Deputadu PD, Mariano Assanami Sabino. Imajen TATOLI/Egas Cristóvão

DILI, 30 dezembru 2020 (TATOLI)—Deputadu Partidu Demokrátiku (PD), Mariano Assanami Sabino, enkoraja VIII Governu Konstitusionál atu halais investimentu projetu infraestutura kabu submarinu.

“Governu tenke halais investimentu kabu submarinu tanba daudaun ne’e  jerasaun dijitál ne’ebé presiza internet ne’ebé ho velosiadade di’ak, kualidade no barratu,” Deputadu Assanami dehan iha sala plenária Parlamentu Nasionál, kuarta ne’e.

Deputadu opozisaun ne’e nota katak daudaun internet iha Timor-Leste folin karun, tanba ne’e Governu presiza regula urjente, liuliu Autoridade Nasionál Komunikasaun.

“Ita nia internet iha 100 megabyte/segundu ita selu kada fulan $30.000,  maibé  iha Indonézia ne’e selu $75  no iha Malasia selu ho $35,” nia akresenta.

Nia dehan, bainhira halo investimentu ba infraestrutura ne’e, labele tauk seguransa tanba daudaun ne’e mundu dijitál ne’ebé kada nasaun bele akompaña saida de’it maka akontese.

“Ita labele tauk seguransa Estadu tanba ita mak presiza halo jestaun iha rai laran,” Eis Ministru Petróleu no Minerál ne’e afirma.

Nune’e, Partidu Demokrátiku apoia investimentu kabu submarinu hodi moderniza no siviliza sosiedade atu sai jerasaun dijitál iha Timor-Leste no mundu.

Entertantu, Governu prevee millaun $41,588 ba verba Fundu Infraestrutura (FI) hodi halo akizisaun ekipamentu informátika kabu submarinu (fibra óptika) atubele ezekuta projetu ne’e iha tinan oin (2021).

Ezekutivu sira deside prevee orsamentu ne’ebé liuhosi desizaun Konsellu Administrasaun Fundu Infraestrutura (KAFI) no Konsellu Ministru delibera no aprova projetu ligasaun kabu submarinu liga husi Austrália mai Timor- Leste.

Polítika dada kabu submarinu hosi Darwin mai Timor-Leste nu’udar prioridade Governu ho kooperasaun Governu Canberra, ho objetivu atu eleva kapasidade rede internet iha rai laran, tanba VIII Governu Konstitusionál mós iha programa e-goverment, ne’ebé bainhira atu realiza presiza iha liña internet ho lais.

Tuir dadus 2019 nian husi Seasia.co, Timor- Leste iha velosidade internet neineik liu daruak iha mundu no velosidade neineik liu dala-25 husi velosidade média iha nasaun Ázia no Pasífiku tomak.

Enkuantu, Governu liuhosi Ministériu Transporte no Komunikasaun (MTK) aluga bandwith ho kapasidade 200 megabyte/segundu hodi fahe ba instituisaun Estadu sira hamutuk 140.

Governu iha ona planu atu atualiza husi kapasidade 200 megabyte/segundu ba 1 gigabyte/segundu atubele ajuda bainhira seidauk iha rede fibra óptika.

Jornalista : Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here