Estudante eskola Ensino Basico Esperança da Pátria, Becora, Dili. Imajen Tatoli/Egas Cristóvão.

DILI, 30 dezembru 2020 (TATOLI)—Iha reuniaun Konsellu Ministru ne’ebé diskute kona-ba medida ezekusaun Estadu Emerjénsia (EE) ba da-siak, Governu la bandu atividade letiva.

“Diploma ne’e la bandu atividade letiva no la‘ós letiva husi eskola, la inklui atividade ho karakter lúdiku, rekreativu ka serimoniál,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu iha Palásiu Governu, kuarta ne’e.

Portavós Governu ne’e akresenta, norma prevensaun ijiénika nesesária no konveniente atu prevene no kontrola epidemia COVID-19 aprovadu liuhosi diploma ministeriál konjunta husi membru Governu hirak ne’ebé sai responsável ba área saúde, edukasaun no ensinu superiór.

“Relasiona ho edukasaun, iha medida ezekusaun ne’e mós dehan Ministru Ensinu Superiór no Ministru Edukasaun, Juventude no Desportu hamutuk ho Ministra saúde, hafoin halo avaliasaun ba nesesidade no kondisaun reál iha terrenu maka sei halo despaisu konjunta atubele regula atividade ensinu,” nia esplika.

Enkuantu, ba ensinu superiór, tuir governante ne’e ladún iha problema tanba sei feriadu, tanba ne’e maka Ministru Ensinu Superiór sei hetan mandadu atubele orienta universidade sira implementa medida nesesáriu hodi prevene moras COVID-19 hada’et.

Kona-ba ensinu báziku to’o sekundáriu, Ministériu Edukasaun, Juventude no Desportu sei halo avaliasaun ida hodi halo despaisu konjunta ne’ebé sei determina métodu ensinu.

Jornalista: Antónia Gusmão

Editora: Julia Chatarina  

HAKEREK NO HATÁN

Please enter your comment!
Please enter your name here