein Taur Matan Ruak lidera VIII Governu to’o hakotu mandatu, orienta partidu asentu parlamentár sira buka-malu no eleisaun antesipada nu’udar rekursu ikus liu.

Koligasaun Foun

Partidu lima hamutuk ho CNRT asina ona akta koligasaun atu forma IX Governu Konstitusionál. Imajen espesiál

Partidu Neen (6) kompostu hosi CNRT, KHUNTO, PD, UDT, FM no PUDD asina akta koligasaun iha loron sábadu, 22 fevereiru 2020 iha sede CNRT, Bairro dos Grilhos, Dili.

Akta ne’e asina hosi Prezidente CNRT, Kay Rala Xanana Gusmão, Prezidente PD, Mariano Assanami Sabino, Prezidente KHUNTO, Armanda Berta, dos Santos, Prezidente En-Ezersísiu UDT, Rodolfo Aparício Guterres, Prezidente En-Ezersísiu Frente-Mudansa (FM), Egídio de Jesus no Prezidente PUDD, António de Sá Benevides.

Iha loron 20 fevereiru PD liuhosi desizaun konferénsia extraordinária hodi hamutuk ho CNRT forma koligasaun foun maibé iha loron 7 maiu 2020, Prezidente PD, Maria Assanami “Sabino” liuhosi Konferénsia Imprensa apoia kualkér governu.

Karta demisaun PM Taur Matan Ruak

Konferénsia imprensa Partidu CNRT, PD, KHUNTO, PUDD no UDT/FM, kona-ba akta koligasaun foun atu harii IX Governu Konstitusionál. Imajen Tatoli/ dok.

Prezidente-Repúblika (PR), Francisco Guterres ‘Lú Olo’ simu karta demisaun hosi Xefe Governu iha loron domingu, 24 fevereiru 2020 no Primeiru-Ministru, Taur Matan Ruak rasik deklara karta demisaun ne’e iha loron segunda, 25 fevereiru 2020. Iha loron kuarta, 08 abríl 2020, Primeiru-Ministru, Taur Matan Ruak, retira nia karta demisaun tanba ho razaun surtu COVID-19.

Iha loron sábadu, 7 marsu 2020, Partidu CNRT reafirma pozisaun liuhosi konferénsia estraordinária ida hodi hamutuk partidu lima forma koligasaun bazeia ba ejizénsia Prezidente-Repúblika, Francisco Guterres ‘Lú Olo’.

Iha loron 7 marsu 2020 ne’e mós KHUNTO deklara liuhosi Kongresu Nasionál hodi integra hamutuk ho CNRT iha koligasaun foun maibé iha loron 29 fulan-abríl 2020, KHUNTO deklara sai hosi koligasaun ho razaun atu mantein apoia ba VIII Governu Konstitusionál no respieta Xanana maibé KHUNTO hadomi liu povu.

Entretantu partidu PUDD, UDT no FM hala’o konferénsia estraordiária hamutuk ho CNRT bazeia ba pedidu Prezidente Repúblika, iha loron domingu (8/3/2020).

Purtantu Koligasaun foun ne’e lidera hosi Prezidente CNRT, Xanana Gusmão hasoru Prezidente-Repúblika, Francisco Guterres ‘Lú Olo’ iha loron 6 marsu 2020.

Nune’e iha loron 10 fulan-marsu, portavos koligasaun foun, António da Conçeição ‘Kalohan’ aprezenta karta foun hodi husu audiénsia ho xefe estadu ba daruak nian maibé xefe estadu la resposta.

Hasoru Pandemia Coronavirus

Ekipa Médiku Jerál COVID-19 ne’ebé destaka iha Fronteira Batugade, Bobonaro, lori ai-moruk líkidu rega ekipamentu no estudante Timoroan ne’ebé viajen tama Timor-Leste liuhosi postu fronteira Batugade, kinta (02/04/2020). Imajen/Eugénio Pereira

Iha loron sesta, 21 marsu 2020, ekipa jestaun krize fó-sai timoroan pozitivu COVID-19, ema ne’ebé pozitivu hanesan estudante hafoin hakat liu fronteira RI no TL.

Ho pandemia globál ne’e, Parlamentu Nasionál autoriza ona Prezidente Repúblika dekreta estadu emerjénsia dala-sia ona (dasia). Purtantu ekipa COVID-19 hosi Ministériu Saúde anunsia iha loron 28 dezembru 2020 ne’e katak, kazu konfirmadu ba surtu ne’e hamutuk 13.

Hosi pasiente COVID-19 ne’e, ema na’in-tolu halo hela tratamentu iha sala izolamentu RAEOA no na’in-10 iha sala izolamentu sentru saúde Vera-Cruz, Dili.

Destituisaun ne’ebé mosu iha Parlamentu Nasionál

Iha loron 18 maiu 2020, situasaun iha plenária parlamentu hahú manas no tama iha loron 19 maiu 2020 rezulta meza prezidénsia baku-fila no laiha investigasaun atu deside see mak loos no see mak sala tanba ne’e aktu polítiku.

Deputadu CNRT, José Virgílio, baku-fila Meza Prezidente Parlamentu Nasionál (PPN). Imajen Tatoli/António Gonçalves.

Hafoin meza prezidénsia baku-fila, Deputadu na’in-36 hosi Bankada parlamentár Frente Revolusionária Timor-Leste Independente (FRETILIN), Partidu Libertasaun Populár (PLP) no Kmanek Haburas Unidade Nasionál Timor Oan (KHUNTO), aprova  pedidu destituisaun ho votu a-favór 36 ne’ebé bankada FRETILIN kontribui votu 23, KHUNTO votu 5 no PLP votu 8. Purtantu laiha kontra no abstensaun iha momentu ne’e.

Iha momentu ne’e, Bankada parlamentár FRETILIN), PLP, KHUNTO no Partidu Demokratiku (PD) apoia Aniceto Guterres troka Prezidente Parlamentu Nasionál, Arão Noé de Jesus da Costa Amaral. Rezultadu Votasaun, FRETILIN 23, KHUNTO 5, PLP 8 no aumenta tán votu haat hosi Partidu Demokrátiku.

“Rezultadu votasaun a-favór 40 tanba ne’e pedidu desitui Arão Noé aprovadu”, anunsia Deputada PLP, Regina Freitas ne’ebé sura votasaun ne’e iha tempu ne’ebá.

Iha tempu ne’ebá, Arão Noé de Jesus da Costa Amaral laiha koñesimentu no hato’o rekursu ba Tribunál Rekursu hodi husu lialoos maibé Tribunál Rekursu indefere rekursu ne’e.

Nune’e meza prezidénsia Parlamentu Nasionál hatuur-hikas ho serimónia kulturál iha loron 4 setembru 2020 no meza prezidénsia foun ne’e konsege aprova lei importante Medida Prevensaun no Kombate Korrupsaun (MPCC-sigla portugés).

Plataforma Entendimentu Entre PLP-FRETILIN iha Hotel Timor

Iha loron 21 marsu 2020, Sekretariu Jerál FRETILIN, Marí Alkatiri no Prezidente PLP atuál PM VIII Governu Konstitusionál, Taur Matan Ruak, asina Plataforma Entendimentu entre partidu rua hodi mantein Taur hanesan Xefe Governu hakotu mandatu iha 2023 no la konkorda Eleisaun Antesipada.

Nune’e Prezidente Repúblika, Francisco Guterres “Lú Olo” promulga OJE 2020 iha loron segunda (19 outubru 2020).

OJE 2021 aprovadu no promulgadu

Liuhosi rezultadu Plataforma entendimentu konsege aprova proposta-lei Orsamentu Jerál Estadu (OJE) ba tinan fiskál 2021 ho montante biliaun $1.895 iha finál  globál ho rezultadu votasaun a-favór 44, kontra 0 no abstensaun 0, bankada CNRT la hola parte iha diskusaun ne’e.

Prezidente Repúblika promulga ona OJE 2021 iha loron segunda, 28 dezembru 2020. Lei no.14/2020 kona-ba OJE 2021 públika ona iha Jornál Repúblika iha loron 29 dezembru 2020.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here