Komunidade iha suku Comoro, kapitál Dili, troka voucher iha supermerkadu Leader ho produtu Cesta Bázika, kinta (10/12). Imajen TATOLI/António Gonçalves

DILI, 29 dezembru 2020 (TATOLI)–Governu liuhosi Ministériu Koordenadór Asuntu Ekonómiku (MKAE) deside hodi kontinua implementa Cesta Bázika iha territóriu nasionál iha ámbitu Estadu Emerjénsia (EE) tanba programa Governu ne’e ba kurtu prazu no ninia implementasaun hahú novembru to’o dezembru 2020.

Portavós Governu no atuál Ministru Prezidénsia Konsellu Ministru, Fidelis Manuel Leite Magalhães, hateten Governu labele halo kanselamentu ba distribuisaun programa nasionál ne’e maibé sei kumpre  regra sira ne’ebé impoen ona iha medida ezekusaun Estadu Emerjénsia (EE)

Governu deside halo alterasaun dahuluk Dekretu Governu númeru 18/2020, loron 03 dezembru, kona-ba medida ezekusaun deklarasaun EE ne’ebé efetua Dekretu Prezidente Repúblika númeru 70/2020, loron 03 dezembru. 

“Dekretu Governu ne’e la bandu atividade sira, ne’ebé atividade sira inklui distribuisaun Cesta Bázika, maibé bainhira halibur malu másima na’in-10, tanba ne’e distribuisaun produtu bele la’o nafatin,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun Konsellu Ministru iha Palásiu Governu, tersa ne’e.

Notísia Relevante: Alterasaun medida EE, bandu halibur liu na’in-10 exetu pertense família

Portavós Governu ne’e dehan, MKAE presiza halo diploma ministeriál ida ba entidade implementadór sira, ne’ebé entidade hirak ne’e iha dever atu implementa regra ne’ebé hatuur iha Dekretu Governu ba medida prevensaun COVID-19 atu asegura katak ema hirak ne’ebé sei simu Cesta Bázika, bainhira halibur malu karik sei la liu husi ema na’in-10.

“Atividade bele la’o maibé tenke redús númeru ema ne’ebé mak sei halibur malu, entaun ida ne’e hanesan dezafiu boot ida ba Governu, liuliu ba ministériu implementadór sira. Klaru katak dezafiu ida mós ba setór privadu hirak ne’ebé sai parseiru Governu hodi implementa programa ne’e,” Fidelis akresenta.

Governante ne’e subliña, bainhira Governu kansela programa Cesta Bázika ne’ebé la’o ona iha dalan klaran maka sei iha implikasaun barak.

“Implikasaun maka sei la kontribui ajuda populasaun responde difikuldade ne’ebé maka situasaun emerjénsia ne’e lori. Tanba ne’e maka kontinua nafatin maibé tenke observa ho rigorozu rekezitu saúde ne’ebé mak Governu hatuur ona iha Dekretu Governu ba medida implementasaun Estadu Emerjénsia ne’e,” nia hatutan.

Biban ne’e, nia husu komunidade mantein kalma tanba inisiativa ne’ebé Governu foti atu impede transmisaun lokál ba COVID-19, tanba ne’e husu kontribuisaun entidade tomak.

“Husu mós ba autoridade lokál sira atu atensaun hodi organiza komunidade sira bainhira ba simu Cesta Bázika,” nia fó apela.

Ministériu implementadór ba programa cesta Bázika maka hanesan MKAE, Ministériu Turizmu, Komérsiu no Indústria (MTKI), Ministériu Agrikultura no Peska, Sekretaria Estadu Kooperativa (SEKoop), Sekretaria Estadu Ambiente (SEA) inklui Autoridade Rejiaun Administrativa Espesiál Oé-cusse Ambeno (RAEOA).

Programa Cesta Bázika fixa membru idaidak agregadu familiár sei hetan $25, kada fulan iha fulan-rua nia laran no bele troka ho folin sasán ne’ebé korresponde ba valór osan.

Programa ne’e hahú lansa nasionál iha loron 27 novembru 2020 iha suku Sabuli, postu administrativu Metinaro, munisípiu Dili.

Tuir dadus husi MAE, totál benefisiáriu iha territóriu tomak hamutuk millaun 1,5 ho modalidade distribuisaun produtu iha munisípiu sira no modalidade voucher iha área urbana, nune’e bele troka ho produtu iha loja ne’ebé ministériu implementadór indika ona.

Governu implementa medida haat ho kustu totál millaun $113,4, ba kurtu prazu hanaran mitigasaun impaktu ekonómiku no sosiál ba krize COVID-19, ho objetivu esensiál atu haree ba postu traballu ezistente antes krize no rekupera rendimentu família liuhosi hadi’a empregu no apoiu direitu sidadaun no empreza iha merkadu inklui normaliza hikas atividade ekonómika.

Hosi medida haat ne’e, inklui hotu programa Cesta Bázika ba família, ho totál kustu ba implementasaun hamutuk millaun $71,5 (valór bele iha mudansa) ho objetivu atu fó apoiu ba nesesidade bázika família, kombate hamlaha ba família vulnerável liu, apoiu ba agrikultór, produtór no komersiante lokál.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here