SEKoop fahe sertifikadu ba entidade ne’ebé envolve iha distribuisaun Cesta Bázika iha munisípiu Covalima, kuarta (30/12). Imajen/Mídia SEKoop

COVALIMA, 30 dezembru 2020 (TATOLI)—Iha ámbitu enserramentu distribuisaun produtu Cesta Bázika iha munisípiu Covalima, Sekretáriu Estadu Kooperativa (SEKoop), Elizário Ferreira, hato’o agradesimentu ba autoridade munisipál no entidade hotu tanba bele koopera durante prosesu hodi fó susesu ba programa Governu ne’e.

Iha loron 06 novembru 2020, SEKoop lansa distribuisaun iha munisípiu Covalima, ba populasaun 2.853 iha suku Tasilin, postu administrativu Zumalai.

“Ha’u hakarak fó obrigadu ba Señor Administradór munisípiu Covalima, Komadante Polísia ho ninia Adjuntu tanba sira ativu tebes iha atividade ne’e, nune’e mós ba komadante Eskuadra sira, Ofisiál Polísia Suku (OPS), obrigadu ba ita bo’ot sira-nia kontribuisaun,” Sekretáriu Estadu Elizário hateten iha seremónia enserramentu iha munisípiu Covalima, kuarta ne’e.

Governante ne’e hato’o mós agradesimentu ba Administradór postu administrativu inklui autoridade lokál, ne’ebé durante ne’e sempre halo akompañamentu ba funsionáriu Sekretaria Estadu Kooperativa bainhira distribui produtu ba komunidade.

Komunidade 53.416 iha Covalima simu produtu Cesta Bázika

Iha fatin hanesan, Administradór munisípiu Covalima, Afonso Nogeira Nahak, kongratula ekipa SEKoop tanba bele realiza programa ne’e iha munisípiu refere ho susesu.

“Agradese tanba bele hasoru malu hodi halo enserramentu distribuisaun ba ita-nia komunidade iha postu administrativu neen, suku 25 no aldeia 114, ho totál benefisiáriu 53.416, ne’ebé la’o ho di’ak no susesu iha munisípiu ne’e. Hanesan  Administradór agradese Sekretáriu Estadu ho ninia komitiva tomak nia esforu hamutuk bele halo distribuisaun ho di’ak,” nia dehan.

Postu administrativu neen iha Covalima ne’ebé sai benefisiáriu maka hanesan Tilimor, Maukatar, Fohorem, Zumalai, Fatululik, no Fatumean.

Autoridade munisipál ne’e agradese ba komapañia fornesidór Cesta Bázika tanba bele koopera ho di’ak maski mosu preokupasaun balun maibé bele rezolve ho di’ak no bele la’o ho susesu iha  munisípiu Covalima no komunidade simu ho fuan midar.

Maski atividade ne’e rasik la’o ho di’ak maibé  autoridade munisípiu husu ba SEKoop atu rezolve komunidade iha suku hamutuk 34 iha Suai Villa ne’ebé seidauk simu Cesta Bázika.

Sorin seluk, Diretór kompañia Aitula, Silveiro Maubere, reprezenta kompañia tolu hanesan responsavél  ba distribuisaun Cesta Bázika iha Covalima hateten kompañia ida-idak iha maneira rasik ba distribuisaun.

“Ami serbisu duni tuir kontratu ne’ebé iha no bainhira ami viola maka ministériu implementadór programa sei foti medida ba ami,” nia akresenta.

Nia husu deskulpa ba kestaun balun relasiona ho distribuisaun produtu ne’ebé la’o ladún di’ak.

Kompañia tolu ne’ebé resposável ba distribuisaun Cesta Bázika iha munisípiu Covalima hanesan kapañia Ervel unip. Lda, AL Unip.  Lda no Aitula Lda.

SEKoop responsabiliza distribuisaun Cesta Bázika iha munisípiu hitu hanesan Liquiçá, Aileu, Ainaro, Same, Manatuto no Suai.

Seremónia ne’e hetan partisipasaun másimu husi Autoridade munisipál, Administradór postu administrativu neen, Komadante munisípiu , Autoridade lokál no komunidade balun.

Hafoin enserra seremónia ne’e, ekipa Sekretaria Estadu fahe sertifikadu apresiasaun ba entidade sira ne’ebé envolve iha prosesu distribuisaun.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here