DILI, 29 dezembru 2020 (TATOLI)—Ministru Obra Públika (MOP), Salvador Eugênio Soares dos Reis Pires, fó ona orientasaun ba Institutu Jestaun no Ekipamentu (IGE, sigla portugés), hamutuk ho Diresaun Jerál Obra Públika no Diresaun no Diresaun Jerál Água no Saneamentu atu halo intervensaun imediata ba bee nalihun iha estrada públika área Becusse, munisípiu Dili.
Ho orientasaun ne’e, ekipa relevante mobiliza ekipamentu pezadu hodi fera valeta no soe bee ba mota.
“Ekipa IGE hala’o ona serbisu ba dalan ne’ebé liga husi Taibesi ba Becora (área Becusse) tamba impaktu husi bee nalihun no estraga estrada iha fatin refere, fó impaktu ba movimentasaun transporte Públiku no privadu,” Ministru Salvador informa ba Agência TATOLI, iha Palásiu Governu tersa ne’e.
Atividade ne’e envolve hotu Polísia Tránzitu Dili hodi hapara provizóriu movimentasaun transporte hodi labele liu husi fatin refere.
Entretantu, fatin ne’e nakfilak sai bee debu tanba komunidade husik bee foer sai hosi haris fatin no dapur sulin hamutuk ba estrada, tanba ne’e kuandu bee nakonu maka impaktu ba movimentu transporte públiku, liuliu tempu udan.
Jornalista: Antónia Gusmão
Editora: Julia Chatarina
