Imajen/SAS Timor-Leste.

DILI, 29 dezembru 2020 (TATOLI)—Xefe Departamentu Abastesimentu Água Munisípiu Dili, Francisco Pereira Xavier, hateten komunidade sira bele uza Sanyo hodi dada bee maibé labele liga direta ba kanu ne’ebé fornese hosi Dirasaun Nasionál Servisu Água (DNSA) nian.

Notísia Relevante: Komunidade Tenke iha Konsiénsia Uza Bee-Moos

“Populasaun sira bele uza Sanyo hodi dada bee maibé ita mak tenke komprende oinsá mak uza Sanyo. Tanba, ita hatene katak uza Sanyo ne’e supa bee barak. Nune’e, iha ema balun mak uza Sanyo karik labele liga direta ba kanu DNSA nian,” Francisco Pereira Xavier hateten ba Agência TATOLI via telefónika, tersa ne’e.

Nia hatutan, komunidade sira bele uza Sanyo maibé bele liga ba ida-idak nia tanke bee nian iha uma, hanesan uza Sanyo atu liga ka dad bee hosi tanke rai-laran ba tanke sira iha uma leten maibé labele liga direta ba kanu DNSA nian.

“Ami la bandu ema atu uza Sanyo hodi dada bee maibé husu ba komunidade sira katak uza Sanyo ba tanke ne’ebé iha imi-nia uma rasik ka tanke ne’ebé ita-boot sira ense ona bee ba laran. La’ós, uza Sanyo liga ba kanu DNSA nian,” nia fó hanoin

Nia dehan, normalmente bee to’o hela ba komunidade urbana maibé iha ema balun mak uza Sanyo no maiória mak lakohi kontribui hodi estraga bee bainhira uza kanu DNSA ne’e. Tanba, tuir nia, bainhira liga direta mak bee ba ema ne’ebé hela iha fatin aas ne’e konserteza labele asesu bee tanba bee menus no labele sa’e ba foho leten.

Xefe Departamentu Abastesimentu ne’e haktuir, bee ba komunidade urbana daudaun ne’e sufisiente hela maibé komunidade hela iha fatin (rai) aas hanesan Bedois, Becusse, Taibesi, Comoro, sa’e ba foho nian mak bee menus.

Tuir nia, durante ne’e ekipa kontrolu hosi DNSA nian identifika katak komunidade maiória mak kontinua uza Sanyo liga direta ba kanu DNSA nian. Nia informa, komunidade balun ne’ebé uza Sanyo mak ekipa kontrolu ne’e toman entaun Sanyo sira sobu ka hasai tiha.

“Bainhira ami toman ne’e, ami hasai. Maibé antes hasai ne’e, ami sei esplika ba sira kona-ba oinsá uza Sanyo no Sanyo ida- ne’ebé mak sira bele uza, depois impaktu uza Sanyo direta ba kanu DNSA nian ne’e mak oinsá. Entaun, liuhosi esplikasaun ne’e, ha’u hanoin komunidade balun komprende no futuru ema hotu sei hetan bee ho direirtu hanesan,” nia dehan. 

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here