Arsebispu Arkedioseze Metropolitana Dili, Don Virgílio do Carmo da Silva, SDB. Imajen Tatoli/ Egas Cristóvão

DILI, 30 dezembru 2020 (TATOLI)–Pró-Prezidente Conferência Episcopál Timorense (CET) no Arsebispu Arkedioseze Metropolitana Díli, Don Virgílio do Carmo da Silva, SDB, apela ba sidadaun hotu atu obedese ba regra Estadu Emerjénsia (EE) atu nune’e hadook-aan hosi Corona Virus (COVID-19).

Notísia Relevante: Don Virgílio: ”Timoroan fó liman ba malu kombate COVID-19 iha 2021”

“Ita iha nasaun ida-nia laran ne’ebé mak ita-nia na’i-ulun boot sira hatun faktu mai ita katak agora daudaun ita amesadu ho moras COVID-19. Tanba ne’e, ha’u hanoin ita tenke tuir. Ne’e la’ós akontese iha Timor-Leste de’it maibé mundu hotu enfrenta,” Don Virgílio hateten lia hirak ne’e liuhosi konferénsia imprensa iha salaun Câmara Eclesiástica, Lecidere, Dili, kuarta ne’e. 

Kona-ba povu balun ne’ebé seidauk fiar katak COVID-19 ne’e la’ós realidade iha Timor-Leste, Don Virgílio hateten, ema balun seidauk fiar tanba de’it seidauk mate.

“Tanba de’it Timor nia emar seidauk mate mak halo ita la fiar. Maibé, bainhira ida-ne’e mak to’o duni iha Timor mak komesa mate mak ita-nia popualasaun millaun 1-resin de’it labele. Entaun, ho ne’e, meiu saida mak hodi defende ita-nia aan mak halo prevensaun,” Arsebispu ne’e dehan.

Pró Prezidente CET ne’e hatutan, iha nasaun boot sira de’it sei mate barak maske sira iha médiku, ekipamentu ne’ebé mak avansadu mós sei foti liman, satan Timor-Leste ne’ebé laiha ekipamentu sufisiénte ba moras ne’e.

“To’o agora ita de’it la hatene ita-nia ventiladór hira hodi hanaruk ema-nia vida,” bibi atan ne’e kestiona.

Dom Virgílio mós iha esperansa katak iha mundu komesa halo ona vasina ba moras COVID-19 no hein katak tempu badak TL mós sei hetan vasina ne’e, nune’e bele moris ho seguru no livre.

“Maibé, agora hanesan ne’e. Ita presiza kolabora hodi halo prevensaun ho másimu ba realidade ne’ebé mak iha. Ita dehan realidade tanba ita-nia nasaun viziñu Indonézia mate barak. Ita Timor la fiar tanba seidauk iha ema mak mate,” Dom Virgílio hateten. 

Notísia Relevante: PN aprova estensaun Estadu Emerjénsia ba-dasiak

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here